വാഷിങ്ടണ്: നാസയുടെ ചരിത്രപ്രധാനമായ ആര്ട്ടെമിസ് II (Artemis II) ദൗത്യത്തില് നിര്ണ്ണായക പങ്കുവഹിക്കാന് ഒരുങ്ങി കനേഡിയന് ബഹിരാകാശ സഞ്ചാരി ജെന്നി ഗിബ്ബണ്സ്. 50 വര്ഷത്തെ ഇടവേളയ്ക്ക് ശേഷം മനുഷ്യനെ വീണ്ടും ചന്ദ്രനിലെത്തിക്കാനുള്ള ഈ ദൗത്യത്തില്, കനേഡിയന് സഞ്ചാരി ജെറമി ഹാന്സന്റെ ബാക്കപ്പ് ആയാണ് കാല്ഗറി സ്വദേശിയായ ജെന്നി നിയോഗിക്കപ്പെട്ടിരിക്കുന്നത്. ഏപ്രില് ഒന്നിനാണ് ദൗത്യം വിക്ഷേപിക്കാന് നാസ ലക്ഷ്യമിടുന്നത്.
ജെറമി ഹാന്സണ് എന്തെങ്കിലും കാരണവശാല് യാത്ര ചെയ്യാന് സാധിക്കാതെ വന്നാല് ആ ദൗത്യം ഏറ്റെടുക്കുക എന്നതാണ് ജെന്നിയുടെ പ്രധാന ചുമതല. ഇതിനായി വര്ഷങ്ങളോളം നീണ്ട കഠിനമായ പരിശീലനങ്ങളാണ് ജെന്നി പൂര്ത്തിയാക്കിയത്. റോക്കറ്റില് യാത്ര ചെയ്യുന്നില്ലെങ്കിലും, വിക്ഷേപണത്തിന് മുന്നോടിയായി പേടകത്തിന്റെ സജ്ജീകരണങ്ങള് പരിശോധിക്കുന്നതിലും ചന്ദ്രനെ വലംവെക്കുന്ന സഞ്ചാരികള്ക്ക് ഭൂമിയില് നിന്ന് നിര്ദ്ദേശങ്ങള് നല്കുന്ന വോയ്സ് ലിങ്ക് (Voice Link) ആയി പ്രവര്ത്തിക്കുന്നതിലും ജെന്നി പ്രധാന പങ്കുവഹിക്കും.
മക്ഗില് സര്വകലാശാലയില് നിന്ന് മെക്കാനിക്കല് എഞ്ചിനീയറിങും കേംബ്രിഡ്ജില് നിന്ന് പിഎച്ച്ഡിയും നേടിയ ജെന്നി, 2017-ലാണ് കനേഡിയന് ബഹിരാകാശ ഏജന്സിയില് ചേരുന്നത്. ഈ ദൗത്യം കേവലം ശാസ്ത്രീയ പര്യവേഷണം മാത്രമല്ല, രാജ്യങ്ങള് തമ്മിലുള്ള സഹകരണത്തിന്റെ വലിയ മാതൃക കൂടിയാണെന്ന് ജെന്നി പറഞ്ഞു. ചന്ദ്രന്റെ ഇതുവരെ കാണാത്ത ഭാഗങ്ങളെക്കുറിച്ചുള്ള വിവരങ്ങള് ശേഖരിക്കാനും മനുഷ്യന്റെ ബഹിരാകാശ സ്വപ്നങ്ങള്ക്ക് പുതിയ വേഗത നല്കാനും ഈ ദൗത്യം സഹായിക്കുമെന്നാണ് പ്രതീക്ഷിക്കുന്നത്.
