ഓട്ടവ: കാനഡയിലെ അത്യാധുനിക നിർമ്മാണ മേഖല ശക്തിപ്പെടുത്തുന്നതിനായി 25 മില്യൺ ഡോളറിന്റെ ധനസഹായം പ്രഖ്യാപിച്ച് ഫെഡറൽ സർക്കാർ. ജർമ്മനിയിൽ നടക്കുന്ന ലോകത്തിലെ ഏറ്റവും വലിയ വ്യവസായ വ്യാപാര മേളയായ ‘ഹാനോവർ മെസ്സെ’യിൽ വെച്ചാണ് ഈ നിർണ്ണായക പ്രഖ്യാപനം നടത്തിയത്. തിരഞ്ഞെടുക്കപ്പെട്ട 14 പദ്ധതികൾക്കായിട്ടാണ് സർക്കാർ ഈ തുക അനുവദിക്കുന്നത്. വ്യവസായ മേഖലയിൽ നിന്ന് അധികമായി സമാഹരിച്ച 38 മില്യൺ ഡോളറിന് പുറമെയാണിത്.
കൂടുതൽ കാര്യക്ഷമമായ ബാറ്ററി ഉൽപ്പാദനം, സൗന്ദര്യവർദ്ധക ഉൽപ്പന്നങ്ങളുടെ പാക്കേജിംഗിൽ എഐ ഉപയോഗിക്കൽ, മീഥെയ്ൻ വാതകത്തെ ഊർജ്ജമായി മാറ്റൽ, ചെറിയ ആണവ റിയാക്ടറുകൾക്കായുള്ള ഓട്ടോമേറ്റഡ് നിർമ്മാണം തുടങ്ങിയ നൂതന പദ്ധതികളാണ് ഈ തുകയിലൂടെ നടപ്പിലാക്കുന്നത്. ഗവേഷണങ്ങളെ വാണിജ്യപരമായി ലാഭകരമായ പദ്ധതികളാക്കി മാറ്റാനും കാനഡയുടെ വ്യാപാരമേഖല ആഗോളതലത്തിൽ വിപുലീകരിക്കാനും ഈ ഫണ്ടിങ് സഹായിക്കുമെന്ന് വ്യവസായ മന്ത്രി മെലനി ജോളി അറിയിച്ചു.
‘നെക്സ്റ്റ് ജനറേഷൻ മാനുഫാക്ചറിങ് കാനഡ’ (NGen) എന്ന ലാഭേച്ഛയില്ലാത്ത സംഘടന വഴിയാണ് കോർപ്പറേറ്റ് സഹായങ്ങൾ ഏകോപിപ്പിക്കുന്നത്. കഴിഞ്ഞ വർഷം ഈ മേളയിൽ കാനഡ മുഖ്യ രാജ്യമായിരുന്നെങ്കിലും തിരഞ്ഞെടുപ്പ് തിരക്കുകൾ മൂലം മുതിർന്ന നേതാക്കൾക്ക് പങ്കെടുക്കാൻ സാധിച്ചിരുന്നില്ല. വ്യാപാര മേളയുടെ ഭാഗമായി ഈ ആഴ്ച വ്യവസായ മന്ത്രി മെലനി ജോളി കനേഡിയൻ മാധ്യമങ്ങളെ അഭിസംബോധന ചെയ്യുമെന്നാണ് വിവരം.
