റെജൈന: ജയിലുകളിലേക്ക് ഡ്രോണുകൾ ഉപയോഗിച്ച് ലഹരിമരുന്നുകളും ആയുധങ്ങളും കടത്തുന്നത് തടയാൻ പുതിയ സാങ്കേതികവിദ്യ പരീക്ഷിക്കാനൊരുങ്ങി പ്രവിശ്യാ സർക്കാർ. ജയിലിലേക്കും തടവുകാരുടെ സെല്ലുകളിലേക്കും ഡ്രോണുകൾ വഴി സാധനങ്ങൾ എത്തിക്കുന്നത് ഒരു ‘ഉബെർ ഈറ്റ്സ്’ (Uber Eats) സേവനം പോലെയായി മാറിയെന്നാണ് പ്രിരീ മേഖലയിലെ ജയിൽ വാർഡൻമാരുടെ പരാതി. മെത്താംഫിറ്റമിൻ, സെറാമിക് ബ്ലേഡുകൾ, മൊബൈൽ ഫോണുകൾ തുടങ്ങിയവയാണ് പ്രധാനമായും ഡ്രോണുകൾ വഴി ജയിലിനുള്ളിലെത്തുന്നത്.
ഡ്രോണുകൾ ലഹരിമരുന്നും ആയുധങ്ങളും ജയിലുകളിലെത്തിക്കുന്നത് വലിയൊരു സുരക്ഷാ ഭീഷണിയാണെന്ന് ജയിൽ ഉദ്യോഗസ്ഥരുടെ യൂണിയൻ വ്യക്തമാക്കി. ജയിലുകളിൽ ലഹരിമരുന്നുകളുടെ ഒഴുക്ക് നിയന്ത്രിക്കാൻ അടിയന്തര സഹായം ആവശ്യമാണെന്ന് അവർ ചൂണ്ടിക്കാട്ടി. ഇത്തരം കടത്തലുകൾ വർദ്ധിക്കുന്നത് തടവുകാർക്കിടയിൽ അക്രമങ്ങൾക്കും മയക്കുമരുന്ന് അമിത ഉപയോഗം മൂലമുള്ള മരണങ്ങൾക്കും കാരണമാകുന്നുണ്ട്. കാനഡയിലെ വിവിധ പ്രവിശ്യകളിൽ ഇത്തരം സംഭവങ്ങൾ റിപ്പോർട്ട് ചെയ്യപ്പെട്ടതിനെത്തുടർന്നാണ് സസ്കാച്വാൻ സർക്കാർ മുൻകരുതൽ നടപടിയുമായി രംഗത്തെത്തിയത്.
ജയിലുകൾക്ക് ചുറ്റും പറക്കുന്ന അനധികൃത ഡ്രോണുകളെ കണ്ടെത്താൻ സഹായിക്കുന്ന പുതിയ സാങ്കേതികവിദ്യ പരീക്ഷിക്കാനാണ് സസ്കാച്വാൻ സർക്കാർ പദ്ധതിയിടുന്നത്. ഇതിലൂടെ സുരക്ഷ വർദ്ധിപ്പിക്കാനും, സംശയാസ്പദമായ ഡ്രോണുകൾ കണ്ടെത്തിയാൽ ഉദ്യോഗസ്ഥർക്ക് ഉടൻ ഇടപെടാനും സാധിക്കും. ഈ പദ്ധതി ഒരു തുടക്കം മാത്രമാണെന്നും, സുരക്ഷാ സംവിധാനങ്ങൾ കൂടുതൽ ശക്തമാക്കുന്നതിനായി കാത്തിരിക്കുകയാണെന്നും ജയിൽ ഉദ്യോഗസ്ഥരും യൂണിയൻ പ്രതിനിധികളും പ്രത്യാശ പ്രകടിപ്പിച്ചു.
