പശ്ചിമേഷ്യയില് വീണ്ടും യുദ്ധഭീതി ശക്തമായതോടെ ഇന്ത്യന് ഓഹരി വിപണിയില് വന് തകര്ച്ച. ഹോര്മുസ് കടലിടുക്കില് അമേരിക്കയും ഇറാനും തമ്മില് പുതിയ സംഘര്ഷങ്ങള് ഉടലെടുത്തെന്ന വാര്ത്തകള് പുറത്തുവന്നതാണ് നിക്ഷേപകരെ ആശങ്കയിലാഴ്ത്തിയത്. വ്യാപാരം ആരംഭിച്ച ആദ്യ മണിക്കൂറുകളില് തന്നെ സെന്സെക്സ് 450 പോയിന്റും നിഫ്റ്റി 140 പോയിന്റും ഇടിഞ്ഞു. രാജ്യാന്തര വിപണിയില് ക്രൂഡ് ഓയില് വില ബാരലിന് 101 ഡോളറിന് മുകളിലേക്ക് ഉയര്ന്നതും വിപണിയെ പ്രതികൂലമായി ബാധിച്ചു.
നിഫ്റ്റി 24,200 എന്ന നിര്ണ്ണായക പിന്തുണ നിലനിര്ത്താന് പാടുപെടുകയാണെന്നും ഇത് തകര്ന്നാല് സൂചിക 24,000 ലേക്ക് വേഗത്തില് താഴുമെന്നും വിപണി വിദഗ്ധര് മുന്നറിയിപ്പ് നല്കുന്നു. ആഗോളതലത്തില് ‘റിസ്ക്-ഓഫ്’ മൂഡ് പ്രകടമാണെങ്കിലും ആഭ്യന്തര വിപണിയിലെ ഡിഐഐ (DII) നിക്ഷേപങ്ങള് വിപണിക്ക് നേരിയ ആശ്വാസം നല്കുന്നുണ്ട്. വിപണി ചാഞ്ചാടുമ്പോഴും ജിഎംആര് എയര്പോര്ട്ട്സ്, ഹിന്ദുസ്ഥാന് എയറോനോട്ടിക്സ്, ബയോകോണ്, വേദാന്ത, യുപിഎല് തുടങ്ങിയ ഓഹരികള് മികച്ച പ്രതിരോധം കാഴ്ചവെക്കുന്നുണ്ട്.
സാങ്കേതികമായി വിപണി ഒരു താല്ക്കാലിക വിരാമത്തിലാണെന്നും 24,400 ന് മുകളില് ക്ലോസ് ചെയ്താല് മാത്രമേ ഇനി ഒരു മുന്നേറ്റം പ്രതീക്ഷിക്കാനാവൂ എന്നും ആക്സിസ് ഡയറക്റ്റിലെ ഗവേഷണ മേധാവി രാജേഷ് പാല്വിയ നിരീക്ഷിക്കുന്നു. അതേസമയം, സാധാരണക്കാര്ക്ക് ആശ്വാസകരമായ വാര്ത്തകളുമായി പുരപ്പുറ സോളാര് പദ്ധതികളുടെ സാമ്പത്തിക നേട്ടങ്ങളെക്കുറിച്ചുള്ള റിപ്പോര്ട്ടുകളും പുറത്തുവന്നു. പ്രതിമാസം 400 യൂണിറ്റ് വൈദ്യുതി ഉപയോഗിക്കുന്ന ഒരു കുടുംബത്തിന് സോളാര് സംവിധാനത്തിലൂടെ വര്ഷം 40,000 രൂപ വരെ ലാഭിക്കാനാകുമെന്ന് കണക്കുകള് സൂചിപ്പിക്കുന്നു. യുദ്ധസമാനമായ സാഹചര്യങ്ങള് നിലനില്ക്കുന്നതിനാല് വരും ദിവസങ്ങളില് സ്വര്ണം, ക്രൂഡ് ഓയില് വിലകളിലെ മാറ്റങ്ങള് വിപണിയുടെ ഗതി നിര്ണ്ണയിക്കും.
