ഓട്ടവ: പ്രമുഖ ബ്രാൻഡായ Zwilling ന്റെ ഇലക്ട്രിക് കെറ്റിലുകൾ ഉപയോഗിക്കുന്നവർക്ക് കടുത്ത പൊള്ളലേൽക്കാൻ സാധ്യതയുണ്ടെന്ന് മുന്നറിയിപ്പ് നൽകി ഹെൽത്ത് കാനഡ. സുരക്ഷാ മുൻകരുതലുകളുടെ ഭാഗമായി വിപണിയിൽ നിന്നും ഇവ അടിയന്തിരമായി തിരിച്ചുവിളിക്കാൻ ഉത്തരവിട്ടു. ഉപഭോക്താക്കൾ ഈ കെറ്റിലുകളുടെ ഉപയോഗം ഉടൻ നിർത്തണമെന്നും പണം തിരികെ ലഭിക്കുന്നതിനായി രജിസ്റ്റർ ചെയ്യണമെന്നും നിർദ്ദേശമുണ്ട്. Zwilling കമ്പനിയുടെ 1.5 ലിറ്റർ ശേഷിയുള്ള Zwilling Enfinigy Electric Kettle, Enfinigy Electric Pro Kettle എന്നീ മോഡലുകൾക്കാണ് മുന്നറിയിപ്പ് വ്യാപകം. 2020 ഫെബ്രുവരി മുതൽ 2026 ഫെബ്രുവരി വരെയുള്ള കാലയളവിൽ കാനഡയിലുടനീളം 43,963 കെറ്റിലുകളാണ് വിറ്റുപോയിട്ടുള്ളത്. കെറ്റിൽ ഉപയോഗിച്ചുകൊണ്ടിരിക്കുമ്പോൾ അതിന്റെ ഹാൻഡിൽ (പിടി) അയഞ്ഞുപോകാനോ അല്ലെങ്കിൽ പൂർണ്ണമായും ഒടിഞ്ഞുപോകാനോ സാധ്യതയുണ്ടെന്ന് ഹെൽത്ത് കാനഡ വ്യക്തമാക്കി.
ചില പ്രത്യേക സാഹചര്യങ്ങളിൽ, കെറ്റിലിന്റെ ഈ തകരാർ കാരണം തിളച്ച വെള്ളം പുറത്തേക്ക് മറിയാൻ സാധ്യതയുണ്ട്. ഇത് കെറ്റിൽ ഉപയോഗിക്കുന്നവർക്കോ അല്ലെങ്കിൽ സമീപത്തുണ്ടാകാൻ സാധ്യതയുള്ള ചെറിയ കുട്ടികൾ ഉൾപ്പെടെയുള്ളവർക്കോ കടുത്ത പൊള്ളലേൽക്കുന്നതിന് കാരണമായേക്കാമെന്നും ഹെൽത്ത് കാനഡ പറഞ്ഞു. മെയ് 13 വരെയുള്ള കണക്കുകൾ പ്രകാരം, കാനഡയിൽ ഇത്തരത്തിലുള്ള 21 അപകട റിപ്പോർട്ടുകളും ഒരു പരുക്കിന്റെ വിവരവും കമ്പനിക്ക് ലഭിച്ചിട്ടുണ്ട്. ബാധിക്കപ്പെട്ട മോഡലുകൾ കൈവശമുള്ളവർ അത് ഉപയോഗിക്കുന്നത് ഉടനടി നിർത്തണം. കൂടുതൽ വിവരങ്ങൾക്കും പണം തിരികെ ലഭിക്കുന്നതിനുമായി ഉപഭോക്താക്കൾക്ക് കമ്പനിയുമായി നേരിട്ട് ബന്ധപ്പെടാം. ഈ ഉൽപ്പന്നം ഉപയോഗിച്ചപ്പോൾ എന്തെങ്കിലും തരത്തിലുള്ള സുരക്ഷാ പ്രശ്നങ്ങൾ നേരിട്ടിട്ടുള്ളവർ അത് ഹെൽത്ത് കാനഡയെ അറിയിക്കാനും അധികൃതർ ആവശ്യപ്പെട്ടിട്ടുണ്ട്.
