ആഗോള ബിയര് വിപണിയില് തങ്ങളുടെ സാന്നിധ്യം ശക്തമാക്കാനുള്ള വന് ഒരുക്കങ്ങളിലാണ് ഇന്ത്യയിലെ മുന്നിര ബിയര് ബ്രാന്ഡുകള്. കിംഗ്ഫിഷര്, ബിറ 91, ബീയങ്, ഗോഡ്ഫാദര്, മെഡൂസ തുടങ്ങിയ പ്രമുഖ ഇന്ത്യന് ബ്രാന്ഡുകളാണ് അന്താരാഷ്ട്ര വിപണി ലക്ഷ്യമിട്ട് ഇപ്പോള് തന്ത്രപരമായ നീക്കങ്ങള് നടത്തുന്നത്. വലിയ മാറ്റങ്ങളാണ് നിലവില് ആഗോള ബിയര് വിപണിയില് ദൃശ്യമാകുന്നത്. 2024-ല് ഏകദേശം 839.31 ബില്യണ് ഡോളര് മൂല്യമുണ്ടായിരുന്ന ആഗോള വിപണി, 6.8 ശതമാനം വാര്ഷിക വളര്ച്ചയോടെ 2030 ആകുമ്പോഴേക്കും 1,248.3 ബില്യണ് ഡോളറില് എത്തുമെന്നാണ് പ്രമുഖ മാര്ക്കറ്റ് റിസര്ച്ച് കണക്കുകള് വ്യക്തമാക്കുന്നത്. ഈ വമ്പന് ആഗോള വിപണിയിലേക്കാണ് ഇന്ത്യന് കമ്പനികള് ഇപ്പോള് കണ്ണ് വെച്ചിരിക്കുന്നത്.
ഇന്ത്യന് ഉപഭോക്താക്കളുടെ താല്പര്യങ്ങളില് വന്ന ഗുണപരമായ മാറ്റമാണ് കമ്പനികളുടെ ഈ പുതിയ അന്താരാഷ്ട്ര ചുവടുവെപ്പിന് പിന്നിലെ പ്രധാന കാരണം. പണ്ട് ‘സ്ട്രോങ്ങ്’ ബിയറുകളോട് മാത്രം താല്പര്യം കാണിച്ചിരുന്ന മദ്യപാനികള് ഇന്ന് പ്രീമിയം, സ്മൂത്ത് ബിയറുകളിലേക്കും വൈവിധ്യമാര്ന്ന ക്രാഫ്റ്റ് ബിയറുകളിലേക്കും ഗണ്യമായി മാറിയിരിക്കുന്നു. അന്താരാഷ്ട്ര നിലവാരമുള്ള ബിയറുകള് ഇന്ത്യയില് തന്നെ നിര്മ്മിക്കുന്നതിലും ആകര്ഷകമായ ബ്രാന്ഡിംഗ് നടത്തുന്നതിലും ഇന്ത്യന് കമ്പനികള് ഇതിനോടകം കൈവരിച്ച വൈദഗ്ധ്യം വിദേശ വിപണിയില് മറ്റ് ആഗോള ബ്രാന്ഡുകളോട് മത്സരിക്കാന് അവര്ക്ക് വലിയ ആത്മവിശ്വാസം നല്കുന്നുണ്ട്.
വിദേശ വിപണിയിലേക്ക് കടക്കുമ്പോള് ഇന്ത്യന് ബ്രാന്ഡുകള് ആദ്യ മുന്ഗണന നല്കുന്നത് ഗള്ഫ് മേഖലയ്ക്കാണ്. പശ്ചിമേഷ്യന് രാജ്യങ്ങളിലുള്ള വലിയൊരു വിഭാഗം ജനങ്ങള്ക്ക് ഇന്ത്യയുമായുള്ള വൈകാരിക ബന്ധവും, അവിടുത്തെ സമാനമായ രുചി താല്പര്യങ്ങളുമാണ് ഇതിന് പ്രധാന കാരണം. ലോകമെമ്പാടുമുള്ള ഇന്ത്യന് പ്രവാസികള് ഈ ബ്രാന്ഡുകളുടെ ആദ്യകാല ഉപഭോക്താക്കളും അംബാസഡര്മാരുമായി മാറുന്നു എന്നതും ശ്രദ്ധേയമാണ്. പുതിയ അന്താരാഷ്ട്ര വിപണികളില് വളരെ പെട്ടെന്ന് തന്നെ വേരൂന്നാന് ഇത് ഇന്ത്യന് കമ്പനികളെ ഏറെ സഹായിക്കുന്നുണ്ട്.
എങ്കിലും വിദേശ രാജ്യങ്ങളിലേക്ക് മദ്യം കയറ്റുമതി ചെയ്യുന്നത് അത്ര എളുപ്പമുള്ള കാര്യമല്ലെന്ന് വിപണി വിദഗ്ധര് ചൂണ്ടിക്കാണിക്കുന്നു. ഓരോ രാജ്യത്തിനും അതിന്റേതായ കര്ശനമായ നിയമങ്ങളും വിതരണ നിയന്ത്രണങ്ങളുമുണ്ട്. അന്താരാഷ്ട്ര ലൈസന്സ് നേടുക, ലേബലിംഗ് നിയമങ്ങള് പാലിക്കുക, ഉയര്ന്ന ഇറക്കുമതി തീരുവ മറികടക്കുക, പരസ്യങ്ങള്ക്കുള്ള കര്ശന നിയന്ത്രണങ്ങള് എന്നിവ കമ്പനികള്ക്ക് മുന്നില് വലിയ വെല്ലുവിളികളാണ് ഉയര്ത്തുന്നത്. ഇവ വിജയകരമായി മറികടക്കാനായി വിദേശങ്ങളിലെ പ്രാദേശിക വിതരണ കമ്പനികളുമായി നേരിട്ട് കൈകോര്ക്കാനാണ് ഇന്ത്യന് ബ്രാന്ഡുകള് ശ്രമിക്കുന്നത്. ഇതോടൊപ്പം ബിയറിന്റെ യഥാര്ത്ഥ ഗുണനിലവാരം ഒട്ടും ചോര്ന്നുപോകാതെ വിദേശ വിപണികളില് എത്തിക്കാന് ശക്തമായ ഒരു കോള്ഡ് ചെയിന് വിതരണ ശൃംഖല ഉറപ്പുവരുത്തേണ്ടതും ഈ കമ്പനികള്ക്ക് മുന്നിലുള്ള വലിയ ഉത്തരവാദിത്തമാണ്.
