മുംബൈ: നീറ്റ് പരീക്ഷാ വിവാദവും രാജ്യത്തിന്റെ വിവിധ ഭാഗങ്ങളിലുണ്ടായ വിദ്യാർഥി സമരങ്ങളും പശ്ചാത്തലമാക്കി സിജെപിയുടെ (CJP) രണ്ടുദിവസത്തെ ദേശീയ യോഗത്തിന് ഇന്ന് മഹാരാഷ്ട്രയിലെ ഛത്രപതി സംഭാജിനഗറിൽ തുടക്കമാകും. പാർട്ടിയുടെ ഭാവി പ്രവർത്തനങ്ങൾ, ദേശീയതലത്തിലെ സമരപരിപാടികൾ, വിദ്യാർഥി വിഷയങ്ങളിലെ ഇടപെടലുകൾ എന്നിവയാണ് യോഗത്തിലെ പ്രധാന ചർച്ചാവിഷയങ്ങൾ.
പാർട്ടി സ്ഥാപകൻ അഭിജീത് ദിപ്കെയുടെ വസതിയിലാണ് യോഗം നടക്കുന്നത്. ദേശീയ വക്താക്കൾ, സംസ്ഥാന ഭാരവാഹികൾ, പ്രധാന നേതാക്കൾ, പ്രവർത്തകർ എന്നിവർ യോഗത്തിൽ പങ്കെടുക്കും.
നീറ്റ് സമരവുമായി ബന്ധപ്പെട്ട് കേന്ദ്ര സർക്കാർ നൽകിയ ഉറപ്പുകൾ ഇതുവരെ നടപ്പാക്കിയിട്ടില്ലെന്ന വിലയിരുത്തലാണ് യോഗത്തിൽ ഉയരുന്നത്. സമരങ്ങളിൽ പങ്കെടുത്ത വിദ്യാർഥികൾക്കെതിരായ കേസുകൾ പിൻവലിക്കാത്തതും പൊലീസ് നടപടികൾ തുടരുന്നതും പാർട്ടി ശക്തമായി പ്രതിഷേധിക്കാനാണ് ആലോചിക്കുന്നത്. കേന്ദ്ര ആഭ്യന്തര മന്ത്രാലയത്തിന്റെ നിലപാടിനെതിരായ പ്രതിഷേധ പരിപാടികളും യോഗത്തിൽ ചർച്ച ചെയ്യും.
മറ്റ് സംസ്ഥാനങ്ങളിൽ നടക്കുന്ന വിദ്യാർഥി പ്രക്ഷോഭങ്ങൾക്ക് പിന്തുണ പ്രഖ്യാപിക്കുന്നതും ദേശീയതലത്തിൽ സംയുക്ത സമരവേദി രൂപീകരിക്കുന്നതും പരിഗണനയിലുണ്ട്. വിദ്യാർഥി സംഘടനകളുമായും യുവജന കൂട്ടായ്മകളുമായും കൂടുതൽ സഹകരിച്ച് മുന്നോട്ടുപോകുന്നതിനുള്ള പ്രവർത്തന പദ്ധതികൾക്കും യോഗം അന്തിമരൂപം നൽകും.
യോഗത്തിന് ശേഷം പാർട്ടി നേതാക്കൾ വാർത്താസമ്മേളനം നടത്തി തുടർ സമരപരിപാടികൾ പ്രഖ്യാപിക്കുമെന്നാണ് സൂചന. വിദ്യാർഥികളുടെയും മത്സരപരീക്ഷാ ഉദ്യോഗാർഥികളുടെയും പരാതികളും നിർദേശങ്ങളും നേരിട്ട് മനസ്സിലാക്കുന്നതിനായി ‘ലിസണിംഗ് ടൂർ’ (Listening Tour) എന്ന പേരിൽ രാജ്യവ്യാപക പര്യടനം സംഘടിപ്പിക്കുന്നതും പരിഗണനയിലാണ്. പര്യടനത്തിന്റെ സമയക്രമം, സംസ്ഥാനങ്ങൾ, പൊതുയോഗങ്ങൾ, വിദ്യാർഥി സംവാദങ്ങൾ എന്നിവയുടെ വിശദാംശങ്ങൾ യോഗശേഷം പ്രഖ്യാപിച്ചേക്കും.
വിദ്യാർഥി വിഷയങ്ങളിൽ ദേശീയതലത്തിൽ കൂടുതൽ സജീവമായ ഇടപെടൽ നടത്തുകയും കേന്ദ്ര സർക്കാരിന്മേൽ സമ്മർദ്ദം ശക്തമാക്കുകയും ചെയ്യുക എന്ന ലക്ഷ്യത്തോടെയാണ് സിജെപിയുടെ ഈ രണ്ടുദിവസത്തെ ദേശീയ യോഗം നടക്കുന്നത്.
