വാഷിങ്ടൺ: കാനഡയിൽ നിന്ന് ഉൽപ്പന്നങ്ങൾ ഇറക്കുമതി ചെയ്യുന്ന അമേരിക്കൻ വ്യാപാരികൾക്ക് പുതിയ 50 ശതമാനം തീരുവ വലിയ തിരിച്ചടിയാകുമെന്ന് ആശങ്ക. വർഷങ്ങളായി തുടരുന്ന കനേഡിയൻ വിതരണക്കാരുമായുള്ള വ്യാപാരബന്ധം നിലനിർത്താൻ ആഗ്രഹിക്കുന്നുണ്ടെങ്കിലും, ഉയർന്ന തീരുവ ദീർഘകാലം താങ്ങാനാകില്ലെന്നാണ് വ്യാപാരികളുടെ മുന്നറിയിപ്പ്.
മസാച്യുസെറ്റ്സിലെ കേംബ്രിഡ്ജിലുള്ള പ്രത്യേക ചീസും ആർട്ടിസൻ ഉൽപ്പന്നങ്ങളും വിൽക്കുന്ന ഫോർമാജിയോ കിറ്റ്ച്ചൻ (Formaggio Kitchen) ഉടമ ജൂലിയ ഹാൾമാൻ കെബെക്കിലെ വിതരണക്കാരായ Fromagerie La Station-മായി വർഷങ്ങളായി വ്യാപാരബന്ധം പുലർത്തുന്നുണ്ട്. ഉപഭോക്താക്കൾക്ക് ഏറെ പ്രിയപ്പെട്ട കനേഡിയൻ ചീസ് ഒഴിവാക്കാൻ താൽപര്യമില്ലെങ്കിലും 50 ശതമാനം തീരുവ തുടർന്നാൽ ബിസിനസിന് വലിയ സാമ്പത്തിക സമ്മർദമുണ്ടാകുമെന്ന് അവർ പറഞ്ഞു.
ഫോർമാജിയോ കിറ്റ്ച്ചനിന്റെ സ്റ്റോക്കിന്റെ പകുതിയോളം ഇറക്കുമതി ഉൽപ്പന്നങ്ങളാണ്. ഇതിൽ ഏകദേശം 15 ശതമാനം കനേഡിയൻ ഉൽപ്പന്നങ്ങളാണ്. നിലവിലെ തീരുവയുടെ ആഘാതം ലാഭം കുറച്ചും ഉപഭോക്താക്കൾക്ക് വില ഉയർത്തിയും നേരിടുന്നുണ്ടെങ്കിലും, 50 ശതമാനം തീരുവ ദീർഘകാലം കൈകാര്യം ചെയ്യുക ബുദ്ധിമുട്ടാണെന്ന് ഹാൾമാൻ വ്യക്തമാക്കി.
അമേരിക്കൻ ഇറക്കുമതിക്കാർക്ക് തീരുവയുടെ ഭാരം വർധിക്കുമ്പോൾ, കനേഡിയൻ ഉൽപ്പന്നങ്ങൾക്ക് പകരം മറ്റ് രാജ്യങ്ങളിൽ നിന്ന് സാധനങ്ങൾ വാങ്ങാൻ അവർ നിർബന്ധിതരാകുമെന്നാണ് കനേഡിയൻ വ്യാപാരികളുടെ ആശങ്ക. ഇത് കനേഡിയൻ കയറ്റുമതിക്കാരുടെ ലാഭത്തെയും വിപണി വിഹിതത്തെയും ബാധിക്കാം.
അതേസമയം, കാനഡ-യുഎസ് വ്യാപാര ചർച്ചകൾ നിർണായക ഘട്ടത്തിലാണ്. ഏകദേശം 2800 കോടി കനേഡിയൻ ഡോളർ മൂല്യമുള്ള കനേഡിയൻ ഉൽപ്പന്നങ്ങൾക്ക് പുതിയ യുഎസ് തീരുവ ഏർപ്പെടുത്തുമെന്ന ഭീഷണിയാണ് നിലനിൽക്കുന്നത്. ഓഗസ്റ്റ് 19ന് സമയപരിധി അവസാനിക്കുന്നതിന് മുമ്പ് ധാരണയിലെത്താനുള്ള ശ്രമങ്ങൾ തുടരുകയാണ്.
കനേഡിയൻ പ്രധാനമന്ത്രി മാർക്ക് കാർണിയും യുഎസ് പ്രസിഡന്റ് ഡോണൾഡ് ട്രംപും വ്യാപാര ചർച്ചകളുമായി ബന്ധപ്പെട്ട് ഫോൺ സംഭാഷണം നടത്തിയിട്ടുണ്ട്. അവസാന നിമിഷം വരെ ചർച്ചകൾ തുടരുമെന്നാണ് കാനഡയുടെ നിലപാട്.
കനേഡിയൻ ഉൽപ്പന്നങ്ങൾ ഇറക്കുമതി ചെയ്യുന്ന അമേരിക്കൻ ബിസിനസുകൾക്ക് പുതിയ തീരുവ സാമ്പത്തിക പ്രശ്നം മാത്രമല്ല, വർഷങ്ങളായി വളർത്തിയെടുത്ത വ്യാപാരബന്ധങ്ങൾ അവസാനിപ്പിക്കേണ്ടിവരുന്ന സാഹചര്യം കൂടിയാണെന്ന് വ്യാപാരികൾ പറയുന്നു.
