ഓട്ടവ : മുൻകാല ബിസിനസ് ബന്ധങ്ങളുമായി ബന്ധപ്പെട്ടേക്കാവുന്ന താൽപ്പര്യ വൈരുദ്ധ്യം ഒഴിവാക്കുന്നതിനായി പ്രധാനമന്ത്രി മാർക്ക് കാർണി എട്ട് അധിക സർക്കാർ തീരുമാനങ്ങളിൽ നിന്ന് വിട്ടുനിന്നതായി റിപ്പോർട്ട്. എയർലൈൻ മേഖലയ്ക്കുള്ള സർക്കാർ സഹായവും ബാഫിൻ ദ്വീപിലെ ഖനന പദ്ധതിക്കുള്ള വായ്പയും ഉൾപ്പെടെയുള്ള തീരുമാനങ്ങളിലാണ് പ്രധാനമന്ത്രി നേരിട്ട് ഇടപെടാതിരുന്നത്.
താൻ മുൻപ് പങ്കാളിയായിരുന്നോ ഉപദേശം നൽകിയിരുന്നോ ആയ സ്ഥാപനങ്ങളുമായി ബന്ധപ്പെട്ട സർക്കാർ തീരുമാനങ്ങളിൽ നിന്ന് വിട്ടുനിൽക്കുന്നതാണ് കാർണിയുടെ സമീപനം. ഭരണപരമായ തീരുമാനങ്ങളിൽ വ്യക്തിപരമായോ മുൻകാല ബിസിനസ് ബന്ധങ്ങളിലൂടെയോ ഉണ്ടാകാവുന്ന സ്വാധീനത്തെക്കുറിച്ചുള്ള സംശയങ്ങൾ ഒഴിവാക്കുന്നതിനാണ് ഇത്തരം നടപടിയെന്നാണ് സർക്കാർ വൃത്തങ്ങൾ വ്യക്തമാക്കുന്നത്. ഇതിലൂടെ സർക്കാരിന്റെ സുതാര്യതയും പൊതുജന വിശ്വാസവും ശക്തിപ്പെടുത്തുകയാണ് ലക്ഷ്യം.
കാർണി നേരത്തെയും സമാനമായ കാരണങ്ങളാൽ വിവിധ സർക്കാർ തീരുമാനങ്ങളിൽ നിന്ന് വിട്ടുനിന്നിട്ടുണ്ട്. എന്നാൽ, പ്രധാനമന്ത്രിയുടെ ഈ നടപടികൾ ചില നിർണായക തീരുമാനങ്ങളുടെ നടപടിക്രമങ്ങളെ ബാധിക്കുമോ എന്ന ചർച്ചയും ഉയരുന്നുണ്ട്. വിഷയം പാർലമെന്റിൽ പ്രതിപക്ഷം ഉന്നയിക്കാനുള്ള സാധ്യതയുള്ളതിനാൽ, താൽപ്പര്യ വൈരുദ്ധ്യവുമായി ബന്ധപ്പെട്ട നടപടികളെക്കുറിച്ച് കൂടുതൽ വിശദീകരണം സർക്കാർ നൽകേണ്ടിവരുമെന്നാണ് സൂചന.
