ടൊറന്റോ: ഒന്റാരിയോയിലെ സ്കൂളുകളില് പുതിയ അധ്യയന വര്ഷത്തില് വലിയ മാറ്റങ്ങള് നടപ്പിലാക്കുന്നു. ക്ലാസ് മുറികളിലെ പഠനം കൂടുതല് ശക്തമാക്കുന്നതിനും അടിസ്ഥാന വിദ്യകള്ക്ക് മുന്ഗണന നല്കുന്നതിനുമായി പ്രവിശ്യാ വിദ്യാഭ്യാസ മന്ത്രാലയം സമഗ്രമായ പരിഷ്കാരങ്ങള് പ്രഖ്യാപിച്ചു.
പ്രധാന മാറ്റങ്ങള് താഴെ പറയുന്നവയാണ്:
പരീക്ഷാ രീതിയിലെ മാറ്റം: ഹൈസ്കൂള് തലത്തില് വെയ്റ്റേജ് അധിഷ്ഠിത പരീക്ഷാ രീതി കൊണ്ടുവരുന്നു. 9, 10 ക്ലാസുകളിലെ അവസാന പരീക്ഷയ്ക്ക് 20 ശതമാനവും, 11, 12 ക്ലാസുകളില് 25 ശതമാനവും മാര്ക്ക് വെയ്റ്റേജ് ഉണ്ടായിരിക്കും.
ഹാജരും പങ്കാളിത്തവും: വിദ്യാര്ത്ഥികളുടെ ഹാജറും ക്ലാസുകളിലെ പങ്കാളിത്തവും ഇനി മുതല് ഗ്രേഡിങിനെ ബാധിക്കും. 9, 10 ക്ലാസുകളില് 15 ശതമാനവും, 11, 12 ക്ലാസുകളില് 10 ശതമാനവും മാര്ക്ക് ഹാജറിനായി നീക്കിവെക്കും.
EQAO ഗണിത പരീക്ഷ: ഒന്പതാം ക്ലാസിലെ ഗണിത ഫലത്തില് EQAO പരീക്ഷയുടെ മാര്ക്ക് 20 ശതമാനമായി കണക്കാക്കും.
ഫൈനാന്ഷ്യല് ലിറ്ററസി പരീക്ഷ: പത്താം ക്ലാസ് വിദ്യാര്ത്ഥികള്ക്ക് ബിരുദാനന്തര പഠനത്തിന് യോഗ്യത നേടുന്നതിന് സാമ്പത്തിക സാക്ഷരതാ (Financial Literacy) പരീക്ഷ നിര്ബന്ധമാക്കി.
കിന്റര്ഗാര്ട്ടന് സിലബസ് പരിഷ്കരണം: ചെറുപ്രായത്തില് തന്നെ സയന്സ്, ടെക്നോളജി, കോഡിങ്, സാമ്പത്തിക സാക്ഷരത എന്നിവ കളിയിലൂടെയുള്ള പഠനരീതി വഴി കുട്ടികളെ പഠിപ്പിക്കും.
ചരിത്ര സിലബസിലെ മാറ്റങ്ങള്: കനേഡിയന് കറുത്തവര്ഗ്ഗക്കാരുടെ ചരിത്രം, ഹോളോകോസ്റ്റ് തുടങ്ങിയ കാര്യങ്ങള് പത്താം ക്ലാസിലെ ചരിത്ര പാഠപുസ്തകങ്ങളില് ഉള്പ്പെടുത്തും.
അധ്യാപകര്ക്ക് സഹായധനം: പ്രാഥമിക വിഭാഗം അധ്യാപകര്ക്ക് സ്കൂള് സാമഗ്രികള് വാങ്ങുന്നതിനായി പ്രവിശ്യാ സര്ക്കാര് 750 ഡോളര് അനുവദിക്കും.
ഡിജിറ്റല് ലേണിങ് പ്ലാറ്റ്ഫോം: 1 മുതല് 12 വരെയുള്ള ക്ലാസുകളിലെ അധ്യാപകര്ക്കായി പ്രത്യേക ഡിജിറ്റല് ബോധന പ്ലാറ്റ്ഫോം (Nelson Education’s Edwin) നടപ്പിലാക്കും.
ഇതുകൂടാതെ, കുടുംബങ്ങളുടെ പരാതികള് പരിഹരിക്കാന് ഓരോ സ്കൂള് ബോര്ഡുകളിലും പ്രത്യേക സപ്പോര്ട്ട് ഓഫീസുകള് ആരംഭിക്കാനും കൂടുതല് പുതിയ സ്കൂളുകള് തുറക്കാനും പദ്ധതിയുണ്ട്.
