മസ്കറ്റ്: ഒമാനിൽ പുകയില ഉൽപ്പന്നങ്ങളുടെ എക്സൈസ് നികുതി കണക്കാക്കുന്നതിനുള്ള പുതിയ ചട്ടങ്ങൾ 2026 ഒക്ടോബർ 1 മുതൽ പ്രാബല്യത്തിൽ വരും. സിഗരറ്റുകൾ ഉൾപ്പെടെയുള്ള പുകയില ഉൽപ്പന്നങ്ങൾക്ക് കുറഞ്ഞ അടിസ്ഥാന വില നിശ്ചയിച്ചുകൊണ്ടാണ് ഒമാൻ നികുതി അതോറിറ്റി പുതിയ ചട്ടങ്ങൾ പുറത്തിറക്കിയത്.
പുതിയ ചട്ടപ്രകാരം, 20 സിഗരറ്റുകൾ അടങ്ങിയ ഒരു പാക്കറ്റിന്റെ കുറഞ്ഞ അടിസ്ഥാന വില 1 ഒമാനി റിയാൽ ആയിരിക്കും. ഇതിൽ താഴെയുള്ള വില എക്സൈസ് നികുതി കണക്കാക്കുന്നതിനുള്ള അടിസ്ഥാനമായി സ്വീകരിക്കില്ല.
അതേസമയം, ഷീഷ ഉൾപ്പെടെയുള്ള റെഡി-ടു-യൂസ് പുകയില ഉൽപ്പന്നങ്ങൾക്ക് 250 ഗ്രാമിന് 2.5 ഒമാനി റിയാൽ എന്ന കുറഞ്ഞ അടിസ്ഥാന വിലയാണ് നിശ്ചയിച്ചിരിക്കുന്നത്.
എന്നാൽ ഈ അടിസ്ഥാന വില ഉപഭോക്താവ് നൽകേണ്ട അന്തിമ ചില്ലറ വിൽപ്പന വിലയെന്നില്ല. എക്സൈസ് നികുതി കണക്കാക്കുന്നതിനുള്ള അടിസ്ഥാന വില നിശ്ചയിക്കുകയാണ് പുതിയ ചട്ടത്തിന്റെ ലക്ഷ്യം.
ഒക്ടോബർ ഒന്ന് മുതൽ ചട്ടം പ്രാബല്യത്തിൽ വരുന്നതോടെ ഒമാനിലെ പുകയില ഉൽപ്പന്നങ്ങളുടെ നികുതി കണക്കാക്കുന്ന രീതിയിൽ മാറ്റമുണ്ടാകും.
