ടൊറന്റോ: നഗരത്തിലെ പാർക്കിന് സമീപം വയോധികനെയും അദ്ദേഹത്തിന്റെ വളർത്തുനായയെയും രണ്ട് നായകൾ ചേർന്ന് ക്രൂരമായി ആക്രമിച്ച സംഭവത്തിൽ 40-കാരിയായ ടാനിഷ്യ ബ്ലാക്ക് (Tanishia Black) എന്ന യുവതിയെ ടൊറന്റോ പൊലീസ് അറസ്റ്റ് ചെയ്തു. കഴിഞ്ഞ വ്യാഴാഴ്ച അവന്യൂ റോഡിനും റോക്സ്ബറോ സ്ട്രീറ്റിനും സമീപമുള്ള ഒരു പാർക്കിലായിരുന്നു ഈ ദാരുണ സംഭവം നടന്നത്.
പാർക്കിലെ നായകളെ അഴിച്ചുവിട്ടു നടക്കാവുന്ന പ്രത്യേക വേലി കെട്ടിയ സ്ഥലത്തുനിന്നും (Off-leash area) യുവതിയുടെ രണ്ട് നായകൾ നിയന്ത്രണം തെറ്റി പുറത്തേക്ക് ചാടുകയായിരുന്നു. തുടർന്ന് വഴിയിലൂടെ തന്റെ നായയുമായി നടന്നുപോവുകയായിരുന്ന 70 വയസ്സുകാരനായ വൃദ്ധനെ ഈ നായകൾ ക്രൂരമായി ആക്രമിച്ചു. ആക്രമണത്തിൽ വയോധികന് ഗുരുതരമായി പരുക്കേറ്റെങ്കിലും നിലവിൽ ആരോഗ്യനില തൃപ്തികരമാണെന്ന് പൊലീസ് അറിയിച്ചു.
എന്നാൽ അദ്ദേഹത്തോടൊപ്പമുണ്ടായിരുന്ന വളർത്തുനായയുടെ പരുക്കുകൾ അതീവ ഗുരുതരമാണ്. ആക്രമണം നടത്തിയ നായകൾ ‘പിറ്റ് ബുൾ’ (Pit Bull) അല്ലെങ്കിൽ ‘ബുൾ ടെറിയർ’ (Bull Terrier) ഇനത്തിൽപ്പെട്ട വലിയ ഇനങ്ങളാണെന്നാണ് പ്രാഥമിക നിഗമനം. ശാരീരിക ഉപദ്രവത്തിന് കാരണമാകുന്ന രീതിയിലുള്ള ക്രിമിനൽ അനാസ്ഥ (Criminal negligence), നായകൾ കടിക്കുന്നത് തടയുന്നതിൽ പരാജയപ്പെടുക, ഔദ്യോഗിക കൃത്യനിർവഹണം തടസ്സപ്പെടുത്തുക തുടങ്ങിയ കുറ്റങ്ങളാണ് അറസ്റ്റിലായ യുവതിക്കെതിരെ ചുമത്തിയിട്ടുള്ളത്.
അതേസമയം, ആക്രമണം നടത്തിയ ഈ രണ്ട് നായകളെ ഇതുവരെ കണ്ടെത്താൻ പൊലീസിന് കഴിഞ്ഞിട്ടില്ല. ഇവയെ കണ്ടെത്താനുള്ള ഊർജിതമായ ശ്രമത്തിലാണ് ടൊറന്റോ പൊലീസ്. ഈ നായകളെ എവിടെയെങ്കിലും കണ്ടെത്തുകയാണെങ്കിൽ പൊതുജനങ്ങൾ യാതൊരു കാരണവശാലും അവയുടെ അടുത്തേക്ക് പോകരുതെന്നും ഉടനടി പൊലീസിൽ വിവരമറിയിക്കണമെന്നും അധികൃതർ കർശന മുന്നറിയിപ്പ് നൽകിയിട്ടുണ്ട്.
