ഹാലിഫാക്സ്: ബ്രിട്ടിഷ് കൊളംബിയ, ഒന്റാരിയോ തുടങ്ങിയ പ്രവിശ്യകളെ പിന്നിലാക്കി നോവസ്കോഷ രാജ്യത്തെ ഏറ്റവും ചെലവേറിയ വാടക വിപണിയായി മാറി. പ്രവിശ്യയില് വാടക നിരക്കുകള് മുന്പെങ്ങുമില്ലാത്തവിധം കുതിച്ചുയരുന്നത് സാധാരണക്കാര്ക്കും വിദ്യാര്ത്ഥികള്ക്കും കടുത്ത തിരിച്ചടിയാവുകയാണ്. രാജ്യത്തെ മറ്റ് പ്രധാന നഗരങ്ങളില് വാടക നിരക്കില് കുറവ് രേഖപ്പെടുത്തുമ്പോഴും നോവസ്കോഷയില് നിരക്കുകള് തുടര്ച്ചയായി ഉയരുകയാണ്. റെന്റല്സ്.സിഎ (Rentals.ca), അര്ബനേഷന് എന്നിവ പുറത്തുവിട്ട ഏറ്റവും പുതിയ റിപ്പോര്ട്ട് പ്രകാരം തുടര്ച്ചയായ നാലാം മാസമാണ് കാനഡയില് ഏറ്റവും ഉയര്ന്ന ശരാശരി വാടക നിരക്കുള്ള പ്രവിശ്യയായി നോവസ്കോഷ മാറുന്നത്.
ഓഗസ്റ്റിലെ കണക്കുകള് പ്രകാരം പ്രവിശ്യയിലെ ശരാശരി വാടക നിരക്ക് 2,356 ഡോളറായി ഉയര്ന്നു. ദേശീയ തലത്തില് ശരാശരി വാടകയില് 4.8 ശതമാനത്തിന്റെ കുറവുണ്ടായപ്പോഴാണ് നോവസ്കോഷയില് 3.1 ശതമാനത്തിന്റെ വര്ധനയാണ് രേഖപ്പെടുത്തിയത്.
ഡല്ഹൗസി സര്വകലാശാലയ്ക്ക് സമീപമുള്ള പ്രദേശങ്ങളില് 500 ചതുരശ്ര അടി മാത്രം വലുപ്പമുള്ള ഒറ്റമുറി ഫ്ലാറ്റുകള്ക്ക് പോലും പ്രതിമാസം 1,750 ഡോളറോളമാണ് നിലവിലെ വാടക. പ്രവിശ്യയിലെ മറ്റ് സമാന ഇടങ്ങളില് ഇത് 2,000 ഡോളറിനും മുകളിലാണ്. അഞ്ച് വര്ഷം മുമ്പ് ഈ തുകയ്ക്ക് രണ്ടു മുറികളുള്ള വലിയ ഫ്ലാറ്റുകള് ലഭ്യമായിരുന്നു.
പ്രതിസന്ധിക്ക് പിന്നിലെ പ്രധാന കാരണങ്ങള്:
തൊഴിലുടമകള്ക്ക് അനുകൂലമായ നിയമങ്ങള്: പ്രവിശ്യയില് പ്രാബല്യത്തിലുള്ള ‘ഫിക്സഡ്-ടേം ലീസ്’ രീതിയാണ് പ്രധാന പ്രതിസന്ധി. കരാര് കാലാവധി കഴിയുമ്പോള് വാടകക്കാര്ക്ക് ലീസ് പുതുക്കി നല്കണമെന്ന് നിര്ബന്ധമില്ല. നിലവിലെ വാടകക്കാരെ ഒഴിപ്പിച്ച് പുതിയ ആളുകളെ താമസിപ്പിക്കുമ്പോള് 5 ശതമാനം എന്ന വാടക വര്ധന പരിധി മറികടന്ന് വലിയ തുക ഈടാക്കാന് കെട്ടിട ഉടമകള്ക്ക് സാധിക്കുന്നു.
വന്കിട കോര്പ്പറേറ്റുകളുടെ കുത്തക: ഹാലിഫാക്സിലെ വാടക വീടുകളില് ഭൂരിഭാഗവും വന്കിട ഇന്വെസ്റ്റ്മെന്റ് കമ്പനികളുടെയും കോര്പ്പറേറ്റുകളുടെയും കൈകളിലാണ്. പ്രദേശത്തെ പ്രധാന വാടക കെട്ടിടങ്ങളുടെ 56 ശതമാനവും കേവലം 20 കെട്ടിട ഉടമകളുടെ നിയന്ത്രണത്തിലാണ്.
നിര്മ്മാണ മേഖലയിലെ കാലതാമസം: ഹാലിഫാക്സില് പുതിയ റസിഡന്ഷ്യല് പ്രോജക്ടുകള് പൂര്ത്തിയാകാന് ദേശീയ ശരാശരിയേക്കാള് 70 ശതമാനം അധിക സമയം എടുക്കുന്നു. വര്ധിച്ചുവരുന്ന ഭൂമിവില, പെര്മിറ്റ് ചെലവുകള്, നിര്മ്മാണ തൊഴിലാളികളുടെ ക്ഷാമം എന്നിവയാണ് ഇതിന് കാരണം.
കെട്ടിട ഉടമകളുടെ ഉയര്ന്ന പ്രവര്ത്തനച്ചെലവ്: പ്രോപ്പര്ട്ടി ടാക്സ് വര്ധന, ഇന്ധനവിലയിലുണ്ടായ ഉയര്ന്ന നിരക്കുകള് (ഓയില് വിലയില് മാത്രം 40% വര്ധനവ്), അറ്റകുറ്റപ്പണി ചെലവുകള് എന്നിവയും വാടക കുതിച്ചുയരാന് കാരണമായി ചൂണ്ടിക്കാണിക്കപ്പെടുന്നു.
