മുംബൈ: അമേരിക്കൻ പൗരത്വമുള്ള നടൻ ഇമ്രാൻ ഖാനോട് രാജ്യം വിടാൻ നിർദേശിച്ച് മുംബൈ പൊലീസ് നോട്ടീസ് നൽകി. മുംബൈയിലെ പ്രതിഷേധ പരിപാടിയിൽ പങ്കെടുത്തതിനെ തുടർന്നാണ് നടപടി. ഒക്ടോബർ 28നകം ഇന്ത്യ വിടണമെന്നാണ് നിർദേശം. ഓവർസീസ് സിറ്റിസൺ ഓഫ് ഇന്ത്യ (ഒസിഐ) പദവിയുള്ള നടനെതിരെ ബിജെപി നേതാവ് കിരിത് സോമയ്യ നൽകിയ പരാതിക്ക് പിന്നാലെയാണ് നടപടി.
മുംബൈ സെൻട്രലിലെ ആഗസ്റ്റ് ക്രാന്തി മൈതാനത്ത് നടന്ന പ്രതിഷേധ പരിപാടിയിൽ ഇമ്രാൻ ഖാൻ പങ്കെടുത്തിരുന്നു. സിജെപിയെ പിന്തുണച്ചുകൊണ്ടുള്ള പ്രതിഷേധത്തിൽ നടൻ പങ്കെടുത്തതായി ആരോപിച്ചാണ് കിരിത് സോമയ്യ പരാതി നൽകിയത്.
പ്രതിഷേധത്തിനിടെ 400ലധികം പേരെ കസ്റ്റഡിയിലെടുത്തു
എസ്ഐആർ നടപടികളിൽ ക്രമക്കേടുകൾ നടന്നെന്നാരോപിച്ച് മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവയ്ക്കണമെന്ന് ആവശ്യപ്പെട്ടായിരുന്നു പ്രതിഷേധം. പരിപാടിക്കിടെ ഇമ്രാൻ ഖാൻ, അദ്ദേഹത്തിന്റെ സുഹൃത്ത് ലേഖ വാഷിംഗ്ടൺ, അമ്മ നുസ്രത്ത്, അനന്തരവൾ സെയ്ൻ എന്നിവരടക്കം 400ലധികം പേരെ പൊലീസ് കസ്റ്റഡിയിലെടുത്തിരുന്നു.
പൊലീസ് കൈയേറ്റം ചെയ്തെന്ന് ആരോപിച്ച് സെയ്ൻ പിന്നീട് വീഡിയോ പങ്കുവെച്ചിരുന്നു. കസ്റ്റഡിയിലിരിക്കെ തനിക്കുണ്ടായ പരുക്കുകളും വീഡിയോയിൽ കാണിച്ചിരുന്നു.
വ്യക്തിപരമായ നിലയിലാണ് പങ്കെടുത്തതെന്ന് നടൻ
പ്രതിഷേധത്തിൽ പ്രത്യേക ആവശ്യങ്ങളൊന്നും ഉന്നയിക്കാനല്ല താൻ എത്തിയതെന്നും മുംബൈയിൽ താമസിക്കുന്ന ഒരാളെന്ന നിലയിലാണ് പങ്കെടുത്തതെന്നും ഇമ്രാൻ ഖാൻ വ്യക്തമാക്കിയിരുന്നു. ഏതെങ്കിലും സംഘടനയുമായി ബന്ധപ്പെട്ടല്ല, വ്യക്തിപരമായ നിലയിലാണ് പരിപാടിയിൽ പങ്കെടുത്തതെന്നും അദ്ദേഹം വിശദീകരിച്ചു.
