കൊച്ചി: മുണ്ടംവേലി പി ആൻഡ് ടി ഫ്ലാറ്റ് വാസയോഗ്യമല്ലെന്ന് ഹൈക്കോടതിയിൽ റിപ്പോർട്ട് നൽകി അമിക്കസ് ക്യൂറി. കെട്ടിടത്തിൽ ഗുരുതരമായ നിർമാണപ്പിഴവുകളും സുരക്ഷാ വീഴ്ചകളും നിലനിൽക്കുന്ന സാഹചര്യത്തിൽ താമസക്കാരെ അടിയന്തരമായി സുരക്ഷിതവും വാസയോഗ്യവുമായ മറ്റൊരു സ്ഥലത്തേക്ക് മാറ്റിപ്പാർപ്പിക്കണമെന്ന് റിപ്പോർട്ടിൽ നിർദേശിക്കുന്നു.
താമസക്കാരുടെ ജീവനും ആരോഗ്യത്തിനും ഭീഷണിയാകുന്ന സാഹചര്യത്തിൽ അടിയന്തര ഇടപെടൽ വേണമെന്നാണ് അമിക്കസ് ക്യൂറി കോടതിയെ അറിയിച്ചിരിക്കുന്നത്. ഫ്ലാറ്റിലെ അടിസ്ഥാന സൗകര്യങ്ങളുടെയും സുരക്ഷാ സംവിധാനങ്ങളുടെയും അപര്യാപ്തതയാണ് റിപ്പോർട്ടിൽ പ്രധാനമായും ചൂണ്ടിക്കാട്ടുന്നത്.
ഫ്ലാറ്റിലെ ലിഫ്റ്റുകളും മറ്റ് ആവശ്യമായ സുരക്ഷാ സംവിധാനങ്ങളും പ്രവർത്തനക്ഷമമല്ലെന്നാണ് റിപ്പോർട്ടിലെ കണ്ടെത്തൽ. തീപിടിത്തം പോലുള്ള അടിയന്തര സാഹചര്യങ്ങൾ നേരിടുന്നതിനുള്ള ഫയർ ആൻഡ് സേഫ്റ്റി സംവിധാനങ്ങൾ ഒരുക്കിയിട്ടില്ലെന്നും കെട്ടിടത്തിൽ ഇടിമിന്നൽ പ്രതിരോധ സംവിധാനങ്ങളുടെ അഭാവം ഗുരുതരമായ സുരക്ഷാ ഭീഷണി ഉയർത്തുന്നുണ്ടെന്നും റിപ്പോർട്ടിൽ വ്യക്തമാക്കുന്നു.
കെട്ടിടത്തിലെ നിർമാണപ്പിഴവുകളും സുരക്ഷാ സംവിധാനങ്ങളുടെ അഭാവവും താമസക്കാരുടെ ജീവന് ഭീഷണിയാകുന്ന സാഹചര്യത്തിൽ കാലതാമസമില്ലാതെ നടപടി സ്വീകരിക്കണമെന്നാണ് അമിക്കസ് ക്യൂറിയുടെ നിർദേശം.
വിഷയം ഹൈക്കോടതിയുടെ പരിഗണനയിലാണ്. താമസക്കാരുടെ സുരക്ഷ ഉറപ്പാക്കുന്നതിനായി അവരെ അടിയന്തരമായി മാറ്റിപ്പാർപ്പിക്കണമെന്ന റിപ്പോർട്ടിൽ കോടതി സ്വീകരിക്കുന്ന തുടർനടപടികൾ നിർണായകമാകും.
