ഡൽഹി: മാസപ്പടി കേസിൽ പിണറായി വിജയനും കുടുംബാംഗങ്ങൾക്കും താൽക്കാലിക ആശ്വാസം നൽകി സുപ്രീംകോടതി. കേസിൽ വിജിലൻസ് അന്വേഷണം ആരംഭിക്കാനുള്ള കേരള ഹൈക്കോടതിയുടെ ഉത്തരവിനെ തുടർന്നുള്ള നടപടികൾ ഒരാഴ്ചത്തേക്ക് സ്റ്റേ ചെയ്തു. അപ്പീൽ സമർപ്പിച്ച് തുടർനടപടികൾ തീരുമാനിക്കുന്നതുവരെ അന്വേഷണവുമായി മുന്നോട്ടുപോകരുതെന്നാണ് കോടതിയുടെ ഇടക്കാല നിർദേശം.
ഒറ്റ ദിവസംകൊണ്ട് എഫ്‌ഐആർ രജിസ്റ്റർ ചെയ്തതിലെ അടിയന്തര സാഹചര്യം എന്താണെന്ന് കോടതി ചോദിച്ചു. സംസ്ഥാന സർക്കാരിന്റെ നടപടികളെയും കോടതി വിമർശിച്ചു. പിണറായി വിജയന് അപ്പീൽ നൽകാനുള്ള അവസരം നഷ്ടപ്പെടുത്തിയെന്ന വാദവും കോടതിയിൽ ഉയർന്നു. ഹർജി തുടർപരിഗണനയ്ക്കായി ഹൈക്കോടതിയിലേക്ക് തിരിച്ചയക്കുകയും ചെയ്തു.
ഹൈക്കോടതി ഉത്തരവിനെതിരെ സുപ്രീംകോടതിയിൽ
വിജിലൻസ് അന്വേഷണം നടത്താൻ നിർദേശിച്ച കേരള ഹൈക്കോടതി സിംഗിൾ ബെഞ്ചിന്റെ ഉത്തരവിനെ ചോദ്യം ചെയ്താണ് പിണറായി വിജയൻ, മകൾ ടി. വീണ, മുഹമ്മദ് റിയാസ് എന്നിവരടക്കമുള്ളവർ സുപ്രീംകോടതിയെ സമീപിച്ചത്. ആരോപണവിധേയരുടെ വാദം കേൾക്കാതെയാണ് സിംഗിൾ ബെഞ്ച് ഉത്തരവ് പുറപ്പെടുവിച്ചതെന്നായിരുന്നു ഹർജിക്കാരുടെ പ്രധാന വാദം.
ഈ ഉത്തരവിൽ ഇടപെടാൻ ഹൈക്കോടതി ഡിവിഷൻ ബെഞ്ച് നേരത്തേ വിസമ്മതിച്ചിരുന്നു. ഇതിന് പിന്നാലെയാണ് പിണറായി വിജയനും കുടുംബാംഗങ്ങളും സുപ്രീംകോടതിയിൽ അപ്പീൽ നൽകിയത്.
അടിയന്തര പരിഗണന ആവശ്യപ്പെട്ട് ഹർജിക്കാർ
കേസിൽ മുതിർന്ന രാഷ്ട്രീയ നേതാവായ പിണറായി വിജയന്റെ അറസ്റ്റിന് സാധ്യതയുണ്ടെന്ന ആശങ്ക ചൂണ്ടിക്കാട്ടി ഹർജി അടിയന്തരമായി പരിഗണിക്കണമെന്ന് അദ്ദേഹത്തിന്റെ അഭിഭാഷകൻ കോടതിയോട് ആവശ്യപ്പെട്ടിരുന്നു. തുടർന്നാണ് ദസറ അവധിക്കാലത്ത് സുപ്രീംകോടതി പ്രത്യേക ബെഞ്ച് രൂപീകരിച്ച് ഹർജികൾ പരിഗണിച്ചത്.
