ടെല്‍ അവീവ്: ഇസ്രയേല്‍ തിരഞ്ഞെടുപ്പില്‍ 72 ശതമാനം വോട്ടെണ്ണല്‍ പൂര്‍ത്തിയായപ്പോള്‍, പ്രധാനമന്ത്രി ബെഞ്ചമിന്‍ നെതന്യാഹുവിന്റെ ലിക്കുഡ് പാര്‍ട്ടി നയിക്കുന്ന സഖ്യം മുന്നേറുകയാണ്. എന്നാല്‍, 120 അംഗങ്ങളുള്ള ഇസ്രായേല്‍ പാര്‍ലമെന്റായ ‘ക്‌നെസ്സറ്റില്‍’ കേവല ഭൂരിപക്ഷത്തിന് 61 സീറ്റുകള്‍ വേണമെന്നിരിക്കെ, നിലവില്‍ ഒരു സഖ്യത്തിനും ഭൂരിപക്ഷം തികയ്ക്കാനായിട്ടില്ല. ഇത്തവണ 77.07 ശതമാനം ഉയര്‍ന്ന പോളിംഗാണ് രേഖപ്പെടുത്തിയത്. 1999-ന് ശേഷം ആദ്യമായാണ് രാജ്യത്ത് ഇത്ര ഉയര്‍ന്ന പോളിങ് ഉണ്ടാകുന്നത്.
നിലവിലെ വോട്ടെണ്ണല്‍ സൂചനകള്‍ പ്രകാരം നെതന്യാഹുവിന്റെ ലിക്കുഡ് പാര്‍ട്ടി നയിക്കുന്ന വലതുപക്ഷ സഖ്യം 54 സീറ്റുകളില്‍ മുന്നിലാണ്. മുന്‍ മിലിട്ടറി ചീഫ് ഓഫ് സ്റ്റാഫ് ഗാദി ഐസന്‍കോട്ടിന്റെ ‘യഷാര്‍’ പാര്‍ട്ടി നയിക്കുന്ന പ്രതിപക്ഷ സഖ്യം 48 സീറ്റുകളിലും മുന്നേറുന്നു. തിരഞ്ഞെടുപ്പില്‍ നിര്‍ണായക സാന്നിധ്യമാകുന്ന അറബ് പാര്‍ട്ടികള്‍ 18 സീറ്റുകളില്‍ വിജയം ഉറപ്പിച്ചു കൊണ്ടിരിക്കുന്നു.
ഇസ്രയേല്‍ ജനത മാറ്റത്തിന് അനുകൂലമായി വോട്ട് ചെയ്‌തെന്നും, ജനങ്ങളുടെ വിശ്വാസം നഷ്ടപ്പെട്ട പശ്ചാത്തലത്തില്‍ നെതന്യാഹു തോല്‍വി അംഗീകരിച്ച് പദവി ഒഴിയണമെന്നും പ്രതിപക്ഷ നേതാവ് ഗാദി ഐസന്‍കോട്ട് ആവശ്യപ്പെട്ടു. തങ്ങളുടെ നേതൃത്വത്തില്‍ ഒരു സയണിസ്റ്റ് സര്‍ക്കാര്‍ രൂപീകരിക്കാന്‍ ശ്രമിക്കുമെന്നും അദ്ദേഹം വ്യക്തമാക്കി. എന്നാല്‍, വോട്ടെണ്ണലില്‍ തൂക്കുസഭയ്ക്ക് സാധ്യത കല്‍പ്പിക്കുന്നുണ്ടെങ്കിലും ലിക്കുഡ് പാര്‍ട്ടി തന്നെ ഏറ്റവും വലിയ ഒറ്റക്കക്ഷിയാകുമെന്നും രാജ്യത്ത് വലതുപക്ഷ സര്‍ക്കാര്‍ തന്നെ അധികാരത്തില്‍ വരുമെന്നും നെതന്യാഹു പ്രഖ്യാപിച്ചു.
ഇസ്രയേലിലെ പലസ്തീന്‍ വംശജരായ പൗരന്മാരെ പ്രതിനിധീകരിക്കുന്ന ജോയിന്റ് ലിസ്റ്റ്, റാം എന്നീ പാര്‍ട്ടികള്‍ ഉള്‍പ്പെടുന്ന അറബ് സഖ്യം 19 സീറ്റുകള്‍ വരെ നേടിയേക്കാമെന്നാണ് പ്രവചനങ്ങള്‍. ഇത് യാഥാര്‍ത്ഥ്യമായാല്‍ പാര്‍ലമെന്റില്‍ അറബ് അംഗങ്ങളുടെ എണ്ണം ചരിത്രത്തിലെ ഏറ്റവും ഉയര്‍ന്ന നിലയിലെത്തും. എന്നാല്‍, അറബ് പാര്‍ട്ടികളുടെ പിന്തുണയോടെ പ്രതിപക്ഷം സര്‍ക്കാര്‍ രൂപീകരിക്കുന്നത് നാണക്കേടാണെന്നും സയണിസത്തെ എതിര്‍ക്കുന്നവരുടെ പിന്തുണയോടെയുള്ള ഭരണമാറ്റം അനുവദിക്കില്ലെന്നും നെതന്യാഹു പ്രതികരിച്ചു.
