മുംബൈ: വിസാ നടപടികളിലെ അനിശ്ചിതത്വം, പഠനശേഷമുള്ള തൊഴിൽസാധ്യതകളിലെ കുറവ്, സുരക്ഷാ ആശങ്കകൾ എന്നിവയെ തുടർന്ന് കാനഡയിൽ ഉപരിപഠനത്തിന് പോകാൻ താൽപ്പര്യപ്പെടുന്ന ഇന്ത്യൻ വിദ്യാർത്ഥികളുടെ എണ്ണം കുറയുന്നതായി റിപ്പോർട്ട്. കാനഡയും ഇന്ത്യയും തമ്മിലുള്ള നയതന്ത്ര ബന്ധം മെച്ചപ്പെടുന്ന സാഹചര്യത്തിലും വിദ്യാർത്ഥികളുടെ വിദേശപഠന ലക്ഷ്യങ്ങളിൽ കാനഡയുടെ മുൻഗണന കുറഞ്ഞുവരികയാണ്.
ബയോകെമിസ്ട്രി വിദ്യാർത്ഥിനിയായ മുസ്കാൻ താക്കൂർ കാനഡയിലെ സർവകലാശാലകളെ ഒഴിവാക്കി നോർവേയിലെ വിദ്യാഭ്യാസ സ്ഥാപനങ്ങൾ പരിഗണിക്കുകയാണ്. പഠനം പൂർത്തിയാക്കിയ ശേഷം കാനഡയിൽ അനുയോജ്യമായ ജോലി ലഭിക്കുമെന്ന ഉറപ്പില്ലാത്തതും സുരക്ഷയെക്കുറിച്ചുള്ള ആശങ്കകളുമാണ് തീരുമാനത്തിന് പിന്നിലെ പ്രധാന കാരണങ്ങളായി അവർ ചൂണ്ടിക്കാട്ടുന്നത്.
കാനഡയും ഇന്ത്യയും തമ്മിലുള്ള നയതന്ത്ര ബന്ധത്തിലെ മുൻകാല പ്രതിസന്ധികളും തുടർന്നുണ്ടായ കുടിയേറ്റ നയങ്ങളിലെ മാറ്റങ്ങളും ഇന്ത്യൻ വിദ്യാർത്ഥികളുടെ തീരുമാനങ്ങളെ സ്വാധീനിച്ചിട്ടുണ്ടെന്നാണ് വിലയിരുത്തൽ. ഇതിന്റെ പ്രതിഫലനം കനേഡിയൻ വിദ്യാഭ്യാസ മേഖലയിലും പ്രകടമായേക്കാം. ഇന്ത്യൻ വിദ്യാർത്ഥികൾ പ്രധാന വരുമാന സ്രോതസ്സായ നിരവധി സർവകലാശാലകൾക്ക് ഈ പ്രവണത സാമ്പത്തിക വെല്ലുവിളികൾ സൃഷ്ടിക്കുമെന്ന ആശങ്കയും ഉയരുന്നുണ്ട്.
