ടെൽ അവീവ്: ഇസ്രയേലിൽ പുതിയ സർക്കാർ രൂപീകരണത്തിനുള്ള ചർച്ചകൾ പുരോഗമിക്കുന്നതിനിടെ പ്രധാനമന്ത്രി ബെഞ്ചമിൻ നെതന്യാഹുവിന് സ്വന്തം സഖ്യകക്ഷിയിൽ നിന്ന് തിരിച്ചടി. പ്രധാനമന്ത്രി സ്ഥാനത്തേക്ക് നെതന്യാഹുവിനെ ശുപാർശ ചെയ്യില്ലെന്ന് യുണൈറ്റഡ് തോറ ജൂദായിസം സഖ്യത്തിലെ ദേഗൽ ഹാതോറ പാർട്ടി വ്യക്തമാക്കി. പ്രതിപക്ഷ നേതാവായ ഗാഡി ഐസൻകോട്ടിനും പിന്തുണ നൽകില്ലെന്നാണ് പാർട്ടിയുടെ നിലപാട്.
ഹരേദി വിഭാഗത്തിൽപ്പെട്ട ജൂത പുരുഷന്മാരെ നിർബന്ധിത സൈനിക സേവനത്തിൽ നിന്ന് ഒഴിവാക്കുന്നതിനുള്ള നിയമനിർമാണം നടത്താൻ നെതന്യാഹു സർക്കാരിന് സാധിക്കാത്തതാണ് സഖ്യകക്ഷിയുടെ അതൃപ്തിക്ക് പ്രധാന കാരണം. ഇതോടെ തീവ്ര യാഥാസ്ഥിതിക വിഭാഗങ്ങളിലെ വിവിധ സംഘടനകൾ നെതന്യാഹുവിനെതിരെ നിലപാട് കടുപ്പിച്ചിരുന്നു. ഇതേ വിഷയമാണ് ദേഗൽ ഹാതോറ പാർട്ടിയും ചൂണ്ടിക്കാട്ടുന്നതെന്ന് ‘ദി ടൈംസ് ഓഫ് ഇസ്രായേൽ’ റിപ്പോർട്ട് ചെയ്തു.
നെതന്യാഹുവിന്റെ പിന്തുണ 49 ആയി കുറഞ്ഞേക്കും
യുണൈറ്റഡ് തോറ ജൂദായിസം സഖ്യത്തിന് ഏഴ് പാർലമെന്റ് അംഗങ്ങളാണുള്ളത്. ഇതിൽ നാലുപേരും ദേഗൽ ഹാതോറ പാർട്ടിയിൽ നിന്നുള്ളവരാണ്. പാർട്ടിയുടെ പിന്തുണ പിൻവലിക്കുന്നതോടെ നെതന്യാഹുവിന്റെ സഖ്യത്തിന് ലഭിക്കുന്ന പിന്തുണ 49 ആയി കുറയുമെന്നാണ് കണക്കുകൂട്ടൽ.
120 അംഗ ക്‌നെസറ്റിൽ സർക്കാർ രൂപീകരിക്കാൻ കുറഞ്ഞത് 61 അംഗങ്ങളുടെ പിന്തുണ ആവശ്യമാണ്. അതിനാൽ നെതന്യാഹുവിന് കേവല ഭൂരിപക്ഷം ഉറപ്പാക്കുക കൂടുതൽ പ്രയാസകരമാകും.
ഐസൻകോട്ടിന് റആം പാർട്ടിയുടെ പിന്തുണ
അതിനിടെ, അറബ് രാഷ്ട്രീയ സഖ്യത്തിലെ റആം പാർട്ടി പ്രതിപക്ഷ നേതാവ് ഗാഡി ഐസൻകോട്ടിന് പിന്തുണ പ്രഖ്യാപിച്ചു. എട്ട് അംഗങ്ങളുള്ള റആം പാർട്ടി, പുതിയ സർക്കാർ രൂപീകരിക്കാൻ ഐസൻകോട്ടിനെ ശുപാർശ ചെയ്യുമെന്ന് വ്യക്തമാക്കി.
ഇസ്രായേൽ പ്രസിഡന്റ് ഐസക് ഹെർസോഗുമായുള്ള കൂടിക്കാഴ്ചയ്ക്ക് മുന്നോടിയായാണ് പാർട്ടി നിലപാട് അറിയിച്ചത്. സർക്കാർ രൂപീകരണവുമായി ബന്ധപ്പെട്ട് വിവിധ രാഷ്ട്രീയ പാർട്ടികൾ പ്രസിഡന്റുമായി കൂടിക്കാഴ്ച നടത്തിവരികയാണ്.
ആർക്കും കേവല ഭൂരിപക്ഷമില്ല
120 അംഗ ക്‌നെസറ്റിലേക്ക് നടന്ന തിരഞ്ഞെടുപ്പിൽ ഒരു മുന്നണിക്കും കേവല ഭൂരിപക്ഷം നേടാനായിരുന്നില്ല. നെതന്യാഹുവിന്റെ ലിക്കുഡ് പാർട്ടിയുടെ നേതൃത്വത്തിലുള്ള സഖ്യത്തിന് 53 സീറ്റും മുൻ സൈനിക മേധാവി ഗാഡി ഐസൻകോട്ടിന്റെ നേതൃത്വത്തിലുള്ള പ്രതിപക്ഷ സഖ്യത്തിന് 48 സീറ്റുമാണ് ലഭിച്ചത്.
19 സീറ്റുകൾ നേടിയ അറബ് പാർട്ടികളാണ് സർക്കാർ രൂപീകരണത്തിൽ നിർണായക ശക്തിയായി മാറിയത്. ഇവരുടെ പിന്തുണ പ്രതിപക്ഷ സഖ്യത്തിന് ലഭിച്ചാൽ ഐസൻകോട്ടിന് സർക്കാർ രൂപീകരണത്തിനുള്ള സാധ്യത വർധിക്കും. എന്നാൽ പിന്തുണ സംബന്ധിച്ച് അന്തിമ ധാരണയായിട്ടില്ല.
രാഷ്ട്രീയ സഖ്യങ്ങൾക്കിടയിലെ ചർച്ചകൾ പരാജയപ്പെട്ടാൽ ഇസ്രയേലിൽ വീണ്ടും തിരഞ്ഞെടുപ്പ് നടത്തേണ്ട സാഹചര്യമുണ്ടാകാം. നെതന്യാഹുവിന്റെ രാഷ്ട്രീയ ഭാവിയും പുതിയ സർക്കാർ രൂപീകരണവും ഇപ്പോൾ നിർണായക ഘട്ടത്തിലാണ്.
