സെന്റ് ജോൺസ്: കാനഡയിലെ പ്രമുഖ ഫെറി സർവീസ് കമ്പനിയായ മറൈൻ അറ്റ്‌ലാന്റിക്കിൽ വൻ യാത്രാ തിരക്ക്. വരാനിരിക്കുന്ന 2027-ലെ സമ്മർ സീസണിലേക്കുള്ള മുൻകൂർ ബുക്കിങ്ങുകളിൽ 32 ശതമാനത്തിന്റെ വൻ വർധനവാണ് രേഖപ്പെടുത്തിയിരിക്കുന്നത്. ന്യൂഫിൻലൻഡ് ആൻഡ് ലാബ്രഡോറിനെയും നോവസ്കോഷയെയും ബന്ധിപ്പിക്കുന്ന ഈ സർവീസുകളിൽ ഇതിനകം തന്നെ 51,000-ത്തിലധികം ബുക്കിങ്ങുകൾ പൂർത്തിയായിക്കഴിഞ്ഞു. കനേഡിയൻ പ്രധാനമന്ത്രി മാർക്ക് കാർണിയുടെ തിരഞ്ഞെടുപ്പ് വാഗ്ദാനത്തിന്റെ ഭാഗമായി കഴിഞ്ഞ വർഷം ഫെറി നിരക്കുകൾ വെട്ടിക്കുറച്ചതാണ് യാത്രക്കാരുടെ എണ്ണം ഇത്രയധികം വർധിക്കാൻ പ്രധാന കാരണം.
പ്രതിസന്ധിയിലായി ചരക്കുഗതാഗത മേഖല
യാത്രക്കാരുടെ എണ്ണം റെക്കോർഡുകൾ ഭേദിക്കുമ്പോഴും, പ്രവിശ്യയിലെ ചരക്കുഗതാഗത മേഖല കടുത്ത പ്രതിസന്ധി നേരിടുകയാണ്. ഫെറി ടെർമിനലുകളിൽ ട്രക്കുകൾക്ക് 20 മുതൽ 24 മണിക്കൂർ വരെ കാത്തുനിൽക്കേണ്ടി വരുന്നത് ബിസിനസ്സുകളുടെ ലാഭക്ഷമതയെ ബാധിക്കുന്നതായി അകിത എക്യുപ്‌മെന്റ് ഉടമ ക്രിസ് ഹൗലറ്റ് വ്യക്തമാക്കുന്നു. ലിറ്ററിന് 2.70 ഡോളർ വരെ ഉയർന്ന ഇന്ധനവിലയും കാത്തുനില്പും ട്രക്കിങ് കമ്പനികൾക്ക് വലിയ സാമ്പത്തിക നഷ്ടമുണ്ടാക്കുന്നുണ്ട്.
അധികൃതരോട് അടിയന്തര ഇടപെടലിന് ആവശ്യം
പ്രശ്നം പരിഹരിക്കാൻ ഫെഡറൽ ഗവൺമെന്റ് അടിയന്തരമായി ഇടപെടണമെന്ന് ‘എൻ.എൽ ഗൾഫ് ഫെറി കോയലിഷൻ’ (NL Gulf Ferry Coalition) ആവശ്യപ്പെട്ടു. നിലവിൽ സർവീസ് അവസാനിപ്പിക്കാൻ ഒരുങ്ങുന്ന, 1991-ൽ നിർമ്മിച്ച ‘എംവി ലീഫ് എറിക്സൺ’ (MV Leif Ericson) എന്ന പഴയ ഫെറി കപ്പൽ തൽക്കാലം സർവീസിൽ തന്നെ നിലനിർത്തണമെന്നാണ് ഇവരുടെ പ്രധാന ആവശ്യം. ടൂറിസത്തിന് പുറമെ, പ്രവിശ്യയിലെ ആരോഗ്യ സംരക്ഷണം, ചില്ലറ വ്യാപാരം എന്നിവയുടെ ജീവനാഡിയാണ് ഈ ഫെറി സർവീസുകൾ.
ഫെറി നിരക്കുകൾ കുറച്ചതിലൂടെ യാത്രക്കാരുടെ എണ്ണം വർധിച്ചെങ്കിലും അതിനനുസരിച്ച് സർവീസ് ശേഷി വർധിപ്പിക്കാത്തത് പ്രതിസന്ധി രൂക്ഷമാക്കുന്നുവെന്നാണ് വ്യവസായ മേഖലയിലുള്ളവരുടെ വിലയിരുത്തൽ. അടുത്ത വേനൽക്കാലത്തെ തിരക്ക് മുന്നിൽക്കണ്ട് കൂടുതൽ കപ്പലുകളും സർവീസുകളും ഉറപ്പാക്കണമെന്ന ആവശ്യവും ശക്തമാകുകയാണ്.
