ടൊറന്റോ: ടൊറന്റോയിലെ എറ്റോബിക്കോക്കിൽ പൊലീസ് വാഹനങ്ങളിൽ കാർ ഇടിച്ചുകയറ്റി രക്ഷപ്പെടാൻ ശ്രമിച്ച രണ്ട് യുവാക്കളെ പൊലീസ് അറസ്റ്റ് ചെയ്തു. ഇന്ന് പുലർച്ചെയാണ് നാടകീയമായ സംഭവങ്ങൾ അരങ്ങേറിയത്. ഏറ്റുമുട്ടലിനിടെ ഒരു പൊലീസ് ഉദ്യോഗസ്ഥന് പരുക്കേറ്റു.
മാർട്ടിൻ ഗ്രോവ് റോഡ് (Martin Grove Road), ആൽബിയോൺ റോഡ് (Albion Road) എന്നീ പ്രദേശങ്ങൾക്ക് സമീപം തോക്കുമായി ഒരാൾ നിൽക്കുന്നുണ്ടെന്ന വിവരം ലഭിച്ചതിനെത്തുടർന്ന് പുലർച്ചെ 1:50-ഓടെയാണ് ടൊറന്റോ പൊലീസ് സ്ഥലത്തെത്തിയത്. പ്രദേശത്ത് നടത്തിയ തിരച്ചിലിൽ പ്രതികൾ സഞ്ചരിച്ചിരുന്ന വാഹനം പൊലീസ് കണ്ടെത്തി.
തുടർന്ന് പൊലീസ് വാഹനം തടയാൻ ശ്രമിച്ചതോടെ, അറസ്റ്റ് ഒഴിവാക്കാനായി പ്രതികൾ ഒന്നിലധികം പൊലീസ് വാഹനങ്ങളിൽ കാർ മനഃപൂർവ്വം ഇടിച്ചുകയറ്റി കടന്നുകളയാൻ ശ്രമിക്കുകയായിരുന്നു. വാഹനങ്ങൾ കൂട്ടിയിടിച്ചതിനെത്തുടർന്നാണ് ഒരു പൊലീസ് ഉദ്യോഗസ്ഥന് പരുക്കേറ്റത്. ഇദ്ദേഹത്തെ ഉടൻ തന്നെ ആശുപത്രിയിൽ പ്രവേശിപ്പിച്ചു. ഉദ്യോഗസ്ഥന്റെ പരുക്ക് ഗുരുതരമല്ലെന്ന് അധികൃതർ അറിയിച്ചു.
അപകടത്തിന് പിന്നാലെ കാർ ഉപേക്ഷിച്ച് ഓടി രക്ഷപ്പെടാൻ ശ്രമിച്ച പ്രതികളെ പൊലീസ് പിന്തുടർന്നു. ഫിഞ്ച് അവന്യൂ വെസ്റ്റ് (Finch Avenue West), കിപ്ലിംഗ് അവന്യൂ (Kipling Avenue) എന്നീ പ്രദേശങ്ങളിൽ നിന്നാണ് രണ്ട് പ്രതികളെയും പിടികൂടിയത്. യുവാക്കളുടെ പക്കൽ നിന്നും ഒരു തോക്കും പൊലീസ് കണ്ടെത്തിയിട്ടുണ്ട്.
സംഭവത്തിൽ പൊലീസ് വിശദമായ അന്വേഷണം ആരംഭിച്ചിട്ടുണ്ട്. പ്രതികൾക്കെതിരെ വിവിധ വകുപ്പുകൾ പ്രകാരം കേസെടുത്തിട്ടുണ്ടെന്നും കൂടുതൽ വിവരങ്ങൾ അന്വേഷണത്തിന് ശേഷം പുറത്തുവിടുമെന്നും ടൊറന്റോ പൊലീസ് വ്യക്തമാക്കി.
