Thursday, November 19, 2026

ടൊറന്റോയില്‍ പുതിയ സിന്തറ്റിക് ലഹരിമരുന്ന് കണ്ടെത്തി; ആശങ്കയില്‍ ആരോഗ്യവിദഗ്ധര്‍

ടൊറന്റോ: ടൊറന്റോയിലെ അനധികൃത ലഹരിമരുന്ന് വിപണിയില്‍ വിതരണം ചെയ്യുന്ന ഫെന്റനൈല്‍ (Fentanyl) സാമ്പിളുകളില്‍, പുതിയ വിഭാഗത്തില്‍പ്പെട്ട അതീവ വീര്യമുള്ള സിന്തറ്റിക് ഒപിയോയിഡ് (Designer Drug) കണ്ടെത്തിയതായി റിപ്പോര്‍ട്ട്. ഈ വര്‍ഷം നഗരത്തിലെ ഫെന്റനൈല്‍ ശേഖരത്തില്‍ നിന്ന് കണ്ടെത്തുന്ന ആറാമത്തെ പുതിയ രാസവസ്തുവാണിതെന്ന് ടൊറന്റോയിലെ ‘ഡ്രഗ് ചെക്കിംഗ് സര്‍വീസ്’ (Toronto’s Drug Checking Service) അറിയിച്ചു. കാനഡയില്‍ രൂക്ഷമായി തുടരുന്ന അമിത ലഹരിമരുന്ന് ഉപയോഗം മൂലമുള്ള മരണങ്ങള്‍ക്ക് (Overdose Crisis) പിന്നില്‍ ഇത്തരത്തില്‍ ലഹരിമരുന്നുകളില്‍ കലര്‍ത്തുന്ന പുതിയ രാസവസ്തുക്കളാണെന്ന ആശങ്ക ശക്തമായിരിക്കുകയാണ്.

ഒക്ടോബറില്‍ ശേഖരിച്ച നാല് ഫെന്റനൈല്‍ സാമ്പിളുകളിലാണ് പുതിയ മരുന്ന് ആദ്യമായി കണ്ടെത്തിയത്. ഇതിന് ഇതുവരെ പൊതുവായ ഒരു പേര് പോലും നല്‍കിയിട്ടില്ലെന്ന് സെന്റ് മൈക്കിള്‍സ് ഹോസ്പിറ്റലിന് കീഴില്‍ പ്രവര്‍ത്തിക്കുന്ന ഡ്രഗ് ചെക്കിംഗ് സര്‍വീസ് എക്‌സിക്യൂട്ടീവ് ഡയറക്ടര്‍ കാരെന്‍ മക്‌ഡൊണാള്‍ഡ് പറഞ്ഞു. ‘എന്‍-ഫെനെതൈല്‍-5-ക്ലോറോ നോര്‍-ഓര്‍ഫിന്‍’ (N’-Phenethyl-5-chloro nor-orphine) അല്ലെങ്കില്‍ ‘എന്‍-ഫെനെതൈല്‍-6-ക്ലോറോ നോര്‍-ഓര്‍ഫിന്‍’ (N’-Phenethyl-6-chloro nor-orphine) എന്നിവയിലൊന്നാണിത്. രാസഘടനയില്‍ ഏറെ സാമ്യമുള്ളതിനാല്‍ ഇവ രണ്ടും തമ്മില്‍ വേര്‍തിരിച്ചറിയാന്‍ നിലവില്‍ സാധിച്ചിട്ടില്ല. വന്‍കൂവറിലും ഇതേ മരുന്ന് കണ്ടെത്തിയിട്ടുണ്ട്.

അജ്ഞാതമായ വീര്യവും പാര്‍ശ്വഫലങ്ങളും

ആഗോളതലത്തില്‍ ലഹരിവിരുദ്ധ ഏജന്‍സികള്‍ നിരീക്ഷിച്ചുവരുന്ന ‘ഓര്‍ഫിന്‍’ (Orphine) വിഭാഗത്തില്‍പ്പെട്ട മരുന്നാണിത്. കഴിഞ്ഞ വര്‍ഷം അവസാനത്തോടെ, ഫെന്റനൈലിനേക്കാള്‍ പത്തിരട്ടി വീര്യമുണ്ടെന്ന് കരുതപ്പെടുന്ന ‘സൈക്ലോര്‍ഫിന്‍’ (Cychlorphine) എന്ന ഓര്‍ഫിന്‍ മരുന്ന് ടൊറന്റോയില്‍ കണ്ടെത്തിയിരുന്നു. എന്നാല്‍ ഒക്ടോബറില്‍ കണ്ടെത്തിയ പുതിയ മരുന്നിനെക്കുറിച്ച് യാതൊരു ഗവേഷണങ്ങളും നടന്നിട്ടില്ലാത്തതിനാല്‍ ഇതിന്റെ വീര്യമോ ശരീരത്തിലുണ്ടാക്കുന്ന പ്രത്യാഘാതങ്ങളോ വ്യക്തമല്ലെന്ന് മക്‌ഡൊണാള്‍ഡ് വ്യക്തമാക്കി. അനിയന്ത്രിതമായ ഫെന്റനൈല്‍ വിപണി എത്രത്തോളം അപകടകരമായ രീതിയിലാണ് മാറിക്കൊണ്ടിരിക്കുന്നതെന്നതിന്റെ തെളിവാണിതെന്നും അവര്‍ കൂട്ടിച്ചേര്‍ത്തു.

മറ്റ് മരുന്നുകളുമായുള്ള രാസപ്രവര്‍ത്തനം അപകടകരം

പുതിയ ഓര്‍ഫിന്‍ മരുന്ന് മറ്റ് ലഹരിമരുന്നുകളുമായി ചേരുമ്പോള്‍ എങ്ങനെയാണ് പ്രവര്‍ത്തിക്കുക എന്നതില്‍ ആശങ്കയുണ്ടെന്ന് സെന്റര്‍ ഫോര്‍ അഡിക്ഷന്‍ ആന്‍ഡ് മെന്റല്‍ ഹെല്‍ത്തിലെ (CAMH) ലാബ് ഡയറക്ടര്‍ ക്രിസ്റ്റ്യാന സ്റ്റെഫാന്‍ പറഞ്ഞു. ആഴ്ചകള്‍ നീണ്ട സങ്കീര്‍ണ്ണമായ പരിശോധനകള്‍ക്കൊടുവിലാണ് സ്റ്റെഫാനും സംഘവും ഈ പുതിയ രാസവസ്തുവിനെ തിരിച്ചറിഞ്ഞത്.

ടൊറന്റോയില്‍ ഫെന്റനൈല്‍ എന്ന പേരില്‍ വില്‍ക്കപ്പെടുന്ന ലഹരിമരുന്നുകളില്‍ 96 ശതമാനത്തിലും മൃഗങ്ങള്‍ക്ക് നല്‍കുന്ന മയക്കുമരുന്നുകളോ (Veterinary Tranquillizers) സാനാക്‌സ് (Xanax) പോലുള്ള ബെന്‍സോഡിയാസെപൈനുകളോ കലര്‍ന്നിട്ടുണ്ടെന്ന് റിപ്പോര്‍ട്ട് വ്യക്തമാക്കുന്നു. 83 ശതമാനം സാമ്പിളുകളില്‍ ഒന്നിലധികം വീര്യം കൂടിയ ഒപിയോയിഡുകള്‍ അടങ്ങിയിട്ടുണ്ട്.

മരണനിരക്കും ലഹരി മാഫിയയുടെ തന്ത്രങ്ങളും

കാനഡയിലുടനീളം ഒന്നിലധികം ലഹരിമരുന്നുകള്‍ ഉള്ളില്‍ച്ചെന്ന് മരിക്കുന്നവരുടെ എണ്ണം വര്‍ദ്ധിച്ചുവരികയാണ്. പബ്ലിക് ഹെല്‍ത്ത് ഏജന്‍സി ഓഫ് കാനഡയുടെ കണക്കനുസരിച്ച്, 2018-ല്‍ മൂന്നോ അതിലധികമോ രാസവസ്തുക്കള്‍ കലര്‍ന്ന ലഹരിമരുന്ന് ഉപയോഗിച്ച് മരിച്ചവരുടെ നിരക്ക് 20 ശതമാനമായിരുന്നത് (491 മരണങ്ങള്‍) 2023 ആയപ്പോഴേക്കും 42 ശതമാനമായി (1,500-ലധികം മരണങ്ങള്‍) ഉയര്‍ന്നു.

നിയമനടപടികള്‍ കര്‍ശനമാകുമ്പോള്‍ ചെലവ് കുറയ്ക്കാനും പിടിക്കപ്പെടാതിരിക്കാനും ലഹരി നിര്‍മ്മാതാക്കള്‍ നിരന്തരം പുതിയ രാസക്കൂട്ടുകള്‍ പരീക്ഷിക്കുകയാണെന്ന് വിദഗ്ധര്‍ ചൂണ്ടിക്കാട്ടുന്നു. ഹെറോയിന് പകരം ഫെന്റനൈല്‍ വിപണി കീഴടക്കിയതോടെ ലോകത്തിന്റെ വിവിധ ഭാഗങ്ങളിലുള്ള രഹസ്യ ലാബുകളില്‍ ആര്‍ക്കും ഇവ നിര്‍മ്മിക്കാമെന്ന അവസ്ഥ വന്നതായി സെന്റ് മൈക്കിള്‍സ് ഹോസ്പിറ്റലിലെ എപ്പിഡെമിയോളജിസ്റ്റ് ഡാന്‍ വെര്‍ബ് പറഞ്ഞു.

ഉപഭോക്താക്കളുടെ പ്രതികരണത്തിനനുസരിച്ച് മരുന്നിന്റെ വീര്യം കൂട്ടുകയും കുറയ്ക്കുകയും ചെയ്യുന്ന തന്ത്രമാണ് ലഹരി മാഫിയ പയറ്റുന്നത്. ഫെന്റനൈലിനേക്കാള്‍ 100 മടങ്ങ് വീര്യമുള്ള ‘കാര്‍ഫെന്റനൈല്‍’ (Carfentanil) 2019-ല്‍ 20 ശതമാനം മരണങ്ങള്‍ക്ക് കാരണമായിരുന്നെങ്കിലും, മരണനിരക്ക് കൂടിയതോടെ നിര്‍മ്മാതാക്കള്‍ ഇതിന്റെ ഉപയോഗം കുറച്ചതിനാല്‍ 2024-ല്‍ ഇത് മൂന്ന് ശതമാനമായി താഴ്ന്നിരുന്നു. 2023-ന് ശേഷം കാനഡയില്‍ അമിത ലഹരിമരുന്ന് ഉപയോഗം മൂലമുള്ള മരണങ്ങളില്‍ നേരിയ കുറവ് രേഖപ്പെടുത്തിയിരുന്നെങ്കിലും, ‘ഓര്‍ഫിന്‍’ പോലുള്ള അതിതീവ്ര ലഹരിമരുന്നുകളുടെ വരവ് എപ്പോള്‍ വേണമെങ്കിലും സ്ഥിതിഗതികള്‍ വീണ്ടും വഷളാക്കിയേക്കാമെന്ന് ഡാന്‍ വെര്‍ബ് മുന്നറിയിപ്പ് നല്‍കുന്നു.

Advertisement

Stay Connected
16,985FansLike
2,458FollowersFollow
61,453SubscribersSubscribe
Must Read
Related News
error: Content is protected !!