ഉക്രെയ്‌നിൽ തുടരുന്ന റഷ്യൻ ആക്രമണത്തിന് മറുപടിയായി റഷ്യയ്‌ക്കെതിരെ കൂടുതൽ ഉപരോധം ഏർപ്പെടുത്തിയതായി വിദേശകാര്യ മന്ത്രി മെലാനി ജോളി പ്രഖ്യാപിച്ചു. 2022 ഫെബ്രുവരി 24-ന് റഷ്യ നടത്തിയ ആക്രമണത്തിന് ശേഷം, ഗ്ലോബൽ അഫയേഴ്സ് കാനഡയുടെ കണക്കനുസരിച്ച്, “റഷ്യ, ഉക്രെയ്ൻ, ബെലാറസ് എന്നിവിടങ്ങളിൽ നിന്നുള്ള 1,600-ലധികം വ്യക്തികൾക്കും സ്ഥാപനങ്ങൾക്കും” കാനഡ ഉപരോധം ഏർപ്പെടുത്തിയിട്ടുണ്ടെന്നും മന്ത്രി വ്യക്തമാക്കി.
സർക്കാർ ഉടമസ്ഥതയിലുള്ള മീഡിയ കമ്പനിയായ എംഐഎ റോസിയ സെഗോഡ്നിയ, യുണൈറ്റഡ് വേൾഡ് ഇന്റർനാഷണൽ ആൻഡ് ഫൗണ്ടേഷൻ ഫോർ ദ ഫൈറ്റ് എഗൻസ്റ്റ് റീപ്രെഷൻ, റഷ്യൻ ഗായകനും ടിവി അവതാരകനുമായ നിക്കോളായ് വിക്ടോറോവിച്ച് ബാസ്കോവ് എന്നിവർക്കാണ് പുതിയ ഉപരോധം ഏർപ്പെടുത്തിയത്.
“റഷ്യ തെറ്റായ വാർത്തകൾ പങ്കുവെയ്ക്കുന്നതിലൂടെ ദശലക്ഷക്കണക്കിന് ആളുകൾ ദുരിതമനുഭവിച്ചിട്ടുണ്ടെന്ന് വിദേശകാര്യ മന്ത്രി മെലാനി ജോളി പറഞ്ഞു. “പ്രസിഡന്റ് പുടിൻ പൊതുജനാഭിപ്രായം കൈകാര്യം ചെയ്യാൻ ശ്രമിക്കുകയാണ്. തെറ്റായ വിവരങ്ങളും കുപ്രചരണങ്ങളും നടത്തുന്നവരെ ശിക്ഷാനടപടികളില്ലാതെ പ്രവർത്തിക്കാൻ കാനഡ അനുവദിക്കില്ലെന്നും കാനഡ ഉക്രെയ്നിനൊപ്പം നിൽക്കുമെന്നും മെലാനി ജോളി വ്യക്തമാക്കി.
പ്രസിഡന്റ് വ്‌ളാഡിമിർ പുടിന്റെ ഉക്രെയ്‌നിലെ യുദ്ധം “നുണകളുടെയും വഞ്ചനയുടെയും അടിസ്ഥാനത്തിലാണെന്ന്” ഗ്ലോബൽ അഫയേഴ്സ് കാനഡ പറഞ്ഞു. ഉക്രെയ്നിലുടനീളം നടക്കുന്ന അതിക്രമങ്ങളെ ന്യായീകരിക്കാൻ സെലിബ്രിറ്റികളെയും വാർത്താ സ്ഥാപനങ്ങളെയും ഉൾപ്പെടുത്തിയിട്ടുണ്ടെന്നും ഗ്ലോബൽ അഫയേഴ്സ് കാനഡ ആരോപിച്ചു.
റഷ്യയ്‌ക്കെതിരായ പോരാട്ടത്തിൽ സഹായിക്കുന്നതിനായി ഉക്രെയ്‌നിന് നാല് ലെപ്പാർഡ് 2A4 പ്രധാന യുദ്ധ ടാങ്കുകൾ സംഭാവന ചെയ്യുമെന്ന് ഒട്ടാവ കഴിഞ്ഞ മാസം പ്രഖ്യാപിച്ചിരുന്നു.
ഉപരോധങ്ങളോട് മോസ്‌കോ ശക്തമായ രീതിയിൽ പ്രതികരിക്കുമെന്ന് കാനഡയിലെ റഷ്യൻ അംബാസഡർ ഒലെഗ് സ്റ്റെപനോവ് പറഞ്ഞു. “നിലവിലെ കനേഡിയൻ അധികാരികളുടെ എല്ലാ സൗഹൃദപരമല്ലാത്ത നടപടികളോടും ഞങ്ങൾ പ്രതികരിക്കും, അത് ഞങ്ങൾ ഖേദത്തോടെ നോക്കുന്നു,” അദ്ദേഹം റഷ്യയുടെ RIA വാർത്താ ഏജൻസിയോട് പറഞ്ഞു.