വൻകൂവർ: സറേയിലെ ഭവനരഹിതർക്കും പാർപ്പിട ഭീഷണി നേരിടുന്നവർക്കും സ്ഥിരമായ താമസവും മികച്ച സേവനങ്ങളും ഉറപ്പാക്കുന്ന പുതിയ സപ്പോർട്ടീവ് ഹൗസിങ് കെട്ടിടമായ ‘ബെന്റ്ലി പ്ലേസ്’ പ്രവർത്തനമാരംഭിച്ചതായി റിപ്പോർട്ട്. ഗേറ്റ്വേ സ്കൈട്രെയിൻ സ്റ്റേഷന് സമീപം 13559 ബെന്റ്ലി റോഡിലാണ് ആറ് നിലകളുള്ള ഈ സമുച്ചയം നിർമ്മിച്ചിരിക്കുന്നത്. പ്രതിസന്ധി അനുഭവിക്കുന്നവർക്ക് സുരക്ഷിതമായ പാർപ്പിടം നൽകുന്നതിലൂടെ അവരെ മുഖ്യധാരയിലേക്ക് എത്തിക്കാൻ സാധിക്കുമെന്ന് ഭവനകാര്യ മന്ത്രി ക്രിസ്റ്റീൻ ബോയ്ലും എം.എൽ.എ അംന ഷായും ഉദ്ഘാടന വേളയിൽ വ്യക്തമാക്കി.
സറേ കേന്ദ്രമായി പ്രവർത്തിക്കുന്ന ഫീനിക്സ് സൊസൈറ്റിയാണ് ഈ കെട്ടിടത്തിന്റെ പ്രവർത്തനങ്ങൾ നിയന്ത്രിക്കുന്നത്. ഇവിടെ താമസിക്കുന്ന 60 പേർക്ക് 24 മണിക്കൂറും സ്റ്റാഫ് സേവനം, പ്രതിദിന ഭക്ഷണം, ജീവിത നൈപുണ്യ-തൊഴിൽ പരിശീലനങ്ങൾ, ആരോഗ്യ സേവനങ്ങൾ എന്നിവ ലഭ്യമാക്കും. മികച്ച രീതിയിൽ വെളിച്ചം ക്രമീകരിച്ച ചുറ്റുമതിൽ, സിസിടിവി ക്യാമറകൾ, നിയന്ത്രിത പ്രവേശന കവാടം എന്നിവയിലൂടെ താമസക്കാരുടെ സുരക്ഷയും ഇവിടെ ഉറപ്പാക്കിയിട്ടുണ്ട്.
ഫെഡറൽ-പ്രൊവിൻഷ്യൽ സർക്കാരുകൾ, ബിസി ഹൗസിങ്, സറേ സിറ്റി കൗൺസിൽ, ഫീനിക്സ് സൊസൈറ്റി എന്നിവയുടെ സംയുക്ത പങ്കാളിത്തത്തോടെയാണ് ഈ പദ്ധതി യാഥാർത്ഥ്യമായത്. പ്രവിശ്യാ സർക്കാർ 18.5 മില്യൺ ഡോളർ നിർമ്മാണ പ്രവർത്തനങ്ങൾക്കും 2.4 മില്യൺ ഡോളർ വാർഷിക പ്രവർത്തന ചെലവുകൾക്കുമായി അനുവദിച്ചു. സറേയിലെ ഭവന പ്രതിസന്ധിക്ക് പരിഹാരം കാണുന്നതിൽ ഈ സംരംഭം നിർണ്ണായക പങ്കുവഹിക്കുമെന്നാണ് വിലയിരുത്തപ്പെടുന്നത്.
