ടൊറന്റോ: ഫിഫ ലോകകപ്പിന് ആതിഥേയത്വം വഹിക്കുന്ന കാനഡയിലെ പ്രധാന വേദികളായ വൻകൂവറിലെ ബിസി പ്ലേസ് (BC Place), ടൊറന്റോയിലെ ടൊറന്റോ സ്റ്റേഡിയം (BMO Field) എന്നിവിടങ്ങളിൽ നവീകരണ പ്രവർത്തനങ്ങൾ അവസാന ഘട്ടത്തിൽ. ഒരു വർഷത്തിലേറെയായി നടന്നുവരുന്ന നിർമ്മാണ പ്രവർത്തനങ്ങൾ ലോകകപ്പ് ആരംഭിക്കാൻ ഒരു മാസം മാത്രം ബാക്കിനിൽക്കെ പൂർത്തിയാവുന്നു. വൻകൂവറിലെ സ്റ്റേഡിയത്തിൽ കൃത്രിമ പുൽമൈതാനത്തിന് പകരം താൽക്കാലികമായി സ്വാഭാവിക പുല്ല് (Grass playing surface) വെച്ചുപിടിപ്പിക്കുന്ന ക്രമീകരണങ്ങൾ ഉൾപ്പെടെയുള്ളവ കൃത്യസമയത്ത് തന്നെ പൂർത്തിയാകുമെന്ന് അധികൃതർ അറിയിച്ചു.
ടൊറന്റോ സ്റ്റേഡിയത്തിൽ ഫിഫയുടെ മാനദണ്ഡങ്ങൾക്കനുസരിച്ച് കാണികളുടെ എണ്ണം 40,000-ത്തിന് മുകളിൽ എത്തിക്കുന്നതിനായി 17,000 താൽക്കാലിക സീറ്റുകൾ പുതുതായി സ്ഥാപിച്ചു. കഴിഞ്ഞ ശനിയാഴ്ച നടന്ന ഇന്റർ മയാമി – ടൊറന്റോ എഫ്സി മത്സരത്തിനിടെ 44,828 കാണികളെ ഉൾപ്പെടുത്തി ഈ സൗകര്യങ്ങൾ വിജയകരമായി പരീക്ഷിച്ചു. ടൊറന്റോ സ്റ്റേഡിയത്തിന്റെ നവീകരണത്തിനായി 146 മില്യൺ ഡോളറാണ് ചിലവാക്കിയത്. ലോകകപ്പിലെ ആറ് മത്സരങ്ങൾക്കാണ് ഈ സ്റ്റേഡിയം വേദിയാകുന്നത്.
ജൂൺ 11-ന് മെക്സിക്കോയിൽ ആരംഭിക്കുന്ന ലോകകപ്പിൽ മൊത്തം 104 മത്സരങ്ങളാണുള്ളത്. ജൂൺ 12-ന് ടൊറന്റോയിൽ ബോസ്നിയ ഹെർസഗോവിനയ്ക്കെതിരെയാണ് കാനഡയുടെ ആദ്യ മത്സരം. വൻകൂവറിലെ ബിസി പ്ലേസിൽ ഓസ്ട്രേലിയയും തുർക്കിയും തമ്മിലുള്ള പോരാട്ടത്തോടെയാണ് മത്സരങ്ങൾ ആരംഭിക്കുന്നത്. ആധുനിക സാങ്കേതികവിദ്യ ഉപയോഗിച്ച് സ്റ്റേഡിയത്തിനുള്ളിൽ പുൽമൈതാനം പരിപാലിക്കുന്നതിനായി വിദേശ സർവ്വകലാശാലകളിൽ നിന്നുള്ള വിദഗ്ധ സംഘത്തിന്റെ സഹായവും തേടിയിട്ടുണ്ട്.
