ടൊറന്റോ: ജൂലൈ 1 മുതൽ ഒന്റാരിയോയിലെ വാഹന ഇൻഷുറൻസ് പദ്ധതികളിൽ വലിയ മാറ്റങ്ങൾ നിലവിൽ വരുന്നു. ഇതോടെ പോളിസി പുതുക്കുന്ന ഡ്രൈവർമാർക്ക് മുമ്പൊരിക്കലും എടുക്കേണ്ടി വന്നിട്ടില്ലാത്ത ചില നിർണായക തീരുമാനങ്ങൾ ഇനി എടുക്കേണ്ടിവരും.
നിലവിൽ വാഹന ഇൻഷുറൻസിൽ ഉൾപ്പെട്ടിരിക്കുന്ന 12 നിർബന്ധിത ആനുകൂല്യങ്ങളിൽ ഒൻപതെണ്ണം ഇനി മുതൽ ഓപ്ഷണൽ ആനുകൂല്യങ്ങളായിരിക്കും. പ്രീമിയത്തിൽ ചെറിയ തോതിൽ കുറവ് ലഭിച്ചേക്കാമെങ്കിലും അപകടസമയത്ത് വലിയ സാമ്പത്തിക ബാധ്യത നേരിടേണ്ടിവരാമെന്നാണ് ഇൻഷുറൻസ് വിദഗ്ധരുടെ മുന്നറിയിപ്പ്.
ഇൻഷുറൻസ് ബ്യൂറോ ഓഫ് കാനഡയുടെ ഒന്റാരിയോ-അറ്റ്ലാന്റിക് വിഭാഗം വൈസ് പ്രസിഡന്റ് അമണ്ട ഡീന്റെ അഭിപ്രായത്തിൽ, ധനമന്ത്രാലയം വാഹന ഇൻഷുറൻസ് മേഖലയെക്കുറിച്ച് നടത്തിയ അവലോകനങ്ങൾക്ക് ശേഷമാണ് ഈ മാറ്റങ്ങൾ കൊണ്ടുവന്നത്. 2024-ലെ ഒന്റാരിയോ ബജറ്റിലാണ് ഈ നയപരിഷ്കാരത്തെക്കുറിച്ച് ആദ്യമായി പ്രഖ്യാപിച്ചത്.
ഡഗ് ഫോർഡ് സർക്കാർ ഈ മാറ്റം കൊണ്ടുവരുന്നതിലൂടെ വാഹന ഉടമകൾക്ക് കൂടുതൽ തിരഞ്ഞെടുപ്പ് സ്വാതന്ത്ര്യം നൽകുകയാണ് ലക്ഷ്യമെന്ന് വ്യക്തമാക്കിയിട്ടുണ്ട്.
ഇനി ഓപ്ഷണൽ ആനുകൂല്യങ്ങൾ
ജൂലൈ 1 മുതൽ താഴെ പറയുന്ന ആനുകൂല്യങ്ങൾ നിർബന്ധിതമല്ല:
- വരുമാന നഷ്ടപരിഹാരം (Income Replacement Benefits)
- ജോലി ചെയ്യാത്തവർക്കുള്ള ആനുകൂല്യം (Non-earner Benefits)
- പരിചരണച്ചെലവ് (Caregiver Benefits)
- വീട്ടുപണികൾക്കുള്ള സഹായച്ചെലവ് (Housekeeping Benefits)
- സന്ദർശക ചെലവുകൾ (Visitor Expense Benefits)
- വിദ്യാഭ്യാസ നഷ്ടപരിഹാരം (Lost Educational Expenses)
- വ്യക്തിഗത വസ്തുക്കൾക്ക് സംഭവിക്കുന്ന നാശനഷ്ടം
- മരണാനന്തരവും ശവസംസ്കാരവുമായി ബന്ധപ്പെട്ട ആനുകൂല്യങ്ങൾ
അതേസമയം, മെഡിക്കൽ ആനുകൂല്യങ്ങൾ, പുനരധിവാസ (Rehabilitation) ആനുകൂല്യങ്ങൾ, അറ്റൻഡന്റ് കെയർ (Attendant Care) ആനുകൂല്യങ്ങൾ നിർബന്ധിതമായി തുടരും.
എത്ര ലാഭം? അപകടസാധ്യത എത്ര?
ഇപ്പോൾ അപകടത്തെ തുടർന്ന് ജോലിക്ക് പോകാൻ കഴിയാത്തവർക്ക് ആഴ്ചയിൽ 400 ഡോളർ വരെ വരുമാന നഷ്ടപരിഹാരം ലഭിക്കുന്നുണ്ട്. എന്നാൽ ജൂലൈ 1 ന് ശേഷം ഈ പരിരക്ഷ വേണമെങ്കിൽ പ്രത്യേകമായി തിരഞ്ഞെടുക്കേണ്ടിവരും.
റേറ്റ്സ്.സിഎയിലെ ഇൻഷുറൻസ് വിദഗ്ധൻ ഡേവിഡ് മെയറിന്റെ വിലയിരുത്തലിൽ, ചില ആനുകൂല്യങ്ങൾ ഒഴിവാക്കിയാൽ പ്രതിമാസം ഏകദേശം 10 ഡോളറോളം, അഥവാ ശരാശരി പ്രീമിയത്തിന്റെ അഞ്ച് ശതമാനം വരെ ലാഭിക്കാനാകും.
എന്നാൽ, ലഭിക്കുന്ന ലാഭം വളരെ ചെറുതായിരിക്കുമ്പോൾ അപകടസമയത്ത് നേരിടേണ്ടി വരുന്ന സാമ്പത്തിക നഷ്ടം വളരെ വലുതാകാമെന്നും അദ്ദേഹം മുന്നറിയിപ്പ് നൽകുന്നു.
യാത്രക്കാരെയും സൈക്കിൾ യാത്രക്കാരെയും ബാധിക്കപ്പെടും
നിലവിലെ സംവിധാനത്തിൽ അപകടത്തിൽപ്പെടുന്ന യാത്രക്കാർക്കും കാൽനടയാത്രക്കാർക്കും സൈക്കിൾ യാത്രക്കാർക്കും ഉൾപ്പെടെ സമാനമായ ആനുകൂല്യങ്ങൾ ലഭിക്കുന്നുണ്ട്.
പുതിയ മാറ്റത്തിന് ശേഷം, മെഡിക്കൽ, പുനരധിവാസം, അറ്റൻഡന്റ് കെയർ എന്നീ നിർബന്ധിത ആനുകൂല്യങ്ങൾ മാത്രമേ എല്ലാവർക്കും ലഭ്യമാകൂ. വരുമാന നഷ്ടപരിഹാരം പോലുള്ള മറ്റ് ആനുകൂല്യങ്ങൾ ലഭിക്കണമെങ്കിൽ ബന്ധപ്പെട്ട വ്യക്തിക്കും അതിനുള്ള ഇൻഷുറൻസ് പരിരക്ഷ ഉണ്ടായിരിക്കണം.
നിലവിലെ പോളിസികൾക്ക് എന്ത് സംഭവിക്കും?
ജൂലൈ 1 ന് മുമ്പ് പോളിസി പുതുക്കുന്നവർക്ക് ഉടൻ മാറ്റമുണ്ടാകില്ല. അടുത്ത പുതുക്കൽ സമയത്താണ് പുതിയ സംവിധാനമനുസരിച്ച് ആനുകൂല്യങ്ങൾ തിരഞ്ഞെടുക്കേണ്ടത്.
അതേസമയം, ആശുപത്രിയിൽ ചികിത്സയിലായിരിക്കുകയോ വിദേശത്തായിരിക്കുകയോ അല്ലെങ്കിൽ മറ്റ് അസാധാരണ സാഹചര്യങ്ങൾ മൂലം പുതുക്കൽ സമയത്ത് നടപടികൾ സ്വീകരിക്കാൻ കഴിയാതിരിക്കുകയോ ചെയ്താൽ, നിലവിലുള്ള ആനുകൂല്യങ്ങൾ തന്നെ തുടരുമെന്ന് ഇൻഷുറൻസ് രംഗം വ്യക്തമാക്കുന്നു.
വിദഗ്ധരുടെ അഭിപ്രായത്തിൽ, പോളിസി പുതുക്കുന്നതിന് മുമ്പ് ഇൻഷുറൻസ് പ്രതിനിധിയുമായി വിശദമായി ചർച്ച ചെയ്ത് സ്വന്തം സാഹചര്യത്തിന് അനുയോജ്യമായ പരിരക്ഷകൾ തിരഞ്ഞെടുക്കുന്നതാണ് ഏറ്റവും ഉചിതം.
