രണ്ടാഴ്ചയ്ക്കിടെ ആദ്യമായി ഇറാനും യുഎസും പരസ്പരമുള്ള ആക്രമണത്തിനു താൽകാലിക ഇടവേള നൽകി. എങ്കിലും രാജ്യാന്തര വിപണികൾക്ക് ആശ്വസിക്കാൻ വകയില്ല. ഹോർമൂസിനു പുറമെ ചെങ്കടലിലും സംഘർഷം നീണ്ടതാണ് വിപണിയെ ആശങ്കയിലാഴ്ത്തുന്നത്. ഇറാന്റെ പിന്തുണയുള്ള ഹൂതി വിമതർ സൗദി സേനയുമായി ഏറ്റുമുട്ടിയെന്ന വാർത്ത പുറത്തുവന്നത് അടുത്ത ദിവസങ്ങളിൽ ക്രൂഡോയിൽ വില വീണ്ടും ബാരലിന് 100 ഡോളറിനു മുകളിലെത്തിക്കും.
ചെങ്കടൽവഴിയുള്ള എണ്ണനീക്കം തടസ്സപ്പെട്ടെന്ന ആശങ്കയാണ് തിരിച്ചടിയാകുന്നത്. അതിനിടെ, ഇറാനെതിരെ വലിയ ആക്രമണമുണ്ടാകുമെന്നു പ്രഖ്യാപിച്ച ശേഷം ഡോണൾഡ് ട്രംപ് അതിൽനിന്നു പിൻമാറിയത് കൂടുതൽ ശക്തിയോടെ ആക്രമണം നടത്താനാണെന്ന് ഇസ്രയേൽ മാധ്യമങ്ങൾ റിപ്പോർട്ടു ചെയ്യുന്നു. യുഎസ് കൂടുതൽ ശക്തമായി യുദ്ധത്തിലേക്കു തിരിച്ചുവരുമെന്നാണ് ഇസ്രയേൽ വിശ്വസിക്കുന്നത്. യുഎസുമായി ചേർന്ന് ഇസ്രയേൽ വലിയ സൈനികനീക്കത്തിന് ഒരുങ്ങുകയാണെന്നും സമവായത്തിനു കൂടുതൽ സമയം നൽകാനാണ് വെള്ളി, ശനി ദിവസങ്ങളിൽ ആക്രമണത്തിന് അവധി കൊടുത്തതെന്നും റിപ്പോർട്ടുകളുണ്ട്.
ട്രംപിനെ കാണാൻ നെതന്യാഹു ദിവസങ്ങളോളം നീണ്ട അനിശ്ചിതത്വത്തിനു ശേഷം യുഎസ് പ്രസിഡന്റ് ഡോണൾഡ് ട്രംപിനെ കാണാൻ ഇസ്രയേൽ പ്രധാനമന്ത്രി അമേരിക്കയിലെത്തും. കഴിഞ്ഞ ആഴ്ചകളിൽ ട്രംപുമായി കൂടിക്കാഴ്ചയ്ക്ക് സമയം ചോദിച്ചിരുന്നെങ്കിലും അനുമതി ലഭിച്ചിരുന്നില്ല. എന്നാൽ അന്തരിച്ച യുഎസ് സെനറ്റർ ലിൻഡ്സേ ഗ്രഹാമിന്റെ സംസ്കാര ചടങ്ങുകൾക്കെത്തുന്ന നെതന്യാഹു ട്രംപുമായി നിർണായക കൂടിക്കാഴ്ച നടത്തും. ട്രംപ് അധികാരത്തിലെത്തിയ ശേഷം ഇരുനേതാക്കളും നടത്തുന്ന ഏഴാമത്തെ കൂടിക്കാഴ്ചയാണിത്. ഇതിനു മുൻപ് ഇരുവരും കണ്ടപ്പോഴാണ് ഇറാനെ ആക്രമിക്കാനുള്ള സംയുക്ത പദ്ധതി നെതന്യാഹു അവതരിപ്പിച്ചത്.
സമാന പദ്ധതിയുമായാണോ നെതന്യാഹു എത്തുന്നതെന്നാണ് നിക്ഷേപകർ ഉറ്റുനോക്കുന്നത്. ട്രംപിനു മുന്നിൽ രണ്ട് സാധ്യതകൾ അനിശ്ചിതത്വം തുടരും
∙ഇന്ത്യൻ ഓഹരി വിപണി വെള്ളിയാഴ്ച തുടർച്ചയായ അഞ്ചാം ദിവസവും നഷ്ടത്തിൽ ക്ലോസ് ചെയ്തു. പശ്ചിമേഷ്യയിലെ സംഘർഷത്തിൽ നിക്ഷേപകർ ജാഗ്രത പാലിച്ചതാണ് വിപണിയെ നഷ്ടത്തിലാക്കിയത്. കമ്പനികളുടെ ഒന്നാം പാദ ഫലങ്ങൾ പുറത്തു വരുന്നത് നിർണായകമായെങ്കിലും ക്രൂഡോയിൽ വില ബാരലിന് 100 ഡോളറിലേക്ക് എത്തിയതു വിപണിയുടെ ഗതി മാറ്റി.
∙ഉയർന്ന പെട്രോൾ വില പണപ്പെരുപ്പത്തിലേക്ക് നയിക്കുമെന്നും ഇതിനെ നേരിടാൻ റിസർവ് ബാങ്ക് പലിശ നിരക്ക് വർധിപ്പിച്ചേക്കുമെന്നുമാണ് നിക്ഷേപകരുടെ ആശങ്ക. കമ്പനികളുടെ വായ്പാ ഭാരം വർധിക്കാനും ലാഭശതമാനം കുറയ്ക്കാനുമുള്ള സാഹചര്യത്തിലേക്ക് ഇത് നയിച്ചേക്കുമെന്നാണ് മുന്നറിയിപ്പ്. 0.43 ശതമാനം ഇടിഞ്ഞ സെൻസെക്സ് 76,408ലെത്തി. നിഫ്റ്റി 0.43 ശതമാനം ഇടിഞ്ഞ് 23,767ലുമെത്തി. ഒരാഴ്ചയ്ക്കിടെ ഇരുസൂചികകളും 2.5 ശതമാനമാണ് നഷ്ടത്തിലായത്. നാലു മാസത്തിനിടെ ഇങ്ങനെയൊരു നഷ്ടം ഇതാദ്യം.
