ടൊറന്റോ: ടൊറന്റോയിലെ 360 യൂണിവേഴ്സിറ്റി അവന്യൂവിലുള്ള അമേരിക്കൻ കോൺസുലേറ്റിന് നേരെയുണ്ടായ വെടിവെപ്പ് കേസിൽ രണ്ട് പ്രതികളെ അറസ്റ്റ് ചെയ്തതായി ടൊറന്റോ പൊലീസ് അറിയിച്ചു. ഓഗസ്റ്റ് 6-ന് പുറത്തിറക്കിയ അന്വേഷണ വിവരങ്ങൾ പ്രകാരം, 19-കാരനും യുവജന ക്രിമിനൽ ജസ്റ്റിസ് ആക്ട് (YCJA) പ്രകാരം തിരിച്ചറിയൽ വെളിപ്പെടുത്താൻ പാടില്ലാത്ത 15-കാരനുമാണ് കേസിൽ പ്രതികളായിരിക്കുന്നത്.
ജൂലൈ 27-ന് പുലർച്ചെ 4:46-ഓടെയാണ് കോൺസുലേറ്റിന് പുറത്ത് വെടിയുതിർന്നത്. ഡ്യൂട്ടിയിലുണ്ടായിരുന്ന ഒരു പൊലീസ് ഉദ്യോഗസ്ഥൻ വെടിയൊച്ച കേട്ടതിനെ തുടർന്ന്, സംഭവസ്ഥലത്ത് നിന്ന് തെക്കോട്ട് രക്ഷപ്പെടുന്ന പുതിയ മോഡൽ വെളുത്ത ഹോണ്ട അക്കോർഡ് കാർ ശ്രദ്ധയിൽപ്പെട്ടു. പൊലീസ് വാഹനം പിന്തുടർന്നെങ്കിലും പൊതുജനങ്ങളുടെ സുരക്ഷ കണക്കിലെടുത്ത് ഡോൺ വാലി പാർക്വേയ്ക്ക് സമീപം പിന്തുടരൽ അവസാനിപ്പിച്ചു. തുടർന്ന് കോൺസുലേറ്റിന്റെ പ്രധാന പ്രവേശന കവാടത്തിന് മുകളിലെ കൽഭിത്തിയിൽ വെടിയേറ്റതിന്റെ അടയാളങ്ങൾ കണ്ടെത്തി. സംഭവസമയത്ത് സുരക്ഷാ ജീവനക്കാർ കെട്ടിടത്തിനുള്ളിലുണ്ടായിരുന്നെങ്കിലും ആർക്കും പരിക്കേറ്റില്ല. മോഷ്ടിക്കപ്പെട്ടിരുന്ന സംശയാസ്പദ വാഹനം പിന്നീട് സ്കാർബറോയിൽ ഉപേക്ഷിക്കപ്പെട്ട നിലയിൽ കണ്ടെത്തി.
അന്വേഷണത്തിനിടെ, ജൂലൈ 24-ന് കാലിഡണിലെ ഒരു വീടിന്റെ ഡ്രൈവ്വേയിൽ പാർക്ക് ചെയ്തിരുന്ന വാഹനത്തിന് പെട്രോൾ ഒഴിച്ച് തീയിട്ട സംഭവത്തിലും ഇതേ പ്രതികൾക്ക് പങ്കുണ്ടെന്ന് പൊലീസ് ആരോപിക്കുന്നു. ആദ്യം കിംഗ്സ്റ്റൺ റോഡും മക്കോവൻ റോഡും സമീപമുള്ള പെട്രോൾ പമ്പിൽ നിന്ന് ചുവന്ന ജെറി കാനിൽ ഇന്ധനം നിറച്ച ശേഷം, കാലിഡണിലെ ക്വീൻ സ്ട്രീറ്റ് വെസ്റ്റും മിസിസാഗ റോഡും സമീപമുള്ള പ്രദേശത്തെത്തി വാഹനം കത്തിച്ചെന്നാണ് അന്വേഷണത്തിൽ കണ്ടെത്തിയത്. ആ സംഭവത്തിലും ആർക്കും പരിക്കേറ്റിരുന്നില്ല.
പത്തൊമ്പതുകാരനായ പ്രതിക്കെതിരെ മോഷണവാഹനം കൈവശം വച്ചത്, തീകൊളുത്താൻ ഉപയോഗിക്കുന്ന വസ്തുക്കൾ കൈവശം വച്ചത്, അഗ്നിബാധ സൃഷ്ടിച്ചത്, നിറച്ച തോക്ക് കൈവശം വച്ചത്, വിലക്ക് ലംഘിച്ച് ആയുധം കൈവശം വച്ചത്, അന്താരാഷ്ട്ര സംരക്ഷണം ലഭിക്കുന്ന സ്ഥാപനത്തിന് നേരെ ആക്രമണം നടത്തിയതടക്കമുള്ള ഗുരുതര കുറ്റങ്ങൾ ചുമത്തിയിട്ടുണ്ട്. 15-കാരനായ യുവാവിനെതിരെയും സമാന കുറ്റങ്ങളാണ് ചുമത്തിയിട്ടുള്ളത്. യുവജന നിയമപ്രകാരം അദ്ദേഹത്തിന്റെ പേരോ തിരിച്ചറിയൽ വിവരങ്ങളോ പ്രസിദ്ധീകരിക്കാൻ നിയമപരമായ വിലക്കുണ്ട്.
സംഭവത്തെ തുടർന്ന് ടൊറന്റോ പൊലീസിന്റെ ഇന്റഗ്രേറ്റഡ് ഗൺ ആൻഡ് ഗാംഗ് ടാസ്ക് ഫോഴ്സാണ് അന്വേഷണം നയിച്ചത്. കൗണ്ടർ ടെററിസം സെക്യൂരിറ്റി യൂണിറ്റിന്റെയും, റോയൽ കനേഡിയൻ മൗണ്ടഡ് പൊലീസിന്റെയും (RCMP), ഇന്റഗ്രേറ്റഡ് നാഷണൽ സെക്യൂരിറ്റി എൻഫോഴ്സ്മെന്റ് ടീം (INSET)ന്റെയും സഹകരണത്തോടെയാണ് അന്വേഷണം പുരോഗമിക്കുന്നത്. ദേശീയ സുരക്ഷയെ ബാധിക്കുന്ന സംഭവമായാണ് കേസ് പരിഗണിക്കുന്നതെന്ന് അധികൃതർ അറിയിച്ചു.
