ബൊഗോട്ട: കൊളംബിയയിൽ തിങ്കളാഴ്ചയുണ്ടായ ശക്തമായ ഭൂചലനത്തെ തുടർന്ന് മരിച്ചവരുടെ എണ്ണം 164 ആയി. പടിഞ്ഞാറൻ കൊളംബിയയിൽ രക്ഷാപ്രവർത്തനം രണ്ടാം ദിവസവും തുടരുകയാണ്. കെട്ടിടങ്ങൾ തകർന്നുവീണതിനെ തുടർന്ന് നിരവധി പേർ അവശിഷ്ടങ്ങൾക്കിടയിൽ കുടുങ്ങിക്കിടക്കുന്നതായാണ് റിപ്പോർട്ട്. മരണസംഖ്യ ഇനിയും ഉയർന്നേക്കുമെന്നാണ് അധികൃതരുടെ വിലയിരുത്തൽ.
തിങ്കളാഴ്ച പുലർച്ചെയാണ് റിക്ടർ സ്കെയിലിൽ 7.4 തീവ്രത രേഖപ്പെടുത്തിയ ഭൂചലനം കൊളംബിയയിലെ പ്രധാന കാപ്പി ഉൽപാദന മേഖലകളെ പിടിച്ചുകുലുക്കിയത്. പെരെയ്റ, കാലി തുടങ്ങിയ നഗരങ്ങളിൽ ബഹുനില കെട്ടിടങ്ങൾ തകർന്നുവീണു. ചരിത്രപ്രസിദ്ധമായ മനിസാലസ് കത്തീഡ്രലിന്റെ ഒരു ഗോപുരത്തിനും കേടുപാടുകൾ സംഭവിച്ചു.
കാലിയിൽ മാത്രം 85 പേർ മരിച്ചതായാണ് റിപ്പോർട്ട്. ഏകദേശം 22 ലക്ഷം പേർ താമസിക്കുന്ന നഗരത്തിൽ നിരവധി കെട്ടിടങ്ങൾ തകർന്നതായും ചില കെട്ടിടങ്ങൾ അപകടകരമായ രീതിയിൽ ചരിഞ്ഞുനിൽക്കുന്നതായും അധികൃതർ അറിയിച്ചു. ആശുപത്രിയുടെ മുകളിലെ നിലകളിൽ ചിലത് തകർന്നതോടെ നിരവധി രോഗികൾ കുടുങ്ങി. ആശുപത്രിയിലുണ്ടായിരുന്ന 600ഓളം പേരെ പിന്നീട് അവശിഷ്ടങ്ങൾ നിറഞ്ഞ തെരുവിലേക്ക് മാറ്റി.
റിസരാൾഡ സംസ്ഥാനത്തിന്റെ തലസ്ഥാനമായ പെരെയ്റയിൽ 66 പേർ മരിച്ചതായി അധികൃതർ അറിയിച്ചു. നഗരത്തിലെ നിരവധി താമസമേഖലകളിൽ കോൺക്രീറ്റിന്റെയും വളഞ്ഞ ഇരുമ്പുകളുടെയും കൂമ്പാരങ്ങളായി മാറി. ഭൂചലനത്തിനിടെ നഗരത്തിലെ വിമാനത്താവളവും ശക്തമായി കുലുങ്ങി. ആളുകൾ അഭയം തേടുന്നതിനിടെ വിമാനത്താവളത്തിന്റെ മേൽക്കൂരയുടെ വലിയ ഭാഗങ്ങൾ തകർന്നുവീഴുന്ന ദൃശ്യങ്ങളും പുറത്തുവന്നു.
ഭൂചലനത്തിന്റെ പ്രഭവകേന്ദ്രത്തിന് സമീപമുള്ള ഗ്രാമീണ മേഖലയായ ചോക്കോ പ്രവിശ്യയിൽ 13 പേരും മരിച്ചതായി റിപ്പോർട്ടുണ്ട്.
പൊലീസ്, സൈനികർ, സന്നദ്ധപ്രവർത്തകർ എന്നിവരുടെ സഹായത്തോടെയാണ് രക്ഷാപ്രവർത്തനം പുരോഗമിക്കുന്നത്. രാത്രിയിലും എക്സ്കവേറ്ററുകൾ ഉപയോഗിച്ചും ചിലയിടങ്ങളിൽ കൈകൊണ്ടും അവശിഷ്ടങ്ങൾ നീക്കി രക്ഷാപ്രവർത്തകർ ജീവനുള്ളവരെ കണ്ടെത്താനുള്ള ശ്രമം തുടരുകയാണ്.
കാലിയിൽ തകർന്ന കെട്ടിടത്തിൽനിന്ന് ഏഴ് പേരെ രക്ഷാപ്രവർത്തകർ പുറത്തെടുത്തതായി സന്നദ്ധപ്രവർത്തക കാർമെൻ യാസ്മിൻ ഗാർസിയ പറഞ്ഞു. നാല് പേരും ഒരു നായയും ഇപ്പോഴും അവശിഷ്ടങ്ങൾക്കിടയിൽ കുടുങ്ങിക്കിടക്കുന്നതായും അവർ അറിയിച്ചു. രക്ഷാപ്രവർത്തനം ശക്തമാക്കിയതോടെ കൂടുതൽ പേരെ ജീവനോടെ കണ്ടെത്താനാകുമെന്ന പ്രതീക്ഷയിലാണ് അധികൃതർ.
