ഓട്ടവ: കാനഡ വ്യോമസേനയുടെ പുതിയ എയർ ടാങ്കർ വിമാനങ്ങളിൽ ആദ്യത്തേത് 2027 അവസാനത്തോടെ മാത്രമേ ലഭ്യമാകൂ. ആർട്ടിക് മേഖലയിൽ പട്രോളിംഗ് നടത്തുന്ന യുദ്ധവിമാനങ്ങൾക്ക് ആകാശത്തുവെച്ച് ഇന്ധനം നിറയ്ക്കാൻ നിർണായകമായ നാല് പുതിയ Airbus A330 വിമാനങ്ങളാണ് കാനഡ സ്വന്തമാക്കുന്നത്.
പഴയ Airbus A310 വിമാനങ്ങൾക്ക് പകരമായാണ് പുതിയ CC-330 Husky വിമാനങ്ങൾ എത്തിക്കുന്നത്. കാനഡ വ്യോമസേനയുടെ ഇന്റർകോണ്ടിനെന്റൽ ഫ്ലീറ്റിന്റെ പ്രധാന ഘടകമാകുന്ന ഈ വിമാനങ്ങൾ സൈനികരെയും പ്രധാനമന്ത്രിയെയും ഉൾപ്പെടെയുള്ള യാത്രക്കാരെ ദീർഘദൂരങ്ങളിൽ എത്തിക്കുന്നതിനൊപ്പം യുദ്ധവിമാനങ്ങൾക്ക് ആകാശത്തുവെച്ച് ഇന്ധനം നൽകാനും ഉപയോഗിക്കും.
2023 ജൂലൈയിൽ ഏകദേശം 3.6 ബില്യൺ കനേഡിയൻ ഡോളറിനാണ് കാനഡ ഒമ്പത് Airbus A330 വിമാനങ്ങൾ വാങ്ങിയത്. ഇതിൽ അഞ്ച് ഉപയോഗിച്ച വിമാനങ്ങളും നാല് പുതിയ വിമാനങ്ങളുമാണ്. ഉപയോഗിച്ച മൂന്ന് വിമാനങ്ങൾ ഇതിനകം കാനഡയിലെത്തിയിട്ടുണ്ട്. നിലവിൽ യാത്രക്കാരെ കൊണ്ടുപോകുന്നതിനാണ് ഇവ പ്രധാനമായും ഉപയോഗിക്കുന്നത്.
നാലാമത്തെ ഉപയോഗിച്ച വിമാനം സ്വിറ്റ്സർലൻഡിൽ പുതിയ ഇന്റീരിയറും പ്രതിരോധ സംവിധാനങ്ങളും ഘടിപ്പിക്കുന്നതിനുള്ള നവീകരണത്തിലാണ്. അഞ്ചാമത്തെ വിമാനം സ്പെയിനിൽ എയർ ടാങ്കറായി മാറ്റുന്നതിനുള്ള നടപടികളിലാണ്.
അതേസമയം, ആദ്യത്തെ പുതിയ വിമാനവും സ്പെയിനിൽ പരീക്ഷണ ഘട്ടത്തിലാണ്. ശേഷിക്കുന്ന മൂന്ന് പുതിയ വിമാനങ്ങൾ ഫ്രാൻസിലെ ടൂളൂസിൽ നിർമാണത്തിലാണെന്ന് കാനഡ പ്രതിരോധ മന്ത്രാലയം അറിയിച്ചു.
ആർട്ടിക് പ്രതിരോധത്തിൽ നിർണായകം
കാനഡയുടെ CF-18 യുദ്ധവിമാനങ്ങൾക്കും ഭാവിയിൽ എത്തുന്ന F-35 വിമാനങ്ങൾക്കും ആർട്ടിക് മേഖലയിൽ ദീർഘനേരം പട്രോളിംഗ് നടത്താൻ എയർ ടാങ്കറുകളുടെ സഹായം അനിവാര്യമാണ്. ഇന്ധനം വേഗത്തിൽ തീരുന്നതിനാൽ ആകാശത്തുവെച്ച് തന്നെ ഇന്ധനം നിറയ്ക്കുന്നത് യുദ്ധവിമാനങ്ങളുടെ പ്രവർത്തന പരിധിയും ആകാശത്ത് തുടരാനുള്ള സമയവും വർധിപ്പിക്കും.
പുതിയ CC-330 Husky വിമാനങ്ങളിൽ NATO നിലവാരത്തിലുള്ള വിവിധ വിമാനങ്ങൾക്ക് ഇന്ധനം നൽകാൻ ആവശ്യമായ ബൂമും ഹോസ് സംവിധാനങ്ങളും ഉണ്ടായിരിക്കും. നിലവിലെ CC-150 Polaris വിമാനങ്ങൾക്ക് F-35 പോലുള്ള വിമാനങ്ങൾക്ക് ആവശ്യമായ വലിയ ബൂം സംവിധാനമില്ല.
പുതിയ വിമാനങ്ങൾ 2028-2029 ഓടെ പ്രാരംഭ പ്രവർത്തനക്ഷമതയും (IOC) 2032-2033 ഓടെ പൂർണ്ണ പ്രവർത്തനക്ഷമതയും കൈവരിക്കുമെന്നാണ് വ്യോമസേന വ്യക്തമാക്കുന്നത്.
പ്രധാനമന്ത്രിയുടെ പുതിയ വിമാനത്തിനും സുരക്ഷാ സംവിധാനം
പ്രധാനമന്ത്രി മാർക്ക് കാർണിക്കായി ഉപയോഗിക്കാനിരിക്കുന്ന പുതിയ V-VIP Airbus വിമാനവും സ്വിറ്റ്സർലൻഡിൽ നവീകരിച്ചുവരികയാണ്. വിമാനത്തിന് മിസൈൽ ആക്രമണങ്ങളിൽ നിന്ന് സംരക്ഷണം നൽകുന്ന സെൽഫ്-പ്രൊട്ടക്ഷൻ സ്യൂട്ട് (self-protection suite) ഘടിപ്പിക്കുമെന്ന് വ്യോമസേന സ്ഥിരീകരിച്ചു.ഇതിൽ മിസൈലുകളെ പ്രതിരോധിക്കാനോ വഴിതെറ്റിക്കാനോ സഹായിക്കുന്ന ലേസർ, ഫ്ലെയർ തുടങ്ങിയ സംവിധാനങ്ങൾ ഉൾപ്പെടാൻ സാധ്യതയുണ്ട്.
പഴയ വിമാനങ്ങൾ 2030 വരെ തുടരും
പുതിയ CC-330 Husky വിമാനങ്ങൾ പൂർണമായി പ്രവർത്തനക്ഷമമാകുന്നതുവരെ കാനഡയുടെ നിലവിലെ മൂന്ന് CC-150 Polaris വിമാനങ്ങൾ സേവനത്തിൽ തുടരും. ഇവ 1980-കളുടെ അവസാനത്തിൽ യാത്രാവിമാനങ്ങളായി ഉപയോഗിച്ചിരുന്ന Airbus A310 വിമാനങ്ങളാണ്.
2023ൽ ഗ്വാമിൽ പാർക്കിങ് സ്ഥലത്തുണ്ടായ അപകടത്തിൽ മറ്റൊരു A310 തകരാറിലായി ഉപയോഗശൂന്യമായിരുന്നു. ശേഷിക്കുന്ന മൂന്ന് വിമാനങ്ങൾ 2030 വരെ സേവനത്തിൽ തുടരാനാണ് കാനഡയുടെ തീരുമാനം.
