ഒന്റാരിയോ: ഒന്റാരിയോ പ്രാദേശിക തിരഞ്ഞെടുപ്പിനുള്ള നാമനിര്ദ്ദേശ പത്രിക സമര്പ്പിക്കാനുള്ള സമയം അവസാനിക്കാന് മണിക്കൂറുകള് മാത്രം ബാക്കിനില്ക്കെ, ജനപ്രതിനിധികളാകാന് മുന്നോട്ടുവരുന്നവരുടെ എണ്ണത്തിലുണ്ടാകുന്ന കുറവ് കടുത്ത ആശങ്കയ്ക്ക് വഴിവെക്കുന്നു. നിരവധി കൗണ്സില് സീറ്റുകളിലേക്ക് ഒന്നോ അതില് കുറവോ സ്ഥാനാര്ത്ഥികള് മാത്രം രജിസ്റ്റര് ചെയ്ത സാഹചര്യമാണ് നിലവിലുള്ളതെന്ന് വിദഗ്ദ്ധര് ചൂണ്ടിക്കാണിക്കുന്നു.
ഗ്രാമീണ മേഖലകളിലാണ് സ്ഥാനാര്ത്ഥികളുടെ കുറവ് വന്തോതില് ദൃശ്യമാകുന്നത്. കുറഞ്ഞ വേതനം, പ്രതികൂലമായ യോഗ സമയങ്ങള്, വലിയ ഉത്തരവാദിത്തങ്ങള് എന്നിവയാണ് യുവാക്കളും മറ്റ് വിഭാഗങ്ങളും ഇത്തരം പദവികളില് നിന്ന് വിട്ടുനില്ക്കാന് പ്രധാന കാരണമായി ചൂണ്ടിക്കാണിക്കപ്പെടുന്നത്. വലിയ നഗരങ്ങളില് കൗണ്സിലര് പദവി മുഴുവന് സമയ ജോലിയായി മാറിയെങ്കിലും, ചെറിയ കൗണ്സിലുകളില് തുച്ഛമായ അലവന്സ് മാത്രമാണ് ലഭിക്കുന്നത്. ഇതുമൂലം സാമ്പത്തിക ഭദ്രതയുള്ളവര്ക്കും വിരമിച്ചവര്ക്കും മാത്രമാണ് ഇത്തരം ചുമതലകള് ഏറ്റെടുക്കാന് സാധിക്കുന്നത്.
അതേസമയം, പ്രൊവിന്ഷ്യല് സര്ക്കാരിന്റെ പുതിയ നിയമനിര്മ്മാണങ്ങള് പ്രാദേശിക ഭരണകൂടങ്ങളുടെയും സ്കൂള് ബോര്ഡുകളുടെയും അധികാരങ്ങളെ പരിമിതപ്പെടുത്തിയതും സ്ഥാനാര്ത്ഥികളുടെ താല്പര്യക്കുറവിന് കാരണമായിട്ടുണ്ട്. കൂടുതല് ആളുകള് ജനാധിപത്യ പ്രക്രിയയുടെ ഭാഗമാകണമെന്നും പ്രാദേശിക ഭരണത്തില് വൈവിധ്യമുള്ള പ്രതിനിധികള് ഉയര്ന്നുവരണമെന്നും അസോസിയേഷന് ഓഫ് മ്യൂണിസിപ്പാലിറ്റീസ് ഒന്റാരിയോ (AMO) ആവശ്യപ്പെട്ടിട്ടുണ്ട്.
