ടൊറോന്റോ: ഒന്റാരിയോയുടെ വിവിധ ഭാഗങ്ങളിൽ ശക്തമായ ഇടിമിന്നലിനും കനത്ത മഴയ്ക്കും പിന്നാലെ വ്യാപകമായ വെള്ളക്കെട്ട്. കാലിഡൺ , വോൺ മേഖലകളിൽ 130 മില്ലിമീറ്ററിലേറെ മഴ രേഖപ്പെടുത്തിയതായി പരിസ്ഥിതി കാനഡയുടെ റിപ്പോർട്ടുകൾ വ്യക്തമാക്കുന്നു. ശക്തമായ മഴയെ തുടർന്ന് നിരവധി റോഡുകളിൽ വെള്ളം കയറിയതോടെ ഗതാഗതം തടസ്സപ്പെട്ടു.
പ്രവിശ്യയിലെ വിവിധ പ്രദേശങ്ങളിൽ മഴയുടെ തീവ്രതയിൽ വലിയ വ്യത്യാസമുണ്ടായിരുന്നു. ചില കമ്മ്യൂണിറ്റികളിൽ ഏകദേശം 80 മില്ലിമീറ്റർ മഴ രേഖപ്പെടുത്തിയപ്പോൾ, കാലഡണിലും വോണിലും അതിലും ശക്തമായ മഴയാണ് ലഭിച്ചത്. ടൊറോന്റോ ഉൾപ്പെടെയുള്ള മേഖലകളിൽ അണ്ടർപാസുകളിലും താഴ്ന്ന പ്രദേശങ്ങളിലും വെള്ളം കെട്ടിക്കിടന്നു. വെള്ളത്തിൽ കുടുങ്ങിയ വാഹനങ്ങളിലെ യാത്രക്കാരെ രക്ഷപ്പെടുത്താൻ അടിയന്തര സേവന വിഭാഗങ്ങൾ രംഗത്തെത്തി.
ശക്തമായ കാറ്റിനൊപ്പം നിരവധി സ്ഥലങ്ങളിൽ മരങ്ങൾ കടപുഴകി വീഴുകയും വൈദ്യുതി ലൈനുകൾക്ക് കേടുപാടുകൾ സംഭവിക്കുകയും ചെയ്തു. തുടർന്നും മഴയ്ക്ക് സാധ്യതയുള്ളതിനാൽ വെള്ളക്കെട്ടിനും പെട്ടെന്നുള്ള വെള്ളപ്പൊക്കത്തിനും സാധ്യതയുള്ള പ്രദേശങ്ങളിൽ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകി. അനാവശ്യ യാത്രകൾ ഒഴിവാക്കാനും വെള്ളം കയറിയ റോഡുകളിലൂടെയോ അണ്ടർപാസുകളിലൂടെയോ വാഹനമോടിക്കാതിരിക്കാനും പൊതുജനങ്ങളോട് നിർദേശിച്ചിട്ടുണ്ട്.
