വന്കൂവര്: ബ്രിട്ടിഷ് കൊളംബിയ (B.C.) നിയമസഭയിലെ മുന് കണ്സര്വേറ്റീവ് പാര്ട്ടി അംഗങ്ങളായ 5 എം.എല്.എമാര് ചേര്ന്ന് പുതിയ പാര്ട്ടി രൂപീകരിക്കുന്നു. ഭരണകക്ഷിയായ എന്.ഡി.പിക്ക് (NDP) ശക്തമായ ബദലാകുക എന്ന ലക്ഷ്യത്തോടെയാണ് ഈ നീക്കം. പീറ്റര് മിലോബാര്, ഈയാന് പേട്ടണ് എന്നിവര്ക്ക് പുറമെ മുന് കണ്സര്വേറ്റീവ് നേതാക്കളായ റോസലിന് ബേര്ഡ്, ബ്രൂസ് ബാന്മാന്, ആലിയ വാര്ബസ് എന്നിവരാണ് പുതിയ സഖ്യത്തില് ചേര്ന്നത്.
പേര് ഇതുവരെ ഔദ്യോഗികമായി പ്രഖ്യാപിച്ചിട്ടില്ലാത്ത ഈ പാര്ട്ടിക്ക് നിലവില് നിയമസഭയില് 5 സീറ്റുകളുണ്ട്. ഒക്ടോബറില് നടക്കുന്ന കോക്കസ് വോട്ടെടുപ്പ് വരെ പീറ്റര് മിലോബാര് പാര്ട്ടിയുടെ ഇടക്കാല നേതാവായി പ്രവര്ത്തിക്കും. ബ്രിട്ടീഷ് കൊളംബിയയിലെ അധ്വാനിക്കുന്ന ജനങ്ങള്ക്കും വിഭവ വികസനത്തിനും മുന്ഗണന നല്കുന്ന സാമ്പത്തിക ഭദ്രതയുള്ള ഒരു രാഷ്ട്രീയ ബദലാണ് തങ്ങള് ലക്ഷ്യമിടുന്നതെന്ന് മിലോബാര് വ്യക്തമാക്കി.
കഴിഞ്ഞ മേയ് മാസത്തില് കെറി-ലിന് ഫൈന്ഡ്ലേ കണ്സര്വേറ്റീവ് പാര്ട്ടി നേതൃത്വം ഏറ്റെടുത്തതിന് ശേഷം 9 എം.എല്.എമാരാണ് പാര്ട്ടിയില് നിന്ന് രാജിവെച്ചത്. പാര്ട്ടിയില് ആഭ്യന്തര കലഹം രൂക്ഷമാണെങ്കിലും നേതൃസ്ഥാനത്ത് നിന്ന് മാറില്ലെന്ന നിലപാടിലാണ് ഫൈന്ഡ്ലേ. വരാനിരിക്കുന്ന നിയമസഭാ സമ്മേളനത്തില് ഔദ്യോഗിക പ്രതിപക്ഷ മൂന്നാം കക്ഷിയായി (Official Third-Party Status) സാന്നിധ്യമറിയിക്കാനാണ് മിലോബാറിന്റെയും സംഘത്തിന്റെയും തീരുമാനം.
