ഹാലിഫാക്സ്: ഹാലിഫാക്സ് നഗരത്തിൽ വരും വർഷങ്ങളിൽ ജലവിതരണ നിരക്കുകൾ കുത്തനെ ഉയർന്നേക്കുമെന്ന് റിപ്പോർട്ട്. 2027, 2028 വർഷങ്ങളിൽ വെള്ളത്തിന്റെ നിരക്ക് പ്രതിവർഷം 9% വരെ വർധിപ്പിക്കാനാണ് ‘ഹാലിഫാക്സ് വാട്ടർ’ (Halifax Water) അതോറിറ്റി ഒരുങ്ങുന്നത്.ഇതുമായി ബന്ധപ്പെട്ട ഔദ്യോഗിക നിർദ്ദേശം ഈ മാസം അവസാനത്തോടെ അതോറിറ്റി സമർപ്പിക്കും.
പുതിയ നിരക്കുകൾ പ്രാബല്യത്തിൽ വരികയാണെങ്കിൽ, രണ്ടു വർഷം കൊണ്ട് ഉപഭോക്താക്കളുടെ ജലബില്ലിൽ വലിയൊരു തുകയുടെ വർധനവുണ്ടാകും.
രണ്ട് ഘട്ടങ്ങളായുള്ള വർധനവ്: നിർദ്ദിഷ്ട പ്ലാൻ അനുസരിച്ച് 2027 ഏപ്രിൽ 1-നും, തുടർന്ന് 2028 ഏപ്രിൽ 1-നും നിരക്കുകൾ വർധിക്കും. രണ്ട് വർഷം കൊണ്ട് ആകെ 14% മുതൽ 18% വരെ നിരക്ക് വർധനവാണ് ലക്ഷ്യമിടുന്നത്.
വർധനവിന് പിന്നിലെ കാരണങ്ങൾ:
ആഗോളതലത്തിലുണ്ടായ പണപ്പെരുപ്പം (Inflation), അടിസ്ഥാന സൗകര്യ വികസനത്തിനും നവീകരണത്തിനുമായി വരുന്ന ഭീമമായ ചിലവുകൾ, ദൈനംദിന പ്രവർത്തന ചിലവുകളിലുണ്ടായ വർധനവ് എന്നിവയാണ് നിരക്ക് കൂട്ടാൻ കാരണമായി ഹാലിഫാക്സ് വാട്ടർ ചൂണ്ടിക്കാണിക്കുന്നത്.
അന്തിമ അനുമതി ആവശ്യമാണ്: ഹാലിഫാക്സ് വാട്ടർ ബോർഡിന്റെയും ‘നോവസ്കോഷ റെഗുലേറ്ററി ആൻഡ് അപ്പീൽസ് ബോർഡിന്റെയും’ (NSUARB) അന്തിമ അംഗീകാരം ലഭിച്ചാൽ മാത്രമേ ഈ വർധനവ് നടപ്പിലാകൂ. ഇതിനായുള്ള പൊതുജന അഭിപ്രായരൂപീകരണവും നിയമപരമായ നടപടികളും പൂർത്തിയാകാൻ 6 മുതൽ 9 മാസം വരെ സമയമെടുത്തേക്കും.
ദേശീയ ശരാശരിയേക്കാൾ കുറവ്: നിരക്കുകൾ വർധിച്ചാലും ഹാലിഫാക്സിലെ വാർഷിക ജലനിരക്ക് കാനഡയിലെ മറ്റ് പ്രവിശ്യകളിലെ പ്രധാന നഗരങ്ങളുടെ ശരാശരിയേക്കാൾ കുറവായിരിക്കുമെന്ന് അധികൃതർ വ്യക്തമാക്കുന്നു. നിലവിൽ ഹാലിഫാക്സിലെ ശരാശരി വാർഷിക നിരക്ക് $1,099 ഡോളറാണ്, അതേസമയം കാനഡയിലെ ദേശീയ ശരാശരി $1,307 ഡോളറാണ്.
ജനങ്ങളിൽ ആശങ്ക: ജീവിതച്ചിലവുകൾ നിരന്തരം വർധിച്ചുകൊണ്ടിരിക്കുന്ന സാഹചര്യത്തിൽ വെള്ളക്കരം കൂടി ഉയരുന്നത് സാധാരണക്കാരായ ജനങ്ങൾക്ക് വലിയ സാമ്പത്തിക ബാധ്യത വരുത്തിവെക്കുമെന്ന ആശങ്ക ശക്തമാണ്. എന്നാൽ, കുറഞ്ഞ വരുമാനക്കാരായ ഉപഭോക്താക്കളെ സഹായിക്കുന്നതിനായി ഹാലിഫാക്സ് വാട്ടർ നിലവിൽ ഒരു ‘അഫോർഡബിലിറ്റി സ്റ്റഡി’ (Affordability Study) നടത്തിവരികയാണെന്നും, ജനങ്ങളുടെ ബുദ്ധിമുട്ടുകൾ പരിഹരിക്കാൻ നടപടികൾ സ്വീകരിക്കുമെന്നും അധികൃതർ അറിയിച്ചു.
