എഡ്മിന്റന്‍: ആല്‍ബര്‍ട്ടയില്‍ നടന്ന റഫറണ്ടത്തിന്റെ അനൗദ്യോഗിക വോട്ടെണ്ണല്‍ നടപടികള്‍ പൂര്‍ത്തിയായതായി ഇലക്ഷന്‍സ് ആല്‍ബര്‍ട്ട അറിയിച്ചു. നിശ്ചിത 48 മണിക്കൂര്‍ സമയപരിധി കഴിഞ്ഞ് മൂന്ന് ദിവസങ്ങള്‍ക്ക് ശേഷമാണ് വോട്ടെണ്ണല്‍ പൂര്‍ത്തിയാക്കാന്‍ സാധിച്ചത്. ഒക്ടോബര്‍ 22 രാത്രി 10:40-ഓടെ എല്ലാ സ്‌പെഷ്യല്‍ ബാലറ്റുകളും എണ്ണിത്തീര്‍ന്നിരുന്നു. തുടര്‍ന്ന് ശനിയാഴ്ച രാത്രി 9:14-ഓടെയാണ് മൊത്തത്തിലുള്ള അനൗദ്യോഗിക വോട്ടെണ്ണല്‍ അവസാനിച്ചത്.
47,000-ത്തിലധികം ഇലക്ഷന്‍ ജീവനക്കാരുടെ കഠിനാധ്വാനം ഉണ്ടായിരുന്നിട്ടും, ചില നടപടിക്രമങ്ങളിലുണ്ടായ പിഴവുകള്‍ കാരണം 48 മണിക്കൂറിനുള്ളില്‍ കൈകൊണ്ടുള്ള വോട്ടെണ്ണല്‍ അവസാനിപ്പിക്കാന്‍ സാധിച്ചില്ലെന്ന് ഇലക്ഷന്‍സ് ആല്‍ബര്‍ട്ട വക്താവ് മിഷേല്‍ ഗര്‍ണി ഞായറാഴ്ച പുറത്തിറക്കിയ വാര്‍ത്താക്കുറിപ്പില്‍ വ്യക്തമാക്കി. കാനഡയുടെ തിരഞ്ഞെടുപ്പ് ചരിത്രത്തില്‍ ഇതുവരെ നടന്നതിനേക്കാള്‍ ഏറ്റവും കൂടുതല്‍ ബാലറ്റുകളാണ് ഇത്തവണ കൈകൊണ്ട് എണ്ണിയത്. ആകെ 2,05,74,612 ബാലറ്റുകള്‍ ജീവനക്കാര്‍ എണ്ണിത്തിട്ടപ്പെടുത്തി.
ഔദ്യോഗിക ഫലവും റിപ്പോര്‍ട്ടും
റഫറണ്ടത്തിന്റെ ഔദ്യോഗിക ഫലം ഒക്ടോബര്‍ 29-ന് പ്രഖ്യാപിക്കും. നിലവില്‍ വെബ്സൈറ്റില്‍ നല്‍കിയിരിക്കുന്ന വിവരങ്ങള്‍ വോട്ടുകളുടെ അന്തിമ പരിശോധനയ്ക്ക് ശേഷം മാറ്റങ്ങള്‍ക്ക് വിധേയമായേക്കാം. ഇതിന് പുറമെ, റഫറണ്ടത്തിനായുള്ള ചെലവ് അടങ്ങുന്ന ബജറ്റ് നവംബര്‍ അവസാനത്തോടെ ലെജിസ്ലേറ്റീവ് അസംബ്ലിക്ക് മുമ്പാകെ സമര്‍പ്പിക്കുമെന്നും വിശദമായ റിപ്പോര്‍ട്ട് പിന്നീട് പുറത്തുവിടുമെന്നും അധികൃതര്‍ അറിയിച്ചു.
