കെബെക്ക്: കെബെക്കിലെ പുതിയ പാര്‍ട്ടി കെബെക്വ (PQ) സര്‍ക്കാര്‍ സ്‌കൂള്‍ വിദ്യാര്‍ത്ഥികള്‍ക്ക് മതചിഹ്നങ്ങള്‍ ധരിക്കുന്നത് നിരോധിക്കാന്‍ ഒരുങ്ങുന്നതിനെതിരെ കടുത്ത പ്രതിഷേധവുമായി നാഷണല്‍ കൗണ്‍സില്‍ ഓഫ് കനേഡിയന്‍ മുസ്ലിംസ് (NCCM) രംഗത്തെത്തി. കുട്ടികളുടെ ആത്മീയ സ്വാതന്ത്ര്യവും വിദ്യാഭ്യാസ അവകാശങ്ങളും കവര്‍ന്നെടുക്കാനാണ് സര്‍ക്കാര്‍ ശ്രമിക്കുന്നതെന്ന് സംഘടനയുടെ പ്രസിഡന്റ് സ്റ്റീഫന്‍ ബ്രൗണ്‍ ആരോപിച്ചു. പുതിയ വിദ്യാഭ്യാസ മന്ത്രി ജോയല്‍ അര്‍സെനോ, വിദ്യാര്‍ത്ഥികള്‍ക്ക് മേലുള്ള മതചിഹ്ന നിരോധനം സംബന്ധിച്ച് യാതൊരുവിധ വിട്ടുവീഴ്ചയ്ക്കും തയ്യാറല്ലെന്ന് വ്യക്തമാക്കിയതോടെയാണ് വിഷയം വലിയ വിവാദങ്ങള്‍ക്ക് വഴിവെച്ചത്.
തിരഞ്ഞെടുപ്പ് പ്രചാരണവേളയില്‍ മതേതരത്വം സംരക്ഷിക്കുമെന്ന വാഗ്ദാനത്തിന്റെ ഭാഗമായാണ് ഈ നടപടിയെന്നാണ് സര്‍ക്കാരിന്റെ വിശദീകരണം. എന്നാല്‍, കെബെക്കിലെ എല്ലാ ജനങ്ങളുടെയും സര്‍ക്കാരായിരിക്കുമെന്ന പ്രഖ്യാപനം പുതിയ ഭരണകൂടം ലംഘിക്കുകയാണെന്ന് ബ്രൗണ്‍ ചൂണ്ടിക്കാട്ടി. ഹിജാബ്, തലപ്പാവ്, കുരിശ് തുടങ്ങിയവ ധരിക്കുന്ന മതന്യൂനപക്ഷങ്ങളായ വിദ്യാര്‍ത്ഥികളെയാണ് ഈ പുതിയ നയം നേരിട്ട് ബാധിക്കുന്നത്. ഈ നിര്‍ദ്ദേശം നിയമമായി മാറിയാല്‍ അതിനെതിരെ കോടതിയെ സമീപിക്കുമെന്നും NCCM മുന്നറിയിപ്പ് നല്‍കിയിട്ടുണ്ട്.
പ്രതിപക്ഷ പാര്‍ട്ടിയായ കെബെക് സോളിഡെയറും സര്‍ക്കാരിന്റെ ഈ നീക്കത്തെ ശക്തമായി എതിര്‍ത്തു. സ്‌കൂളുകളില്‍ അധ്യാപകരുടെ ക്ഷാമം പരിഹരിക്കുക, അടിസ്ഥാന സൗകര്യങ്ങള്‍ മെച്ചപ്പെടുത്തുക, പഠനം ഉപേക്ഷിക്കുന്ന കുട്ടികളുടെ എണ്ണം കുറയ്ക്കുക തുടങ്ങിയ കാതലായ പ്രശ്‌നങ്ങള്‍ പരിഹരിക്കുന്നതിന് പകരം സര്‍ക്കാര്‍ ഇത്തരം വിഷയങ്ങളില്‍ ശ്രദ്ധ തിരിക്കുകയാണെന്ന് പാര്‍ട്ടി വക്താവ് റോക്‌സെയ്ന്‍ മിലോട്ട് വിമര്‍ശിച്ചു. നിയമസഭയില്‍ ഈ ബില്ലിനെതിരെ വോട്ട് ചെയ്യുമെന്നും അവര്‍ വ്യക്തമാക്കി.
പൊതുമേഖലാ ജീവനക്കാര്‍ക്ക് മതചിഹ്നങ്ങള്‍ വിലക്കിക്കൊണ്ട് കെബെക് സര്‍ക്കാര്‍ മുന്‍പ് പാസാക്കിയ ‘ബില്‍ 21’ നിലവില്‍ കാനഡയിലെ സുപ്രീം കോടതിയുടെ പരിഗണനയിലാണ്. മുന്‍പ് അധ്യാപകര്‍ക്കും മറ്റ് സര്‍ക്കാര്‍ ജീവനക്കാര്‍ക്കും മാത്രം ബാധകമായിരുന്ന ഈ വിലക്ക് ഇപ്പോള്‍ വിദ്യാര്‍ത്ഥികളിലേക്കും വ്യാപിപ്പിക്കുന്നത് അംഗീകരിക്കാനാവില്ലെന്ന് ഭരണഘടനാ വിദഗ്ധരും തിങ്ക് ടാങ്ക് പ്രതിനിധികളും വ്യക്തമാക്കുന്നു. കുട്ടികള്‍ ഭരണകൂടത്തെ പ്രതിനിധീകരിക്കുന്നില്ലെന്നും, അതിനാല്‍ അവര്‍ക്ക് മേല്‍ ഇത്തരം നിയന്ത്രണങ്ങള്‍ അടിച്ചേല്‍പ്പിക്കുന്നത് ഭരണഘടനാപരമായ അവകാശങ്ങളുടെ ലംഘനമാണെന്നുമാണ് ഉയരുന്ന പ്രധാന വിമര്‍ശനം.
