ബെയ്ജിങ്: ഇലക്ട്രിക് വ്യോമയാന രംഗത്ത് നിർണായക മുന്നേറ്റവുമായി ചൈന. രാജ്യത്ത് വികസിപ്പിച്ചെടുത്ത ആദ്യ ഇലക്ട്രിക് വാണിജ്യ വിമാനമായ CE-25A വിജയകരമായി ആദ്യ പരീക്ഷണ പറക്കൽ പൂർത്തിയാക്കി. നവംബർ 14ന് ഷാൻഡോങ് പ്രവിശ്യയിലെ ബിൻഷൗവിലായിരുന്നു പരീക്ഷണ പറക്കൽ.
രണ്ട് പൈലറ്റുമാരും ഒരു ഫ്ലൈറ്റ് ടെസ്റ്റ് എൻജിനീയറും ഉൾപ്പെടെ മൂന്ന് പേരാണ് വിമാനത്തിലുണ്ടായിരുന്നത്. ആകെ 57 മിനിറ്റും 46 സെക്കൻഡും നീണ്ട പരീക്ഷണ പ്രവർത്തനത്തിനിടെ 16 മിനിറ്റും 38 സെക്കൻഡും വിമാനം പറന്നു. ഏകദേശം 60.4 കിലോമീറ്റർ ദൂരം പിന്നിട്ട വിമാനം പ്രതീക്ഷിച്ച പ്രകടനം കാഴ്ചവെച്ചതായി അധികൃതർ അറിയിച്ചു.
19 യാത്രക്കാരെ വഹിക്കാൻ ശേഷിയുള്ള വിമാനത്തിന് പരമാവധി മണിക്കൂറിൽ 300 കിലോമീറ്റർ വേഗതയിൽ സഞ്ചരിക്കാനാകും. ഏകദേശം 400 കിലോമീറ്ററാണ് പ്രതീക്ഷിക്കുന്ന പരമാവധി ദൂരപരിധി. പൂർണമായും വൈദ്യുതോർജത്തിൽ പ്രവർത്തിക്കുന്ന രീതിയിലാണ് വിമാനത്തിന്റെ രൂപകൽപ്പന.
പൈലറ്റുമാരെ ഉൾപ്പെടുത്തിയുള്ള പരീക്ഷണ പറക്കലിന് മുമ്പ് 19 തവണ ആളില്ലാ പരീക്ഷണ പറക്കലുകളും വിമാനം പൂർത്തിയാക്കിയിരുന്നു. ചൈനീസ് വിമാനനിർമാണ കമ്പനിയായ കോമാക് (COMAC), ബാറ്ററി നിർമാതാക്കളായ CATL, ഷാങ്ഹായ് ജിയാവോ ടോങ് സർവകലാശാല എന്നിവയുടെ സഹകരണത്തോടെയാണ് പദ്ധതി വികസിപ്പിച്ചത്.
വിമാനത്തിന് ടൈപ്പ് സർട്ടിഫിക്കേഷൻ ലഭിക്കുന്നതിനുള്ള നടപടികളും പുരോഗമിക്കുകയാണ്. ആവശ്യമായ കൂടുതൽ പരീക്ഷണങ്ങളും ഔദ്യോഗിക അംഗീകാരങ്ങളും പൂർത്തിയായാൽ മാത്രമേ വാണിജ്യാടിസ്ഥാനത്തിൽ യാത്രക്കാരെ കൊണ്ടുപോകാൻ അനുമതി ലഭിക്കൂ.
പരമ്പരാഗത വിമാന ഇന്ധനത്തെ ആശ്രയിക്കുന്നത് കുറയ്ക്കുന്നതിനും പരിസ്ഥിതി സൗഹൃദമായ ഹ്രസ്വദൂര വിമാനയാത്രകൾക്ക് വഴിയൊരുക്കുന്നതിനും ഇത്തരം ഇലക്ട്രിക് വിമാനങ്ങൾക്ക് കഴിയുമെന്നാണ് പ്രതീക്ഷ. വ്യോമയാന സാങ്കേതികവിദ്യയിലെ ചൈനയുടെ പുതിയ മുന്നേറ്റമായാണ് CE-25Aയുടെ പരീക്ഷണ പറക്കൽ വിലയിരുത്തപ്പെടുന്നത്.
