ടൊറന്റോ: ആർത്തവവിരാമ (Menopause) ലക്ഷണങ്ങൾക്കുള്ള ഹോർമോൺ തെറാപ്പി മരുന്നായ ‘പ്രിമാരിൻ’ (Premarin) കാനഡയിലെ വിപണിയിൽ നിന്ന് പിൻവലിക്കാൻ പ്രമുഖ മരുന്ന് നിർമ്മാണ കമ്പനിയായ ഫൈസർ (Pfizer) തീരുമാനിച്ചു. ആന്തരിക അവലോകനത്തെത്തുടർന്നാണ് ഈ ബിസിനസ്സ് തീരുമാനമെന്ന് കമ്പനി ഔദ്യോഗികമായി അറിയിച്ചു.
പ്രിമാരിൻ വജൈനൽ ക്രീമും (Premarin vaginal cream) 0.3 mg, 0.625 mg, 1.25 mg എന്നീ അളവുകളിലുള്ള ഗുളികകളുമാണ് കാനഡയിൽ നിർത്തലാക്കുന്നത്. കഴിഞ്ഞ ജൂൺ മുതൽ കാനഡയിൽ പ്രിമാരിൻ ക്രീമിന് കടുത്ത ക്ഷാമം നേരിട്ടിരുന്നു. ഇനി പുതിയ ബാച്ചുകൾ വിതരണം ചെയ്യില്ലെന്ന് കമ്പനി സ്ഥിരീകരിച്ചിട്ടുണ്ട്. എന്നാൽ നിലവിലുള്ള ഗുളികകളുടെ ശേഖരം 2027 പകുതി വരെ വിപണിയിൽ ലഭ്യമായേക്കും.
മരുന്നിന്റെ സുരക്ഷയിലോ ഗുണനിലവാരത്തിലോ യാതൊരുവിധ പുതിയ പ്രശ്നങ്ങളുമില്ലെന്നും, പൂർണ്ണമായും കമ്പനിയുടെ ബിസിനസ്സ് നയങ്ങളുടെ ഭാഗമായാണ് ഈ നടപടിയെന്നും ഫൈസർ വ്യക്തമാക്കി. എന്നാൽ, ബയർ (Bayer), സാൻഡോസ് (Sandoz) എന്നീ കമ്പനികളുടെ എസ്ട്രാഡിയോൾ പാച്ചുകൾക്കും (estradiol patches) കാനഡയിൽ നിലവിൽ ക്ഷാമം നേരിടുന്നുണ്ട്. ഇതിനിടയിലുള്ള ഫൈസറിന്റെ ഈ പിൻമാറ്റം ആർത്തവവിരാമ ചികിത്സ തേടുന്ന സ്ത്രീകൾക്കിടയിൽ വലിയ ആശങ്കയാണ് ഉണ്ടാക്കിയിരിക്കുന്നത്.
പ്രിമാരിന് പകരമായി ഉപയോഗിക്കാവുന്ന മറ്റ് ഹോർമോൺ തെറാപ്പി ഉൽപ്പന്നങ്ങളായ വജൈനൽ റിങുകൾ (Estring), ഗുളികകൾ (Vagifem), ഇൻസെർട്ടുകൾ (Imvexxy) എന്നിവ കാനഡയിൽ ലഭ്യമാണ്. എന്നാൽ ഇവയിൽ പലതും സാധാരണക്കാർക്ക് സാമ്പത്തികമായി താങ്ങാനാവുന്നതല്ലെന്നും ഇൻഷുറൻസ് പരിരക്ഷയിൽ ഉൾപ്പെടുന്നില്ലെന്നും രോഗികളും ഡോക്ടർമാരും ചൂണ്ടിക്കാട്ടുന്നു. പ്രിമാരിൻ ഉപയോഗിക്കുന്നവർ സ്വയം മരുന്ന് നിർത്താതെ, പകരം ഉപയോഗിക്കാവുന്ന അനുയോജ്യമായ മരുന്നുകളെക്കുറിച്ച് ഡോക്ടറുമായോ ഫാർമസിസ്റ്റുമായോ സംസാരിക്കണമെന്ന് ആരോഗ്യവിദഗ്ധർ നിർദ്ദേശിച്ചു.
അതേസമയം, കാനഡയിലെ ഈ തീരുമാനം മറ്റ് രാജ്യങ്ങളെ ബാധിക്കില്ലെന്ന് ഫൈസർ അറിയിച്ചു. വിതരണ ശൃംഖലയിലെ തടസ്സങ്ങൾ കാരണം 2026 ജൂലൈയിൽ ഇന്ത്യയിലും പ്രിമാരിൻ ക്രീമിന്റെ വിൽപ്പന കമ്പനി താൽക്കാലികമായി നിർത്തിവെച്ചിരുന്നു.
