ടെക്സസ്: അമേരിക്കയിലെ ടെക്സസില് കനത്തനാശം വിതച്ച മിന്നല് പ്രളയത്തില് മരിച്ചവരുടെ എണ്ണം 43 ആയി. 15 കുട്ടികളും ഇതില് ഉള്പ്പെടുന്നതായി കെര് കൗണ്ടി ഷെരീഫ് ലാറി ലീത അറിയിച്ചു. സമ്മര് ക്യാമ്പില് നിന്ന് കാണാതായ 27 കുട്ടികളെ കണ്ടെത്താനുള്ള തിരച്ചില് തുടരുകയാണ്. അതേസമയം, ഈ മേഖലയില് വീണ്ടും കനത്ത മഴയ്ക്കും വെള്ളപ്പൊക്കത്തിനും സാധ്യതയുണ്ടെന്ന് കാലാവസ്ഥാ നിരീക്ഷകര് മുന്നറിയിപ്പ് നല്കി.
പ്രദേശത്തു തന്നെ വീണ്ടും 10 ഇഞ്ച് വരെ മഴയാണ് പ്രവചിക്കപ്പെടുന്നത്. 850ഓളം പേരെ രക്ഷപ്പെടുത്തിയതായാണ് ടെക്സസ് സംസ്ഥാനം പറയുന്നത്. തിരച്ചില് കഴിഞ്ഞ് എത്തുന്നവര്ക്കായി ഒരു റീ യൂണിഫിക്കേഷന് സെന്റര് കാല്ഗറി ടെംപിള് ചര്ച്ചില് തുറന്നിട്ടുമുണ്ട്. കുട്ടികളുടെ മാതാപിതാക്കളടക്കം അവിടെയുണ്ട്. അടിയന്തര സാഹചര്യം നേരിടാന് സര്ക്കാര് പ്രാദേശിക അധികാരികളുമായി ചേര്ന്ന് പ്രവര്ത്തിക്കുകയാണെന്ന് ഡോണള്ഡ് ട്രംപ് വ്യക്തമാക്കി.
തുടര്ച്ചയായ തിരച്ചിലാണ് നടത്തിക്കൊണ്ടിരിക്കുന്നതെന്ന് ടെക്സസ് ഗവര്ണര് പറഞ്ഞു. ഡോണള്ഡ് ട്രംപ് ഭരണകൂടവും ടെക്സസ് സ്റ്റേറ്റും സംയുക്തമായാണ് രക്ഷാപ്രവര്ത്തനം ഏകോപിപ്പിക്കുന്നത്. ടെക്സസ് സംസ്ഥാനം ഫെഡറല് ഡിസാസ്റ്റര് ഡിക്ലറേഷന് പ്രഖ്യാപിച്ചു. ഇത് അംഗീകരിക്കുമെന്ന് ട്രംപ് ഭരണകൂടം പറഞ്ഞിട്ടുണ്ട്. യുഎസ് ഹോംലാന്ഡ് സെക്യൂരിറ്റി സെക്രട്ടറി ക്രിസ്റ്റി നോം അധികം വൈകാതെ അവിടെ എത്തിച്ചേരുമെന്നും ട്രംപ് അറിയിച്ചു.
