വൻകൂവർ : വാരാന്ത്യത്തിൽ ബ്രിട്ടിഷ് കൊളംബിയ കാംലൂപ്സിൽ ട്രെയിൻ പാളം തെറ്റി ആയിരക്കണക്കിന് ലിറ്റർ വ്യോമയാന ഇന്ധനവും മറ്റ് വസ്തുക്കളും ചോർന്നതായി പരിസ്ഥിതി മന്ത്രാലയം റിപ്പോർട്ട് ചെയ്തു. കംലൂപ്സ് തടാകത്തിൽ കലർന്ന ഇന്ധനവും മറ്റ് വസ്തുക്കളും നീക്കം ചെയ്യുന്നതിനുള്ള ശുചീകരണം തുടരുകയാണ്. ശനിയാഴ്ച വൈകുന്നേരം 7 മണിയോടെ ചെറി ക്രീക്കിന് സമീപം കനേഡിയൻ പസഫിക് കൻസാസ് സിറ്റി (സിപികെസി) ട്രെയിനാണ് പാളം തെറ്റിയത്.
ഒരു ലോക്കോമോട്ടീവും ഏകദേശം 17 ബോഗികളുമാണ് പാളം തെറ്റിയത്. ബോഗികളിൽ നാലെണ്ണം ഇന്ധനം നിറച്ചതും അഞ്ചെണ്ണം ജിപ്സവും ഒരെണ്ണം പൾപ്പ് ഉൽപ്പന്നങ്ങൾ നിറച്ചതുമായിരുന്നു. പ്രാഥമിക കണക്കുകൾ സൂചിപ്പിക്കുന്നത് ഏകദേശം 12,700 ലിറ്റർ വ്യോമയാന ഇന്ധനം ചോർന്നിട്ടുണ്ട്. ഇന്ധന ചോർച്ച നിയന്ത്രണവിധേയമാക്കിയതായി സിപികെസി അറിയിച്ചു.
