ഓട്ടവ: ആർക്ക് റിസോഴ്സസ് ലിമിറ്റഡിനെ (ARC Resources Ltd.) ഏറ്റെടുക്കാൻ കരാറൊപ്പിട്ട് ഷെൽ പിഎൽസി (Shell plc) . കടബാധ്യതകൾ ഉൾപ്പെടെ 22 ബില്യൺ ഡോളർ മൂല്യമുള്ളതാണ് ഈ ഓഹരി-പണ ഇടപാട്. ആൽബർട്ട, ബ്രിട്ടിഷ് കൊളംബിയ എന്നിവിടങ്ങളിലെ മോണ്ട്നി മേഖലയിൽ ശ്രദ്ധ കേന്ദ്രീകരിച്ചിരിക്കുന്ന പ്രമുഖ എണ്ണ, പ്രകൃതിവാതക ഉൽപ്പാദക കമ്പനിയാണ് ആർക്ക് റിസോഴ്സസ്.
ഈ ഇടപാടിന്റെ ഭാഗമായി, ഓരോ ആർക്ക് റിസോഴ്സസ് ഓഹരിക്കും പകരമായി 0.40247 ഷെൽ ഓഹരിയും 8.20 ഡോളർ പണവും ആർക്ക് ഓഹരി ഉടമകൾക്ക് ലഭിക്കും. ഏപ്രിൽ 24-ലെ വിപണി വിലയനുസരിച്ച് ഒരു ആർക്ക് ഓഹരിക്ക് 32.80 ഡോളർ മൂല്യം വരുന്ന രീതിയിലാണ് ഈ ഓഫർ നിശ്ചയിച്ചിരിക്കുന്നത്. കാനഡയിലെ തങ്ങളുടെ നിലവിലെ സാന്നിധ്യം ശക്തിപ്പെടുത്താനും ദീർഘകാലത്തേക്ക് വിഭവങ്ങൾ വർദ്ധിപ്പിക്കാനും ഈ ഏറ്റെടുക്കൽ സഹായിക്കുമെന്ന് ഷെൽ ചീഫ് എക്സിക്യൂട്ടീവ് വായൽ സവാൻ വ്യക്തമാക്കി.
ഓഹരി ഉടമകളുടെയും കോടതിയുടെയും അനുമതിക്ക് പുറമെ, ഇൻവെസ്റ്റ്മെന്റ് കാനഡ ആക്ട് പ്രകാരമുള്ള നിയമപരമായ അംഗീകാരങ്ങളും ഈ ഇടപാടിന് ആവശ്യമാണ്. എല്ലാം അനുകൂലമായാൽ ഈ വർഷം രണ്ടാം പകുതിയോടെ ഇടപാട് പൂർത്തിയാകുമെന്നാണ് പ്രതീക്ഷിക്കുന്നത്. സുസ്ഥിരമായ വികസനത്തിലൂടെ കുറഞ്ഞ മലിനീകരണത്തോടെ കൂടുതൽ മൂല്യം സൃഷ്ടിക്കുക എന്ന തങ്ങളുടെ തന്ത്രം ഈ ഏറ്റെടുക്കലിലൂടെ കൂടുതൽ കരുത്താർജിക്കുമെന്ന് ഷെൽ അധികൃതർ അറിയിച്ചു.
