തിരുവനന്തപുരം: സ്ഥാനാര്ത്ഥികള് സമര്പ്പിച്ച സത്യവാങ്മൂലത്തില് നോട്ടറി സ്റ്റാമ്പിന് പകരം ‘സ്പെഷ്യല് അഡ്ഹെസീവ് സ്റ്റാമ്പ്’ ഉപയോഗിച്ചത് നിയമവിരുദ്ധമാണെന്ന് ചൂണ്ടിക്കാട്ടി നിയമവിദഗ്ധര് രംഗത്ത്. മുഖ്യമന്ത്രി പിണറായി വിജയന്, പ്രതിപക്ഷ നേതാവ് വി.ഡി. സതീശന് എന്നിവരടക്കം പ്രമുഖ സ്ഥാനാര്ത്ഥികളെല്ലാം ഇത്തരത്തിലാണ് സത്യവാങ്മൂലം സമര്പ്പിച്ചിരിക്കുന്നത്. ഇത് നിലവിലെ സ്റ്റാമ്പ് ആക്ടിന്റെ ലംഘനമാണെന്നും സത്യവാങ്മൂലത്തിന്റെ നിയമസാധുതയെ ബാധിക്കുമെന്നുമാണ് നിയമവൃത്തങ്ങള് നല്കുന്ന സൂചന.
നോട്ടറി സ്റ്റാമ്പുകള്ക്ക് ക്ഷാമം നേരിടുന്ന സാഹചര്യത്തില് സ്പെഷ്യല് അഡ്ഹെസീവ് സ്റ്റാമ്പുകള് സത്യവാങ്മൂലങ്ങളില് അംഗീകരിക്കണമെന്ന് ആവശ്യപ്പെട്ട് നാല് വര്ഷം മുന്പ് ട്രഷറി ഡയറക്ടര് സര്ക്കാരിന് കത്ത് നല്കിയിരുന്നു. എന്നാല് സര്ക്കാര് ഇതിന്മേല് ഇതുവരെ വ്യക്തമായ മറുപടിയോ ഉത്തരവോ നല്കിയിട്ടില്ല. നിലവില് അഞ്ച് രൂപയുടെ നോട്ടറി സ്റ്റാമ്പുകള് വിപണിയിലും ട്രഷറികളിലും സുലഭമായിരിക്കെ, നിയമപരമായ ഈ ചട്ടം മറികടന്നതാണ് ഇപ്പോള് വിവാദമായിരിക്കുന്നത്. സാധാരണഗതിയില് 20 നോട്ടറി സ്റ്റാമ്പുകളാണ് സത്യവാങ്മൂലത്തില് പതിപ്പിക്കേണ്ടത്. ഇതിന് പകരമായി 100 രൂപയുടെ ഒന്നോ 50 രൂപയുടെ രണ്ടോ സ്പെഷ്യല് അഡ്ഹെസീവ് സ്റ്റാമ്പുകളാണ് സ്ഥാനാര്ത്ഥികള് ഉപയോഗിച്ചിരിക്കുന്നത്.
2011 മുതല് കേരളത്തില് നോട്ടറിയായി പ്രവര്ത്തിക്കുന്ന അഡ്വ. ചാത്തുക്കുട്ടിയാണ് ഈ ക്രമക്കേട് ചൂണ്ടിക്കാട്ടി പരാതി നല്കിയിരിക്കുന്നത്. നോട്ടറി സ്റ്റാമ്പ് അല്ലാത്ത മറ്റ് സ്റ്റാമ്പുകള് പതിച്ച സത്യവാങ്മൂലങ്ങള്ക്ക് നിയമപരമായ നിലനില്പ്പില്ലെന്ന് അദ്ദേഹം അവകാശപ്പെടുന്നു. പ്രമുഖ രാഷ്ട്രീയ നേതാക്കള് ഉള്പ്പെടെയുള്ളവരുടെ സത്യവാങ്മൂലങ്ങളില് ഇത്തരമൊരു പിഴവ് സംഭവിച്ചത് വരും ദിവസങ്ങളില് വലിയ നിയമപോരാട്ടങ്ങള്ക്ക് വഴിവെച്ചേക്കാം.
