തിരുവനന്തപുരം: വോട്ടെണ്ണലിന്റെ ആദ്യ മണിക്കൂറുകള് പിന്നിടുമ്പോള് 97 സീറ്റുകളില് യുഡിഎഫ് വ്യക്തമായ ലീഡ് നിലനിര്ത്തിക്കൊണ്ട് ഭരണമാറ്റത്തിലേക്ക് നീങ്ങുന്നതായാണ് കണക്കുകള് സൂചിപ്പിക്കുന്നത്. പാലക്കാട് മണ്ഡലത്തില് യുഡിഎഫ് സ്ഥാനാര്ത്ഥി രമേഷ് പിഷാരടി മുന്നിലെത്തിയത് വലിയ രാഷ്ട്രീയ ശ്രദ്ധയാകര്ഷിച്ചിരിക്കുകയാണ്. സംസ്ഥാനത്തുടനീളം യുഡിഎഫ് തരംഗം ആഞ്ഞടിക്കുമ്പോള് ഭരണപക്ഷമായ എല്ഡിഎഫ് കനത്ത തകര്ച്ചയെയാണ് നേരിടുന്നത്.
മുഖ്യമന്ത്രി പിണറായി വിജയന് തന്റെ ഉറച്ച കോട്ടയായ ധര്മ്മടത്ത് മൂന്നാം റൗണ്ട് പിന്നിടുമ്പോഴും 2077 വോട്ടുകള്ക്ക് പിന്നിലാണെന്ന റിപ്പോര്ട്ടുകള് ഇടത് കേന്ദ്രങ്ങളെ അമ്പരപ്പിച്ചു. മുഖ്യമന്ത്രിക്ക് പുറമെ 14 മന്ത്രിമാരും എല്ഡിഎഫ് കണ്വീനര് ടി.പി. രാമകൃഷ്ണനും പിന്നിലായതോടെ ഭരണത്തുടര്ച്ചയെന്ന എല്ഡിഎഫ് മോഹങ്ങള്ക്ക് കനത്ത പ്രഹരമേറ്റു. പി. രാജീവ്, വി.എന്. വാസവന്, റോഷി അഗസ്റ്റിന്, വീണ ജോര്ജ് തുടങ്ങിയ പ്രമുഖ മന്ത്രിമാരെല്ലാം നിലവില് ലീഡ് നിലയില് പിന്നിലാണ്. അതേസമയം, പേരാവൂരില് കെ.കെ. ശൈലജ 453 വോട്ടുകള്ക്ക് ലീഡ് ചെയ്യുന്നത് എല്ഡിഎഫിന് നേരിയ ആശ്വാസം നല്കുന്നുണ്ട്.
മറ്റു പ്രമുഖ മണ്ഡലങ്ങളിലും യുഡിഎഫ് ആധിപത്യം തുടരുകയാണ്. പുതുപ്പള്ളിയില് ചാണ്ടി ഉമ്മന് 7500 വോട്ടുകളുടെ വന് ഭൂരിപക്ഷത്തിലേക്ക് കുതിക്കുമ്പോള്, പറവൂരില് പ്രതിപക്ഷ നേതാവ് വി.ഡി. സതീശന് തന്റെ ലീഡ് നില തിരിച്ചുപിടിച്ചു. വട്ടിയൂര്ക്കാവില് കെ. മുരളീധരനും ചവറയില് ഷിബു ബേബി ജോണും മുന്നേറ്റം തുടരുന്നു. കോങ്ങാട് മണ്ഡലത്തില് സിറ്റിംഗ് എംഎല്എ ശാന്തകുമാരിയെ പിന്നിലാക്കി യുഡിഎഫിന്റെ തുളസി 1277 വോട്ടുകള്ക്ക് മുന്നിലെത്തിയതും ശ്രദ്ധേയമായി. കേരളത്തിന്റെ രാഷ്ട്രീയ ഭൂപടത്തില് വലിയ അഴിച്ചുപണികള്ക്ക് സാധ്യത നല്കുന്നതാണ് നിലവിലെ ലീഡ് നിലകള്.
