ന്യൂഡൽഹി: ഓഹരി വിപണിയിലെ പത്ത് മുൻനിര കമ്പനികളിൽ നാലെണ്ണത്തിന് കഴിഞ്ഞയാഴ്ച വിപണി മൂല്യത്തിൽ വലിയ തിരിച്ചടി നേരിട്ടു. ഈ കമ്പനികളുടെ മൊത്തം വിപണി മൂല്യത്തിൽ ഒരു ലക്ഷം കോടി രൂപയുടെ ഇടിവാണ് രേഖപ്പെടുത്തിയത്. ഇതിൽ ഏറ്റവും കൂടുതൽ നഷ്ടം സംഭവിച്ചത് പൊതുമേഖലാ ബാങ്കായ എസ്ബിഐയ്ക്കാണ്. 44,722 കോടി രൂപയുടെ ഇടിവോടെ എസ്ബിഐയുടെ വിപണി മൂല്യം 9,41,107 കോടിയായി താഴ്ന്നു.
എസ്ബിഐയ്ക്ക് പുറമെ ഭാരതി എയർടെൽ, ടിസിഎസ്, എൽ ആൻഡ് ടി എന്നീ കമ്പനികളാണ് നഷ്ടം നേരിട്ട മറ്റ് പ്രമുഖർ. ഭാരതി എയർടെലിന് 31,167 കോടിയും ടിസിഎസിന് 28,456 കോടിയും എൽ ആൻഡ് ടിക്ക് 5,371 കോടിയും വിപണി മൂല്യം കുറഞ്ഞു. വെള്ളിയാഴ്ച അവസാനിച്ച വ്യാപാര ആഴ്ചയിൽ സെൻസെക്സ് 414 പോയിന്റ് ഉയർന്നുവെങ്കിലും ഈ വമ്പൻ കമ്പനികളുടെ ഓഹരികളിൽ ഉണ്ടായ ഇടിവ് വിപണിക്ക് തിരിച്ചടിയായി.
അതേസമയം, ചില മുൻനിര കമ്പനികൾ നേട്ടമുണ്ടാക്കുകയും ചെയ്തു. എച്ച്ഡിഎഫ്സി ബാങ്കിന്റെ വിപണി മൂല്യത്തിൽ 15,425 കോടി രൂപയുടെ വർധനയാണ് രേഖപ്പെടുത്തിയത്. ബജാജ് ഫിനാൻസ്, ഹിന്ദുസ്ഥാൻ യൂണിലിവർ, റിലയൻസ് എന്നീ കമ്പനികളും നേട്ടമുണ്ടാക്കിയവരുടെ പട്ടികയിലുണ്ട്. നിലവിൽ വിപണി മൂല്യത്തിന്റെ കാര്യത്തിൽ റിലയൻസ് ഇൻഡസ്ട്രീസ് തന്നെയാണ് രാജ്യത്ത് ഒന്നാമതായി തുടരുന്നത്.
