ന്യൂഡൽഹി: ഊർജ്ജ സ്വയംപര്യാപ്തത ലക്ഷ്യമിട്ട് കൽക്കരി വാതകവൽക്കരണ പദ്ധതിക്കായി 37,500 കോടി രൂപയുടെ വൻ സാമ്പത്തിക സഹായത്തിന് പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭായോഗം അംഗീകാരം നൽകി. വിദേശ രാജ്യങ്ങളിൽ നിന്നുള്ള എൽ.എൻ.ജി (LNG), അമോണിയ, മെഥനോൾ എന്നിവയുടെ ഇറക്കുമതി ഗണ്യമായി കുറയ്ക്കുകയാണ് ഈ പദ്ധതിയുടെ പ്രധാന ലക്ഷ്യം. പ്രതിവർഷം 2.77 ലക്ഷം കോടി രൂപയുടെ ഇറക്കുമതി ആശ്രിതത്വം കുറയ്ക്കുക. നിലവിൽ ഇന്ത്യയ്ക്ക് ആവശ്യമായ അമോണിയയുടെ 100 ശതമാനവും മെഥനോളിന്റെ 80-90 ശതമാനവും ഇറക്കുമതി ചെയ്യുകയാണ്. 37,500 കോടി രൂപയുടെ സർക്കാർ സഹായത്തിലൂടെ ഏകദേശം 3 ലക്ഷം കോടി രൂപയുടെ സ്വകാര്യ നിക്ഷേപം ഈ മേഖലയിൽ പ്രതീക്ഷിക്കുന്നു. 75 ദശലക്ഷം ടൺ കൽക്കരി വാതകമാക്കി മാറ്റാനാണ് ലക്ഷ്യമിടുന്നത്. ഇത് വഴി സിന്തറ്റിക് നാച്ചുറൽ ഗ്യാസ്, മെഥനോൾ, അമോണിയ, ഹൈഡ്രജൻ, രാസവളങ്ങൾ എന്നിവ ആഭ്യന്തരമായി ഉൽപ്പാദിപ്പിക്കാൻ സാധിക്കും.
പദ്ധതിച്ചെലവിന്റെ 20 ശതമാനം വരെ സർക്കാർ ധനസഹായമായി നൽകും. ഒരു പ്രോജക്റ്റിന് പരമാവധി 5,000 കോടി രൂപ വരെയും ഒരു കോർപ്പറേറ്റ് ഗ്രൂപ്പിന് പരമാവധി 12,000 കോടി രൂപ വരെയുമാണ് സഹായം ലഭിക്കുക. പശ്ചിമേഷ്യയിലെ സംഘർഷങ്ങൾ അന്താരാഷ്ട്ര വിപണിയിൽ ഇന്ധന വിലവർദ്ധനയ്ക്കും വിതരണ തടസ്സങ്ങൾക്കും കാരണമാകുന്നുണ്ട്. ഈ സാഹചര്യത്തിൽ, ഇന്ത്യയുടെ പക്കലുള്ള 200 വർഷത്തേക്കുള്ള കൽക്കരി ശേഖരം പ്രയോജനപ്പെടുത്തി ‘ആത്മനിർഭർ ഭാരത്’ ലക്ഷ്യത്തിലെത്താൻ ഈ പദ്ധതി സഹായിക്കുമെന്ന് കേന്ദ്രമന്ത്രി അശ്വിനി വൈഷ്ണവ് വ്യക്തമാക്കി. കൽക്കരിയെ നേരിട്ട് കത്തിക്കുന്നതിന് പകരം രാസപ്രവർത്തനങ്ങളിലൂടെ ‘സിൻഗ്യാസ്’ (Syngas) എന്നറിയപ്പെടുന്ന വാതകമാക്കി മാറ്റുന്ന രീതിയാണിത്. ഈ വാതകത്തിൽ നിന്ന് രാസവളങ്ങളും ഇന്ധനങ്ങളും നിർമ്മിക്കാം. സാധാരണ രീതിയെ അപേക്ഷിച്ച് ഇത് കൂടുതൽ പരിസ്ഥിതി സൗഹൃദവുമാണ്. ഈ പദ്ധതി പൂർത്തിയാകുന്നതോടെ വളം ഉൽപ്പാദനത്തിലും വ്യാവസായിക ഇന്ധന രംഗത്തും ഇന്ത്യയ്ക്ക് വിദേശ രാജ്യങ്ങളെ ആശ്രയിക്കുന്നത് ഒഴിവാക്കാൻ സാധിക്കും.
