തിരുവനന്തപുരം: പ്രതിപക്ഷ നേതാവ് പിണറായി വിജയന്റെ തിരുവനന്തപുരത്തെ വീട്ടില് നടന്ന ഇഡി റെയ്ഡിന് പിന്നാലെ തലസ്ഥാനത്ത് സംഘര്ഷം. റെയ്ഡ് പൂര്ത്തിയാക്കി മടങ്ങിയ ഇഡി ഉദ്യോഗസ്ഥരുടെ വാഹനങ്ങള് സിപിഎം പ്രവര്ത്തകര് തല്ലിത്തകര്ത്തു. രണ്ട് ഇഡി ഉദ്യോഗസ്ഥര്ക്കും ഒരു ഡ്രൈവര്ക്കും പരുക്കേറ്റു. ബേക്കറി ജങ്ഷനിലെ അദ്ദേഹത്തിന്റെ വാടക വീടിന് മുന്നില് തടിച്ചുകൂടിയ പ്രവര്ത്തകര് ഉദ്യോഗസ്ഥര്ക്ക് നേരെ കുപ്പികളും പാദരക്ഷകളും എറിഞ്ഞതോടെയാണ് സംഘര്ഷം രൂക്ഷമായത്.
സിഎംആര്എല് (CMRL) പ്രതിമാസപ്പടി കേസുമായി ബന്ധപ്പെട്ട അന്വേഷണത്തിന്റെ ഭാഗമായാണ് പിണറായി വിജയന്റെ വസതിയിലും മരുമകന് പി.എ. മുഹമ്മദ് റിയാസിന്റെ കോഴിക്കോട്ടെ വസതിയിലുമടക്കം സംസ്ഥാനത്തെ പത്ത് കേന്ദ്രങ്ങളില് ഒരേസമയം റെയ്ഡ് നടന്നത്. റെയ്ഡ് പൂര്ത്തിയായതിന് പിന്നാലെ പാളയം ഏരിയ കമ്മിറ്റി ഓഫീസിന് മുന്നിലും പ്രതിഷേധം അണപൊട്ടി. പ്രവര്ത്തകരെ അറസ്റ്റ് ചെയ്യാന് പോലീസ് നടത്തിയ നീക്കം നേതാക്കള് തടഞ്ഞതോടെ നഗരം സംഘര്ഷഭരിതമായി.
ഡല്ഹിയിലും ഇഡി ആസ്ഥാനത്തേക്ക് സിപിഎം നടത്തിയ മാര്ച്ചില് വന് സംഘര്ഷമുണ്ടായി. പ്രതിഷേധത്തിന് നേതൃത്വം നല്കിയ സിപിഎം ജനറല് സെക്രട്ടറി എം.എ. ബേബിയെയും ബൃന്ദ കാരാട്ട് ഉള്പ്പെടെയുള്ള മുതിര്ന്ന നേതാക്കളെയും പോലീസ് അറസ്റ്റ് ചെയ്ത് നീക്കി. പിണറായി വിജയനെതിരായ ഇഡി നടപടി രാഷ്ട്രീയ ഗൂഢാലോചനയാണെന്ന് ആരോപിച്ചായിരുന്നു മാര്ച്ച്.
റെയ്ഡ് രാഹുല് ഗാന്ധിക്ക് മനഃസംതൃപ്തി നല്കുന്നതാണെന്ന് പിണറായി വിജയന് പ്രതികരിച്ചു. രാഹുല് ഗാന്ധി കേരളത്തില് വരുമ്പോഴെല്ലാം എന്തുകൊണ്ടാണ് പിണറായിയെ അറസ്റ്റ് ചെയ്യാത്തതെന്ന് ചോദിക്കാറുണ്ടെന്നും ആ ആഗ്രഹമാണ് ഇപ്പോള് നടപ്പിലാകുന്നതെന്നും അദ്ദേഹം പറഞ്ഞു. ഇങ്ങനെയുള്ള നടപടികളിലൂടെ തന്നെ തളര്ത്താമെന്ന് ആരും വ്യാമോഹിക്കേണ്ടെന്നും, രാഷ്ട്രീയ വേട്ടയാടലിനെ ഒന്നിച്ച് ഒറ്റക്കെട്ടായി നേരിടുമെന്നും അദ്ദേഹം പ്രവര്ത്തകരോട് വ്യക്തമാക്കി.
സംഭവത്തില് പ്രതിഷേധവുമായി എം. സ്വരാജ്, പി. രാജീവ് തുടങ്ങിയ നേതാക്കളും രംഗത്തെത്തി. കോണ്ഗ്രസ് ബിജെപിയുടെ ബി ടീമായി പ്രവര്ത്തിക്കുകയാണെന്നും ഇഡിയുടെയും സംഘപരിവാറിന്റെയും കൂട്ടിക്കൊടുപ്പുകാരായി കോണ്ഗ്രസ് മാറിയെന്നും എം. സ്വരാജ് വിമര്ശിച്ചു. രാഹുല് ഗാന്ധി ഉന്നയിച്ച ചോദ്യങ്ങള്ക്കുള്ള ഉത്തരമാണ് ഈ റെയ്ഡെന്നും രാഷ്ട്രീയ ഗൂഢാലോചനയെ ജനങ്ങള്ക്കിടയില് പരാജയപ്പെടുത്തുമെന്നും പി. രാജീവ് പറഞ്ഞു.
