ന്യൂയോർക്ക്: കാനഡയും യു.എസും തമ്മിലുള്ള വ്യാപാര ബന്ധം കൂടുതൽ ശക്തമാക്കാൻ ലക്ഷ്യമിട്ട് കനേഡിയൻ പ്രധാനമന്ത്രി മാർക്ക് കാർണി ന്യൂയോർക്കിൽ പ്രമുഖ വ്യവസായ പ്രമുഖരുമായി കൂടിക്കാഴ്ച നടത്തി. യു.എസ് വിപണിയെ മാത്രം ആശ്രയിക്കുന്ന രീതിയിൽ നിന്ന് മാറി മറ്റ് അന്താരാഷ്ട്ര വിപണികളിലേക്ക് വ്യാപാരം വ്യാപിപ്പിക്കാനുള്ള കാനഡയുടെ ശ്രമങ്ങൾ, അവരെ അമേരിക്കയുടെ കൂടുതൽ കരുത്തുറ്റ സഖ്യകക്ഷിയാക്കുമെന്ന് ഇക്കണോമിക് ക്ലബ് ഓഫ് ന്യൂയോർക്കിൽ സംസാരിക്കവെ അദ്ദേഹം വ്യക്തമാക്കി. കാനഡയെ ഒരു പ്രധാന നിക്ഷേപ കേന്ദ്രമായി അവതരിപ്പിക്കുക എന്നതായിരുന്നു പ്രധാനമന്ത്രിയുടെ സന്ദർശന ലക്ഷ്യം. നിലവിൽ കാനഡ, അമേരിക്ക, മെക്സിക്കോ എന്നീ രാജ്യങ്ങൾ തമ്മിലുള്ള ‘കുസ്മ’ (CUSMA) വ്യാപാരക്കരാർ പുനഃപരിശോധിക്കുന്നതുമായി ബന്ധപ്പെട്ട ചർച്ചകൾ നടക്കാനിരിക്കെയാണ് ഈ നിർണായക സന്ദർശനം.
വ്യാപാര മേഖലയിൽ ഇരുരാജ്യങ്ങളും തമ്മിൽ ചില അഭിപ്രായവ്യത്യാസങ്ങൾ നിലനിൽക്കുന്നുണ്ടെങ്കിലും, ഓട്ടോമൊബൈൽ, നിർണായക ധാതുക്കൾ തുടങ്ങിയ മേഖലകളിൽ ഇരുരാജ്യങ്ങൾക്കും ഒന്നിച്ച് പ്രവർത്തിക്കാൻ സാധിക്കുമെന്ന് മാർക്ക് കാർണി പ്രത്യാശ പ്രകടിപ്പിച്ചു. ട്രംപ് ഭരണകൂടം കാനഡയ്ക്ക് മേൽ ഏർപ്പെടുത്തിയ നികുതികളെച്ചൊല്ലിയുള്ള തർക്കങ്ങളും ഇരുരാജ്യങ്ങളും തമ്മിലുള്ള പ്രതിരോധ സമിതിയുടെ പ്രവർത്തനം താൽക്കാലികമായി നിർത്തിവെച്ച പശ്ചാത്തലവും നിലനിൽക്കെ, മറ്റ് രാജ്യങ്ങളുമായുള്ള സാമ്പത്തിക ബന്ധം ദൃഢമാക്കാനാണ് കാനഡ നിലവിൽ ശ്രമിക്കുന്നത്.
