ന്യൂഡല്ഹി: അനധികൃത കുടിയേറ്റം തടയുന്നതിനും നിയമപരമായ യാത്രാമാര്ഗ്ഗങ്ങള് പ്രോത്സാഹിപ്പിക്കുന്നതിനുമായി ഇന്ത്യയും അമേരിക്കയും തമ്മിലുള്ള ഉഭയകക്ഷി സഹകരണം കൂടുതല് ശക്തമാക്കുന്നു. ഇതിന്റെ ഭാഗമായി 2026-ല് ഇതുവരെ 1076 ഇന്ത്യന് പൗരന്മാരെ അമേരിക്കയില് നിന്ന് ഇന്ത്യയിലേക്ക് തിരിച്ചയച്ചതായി വിദേശകാര്യ മന്ത്രാലയം ഔദ്യോഗികമായി സ്ഥിരീകരിച്ചു.
നിയമാനുസൃതമായ യാത്രാ ചാനലുകള് സംരക്ഷിക്കുന്നതിനൊപ്പം അനധികൃത കുടിയേറ്റം പൂര്ണ്ണമായും തടയുന്നതിനായി ന്യൂഡല്ഹിയും വാഷിങ്ടണും വളരെ അടുത്ത പങ്കാളിത്തത്തോടെയാണ് പ്രവര്ത്തിക്കുന്നതെന്ന് വിദേശകാര്യ മന്ത്രാലയ വക്താവ് രണ്ധീര് ജയ്സ്വാള് മാധ്യമങ്ങളോട് പറഞ്ഞു. വ്യാജ രേഖകളും ഏജന്റുമാരെയും ആശ്രയിച്ച് വിദേശത്തേക്ക് കടക്കുന്നവര്ക്കെതിരെ ഇരു രാജ്യങ്ങളും കര്ശന നിലപാടാണ് സ്വീകരിക്കുന്നത്.
കഴിഞ്ഞ കുറച്ചുകാലങ്ങളായി അമേരിക്ക തങ്ങളുടെ ഇമിഗ്രേഷന് നിയമങ്ങള് കടുപ്പിച്ചതിന്റെ ഫലമായി നാടുകടത്തപ്പെടുന്നവരുടെ എണ്ണത്തില് വലിയ വര്ധനവാണ് ഉണ്ടായിരിക്കുന്നത്. ലഭ്യമായ കണക്കുകള് പ്രകാരം 2025-ല് മാത്രം 3567 ഇന്ത്യന് പൗരന്മാരെയാണ് അമേരിക്ക നാടുകടത്തിയത്. കഴിഞ്ഞ രണ്ട് വര്ഷത്തിനിടെ ഇത്തരത്തില് തിരിച്ചയക്കപ്പെടുന്നവരുടെ എണ്ണം ഗണ്യമായി ഉയരുന്നത് ആശങ്കാജനകമായ സാഹചര്യമാണ് സൃഷ്ടിക്കുന്നത്.
നിയമപരമായ യാത്രകള്, ഉന്നത വിദ്യാഭ്യാസം, തൊഴില് അവസരങ്ങള് എന്നിവ കൂടുതല് സുഗമമാക്കുക എന്നതിനാണ് വിദേശകാര്യ മന്ത്രാലയം ഇപ്പോള് മുന്ഗണന നല്കുന്നത്. അതേസമയം തന്നെ ജനങ്ങളെ തെറ്റിദ്ധരിപ്പിച്ച് മനുഷ്യക്കടത്ത് നടത്തുന്ന അനധികൃത കുടിയേറ്റ ശൃംഖലകളെയും ഏജന്റുമാരെയും ഫലപ്രദമായി അടിച്ചമര്ത്താനും ഇരു രാജ്യങ്ങളും ലക്ഷ്യമിടുന്നു. അമേരിക്കയുമായുള്ള ഈ സംയുക്ത സഹകരണം വരും ദിവസങ്ങളില് ഇന്ത്യന് പൗരന്മാരുടെ സുരക്ഷിതവും നിയമപരവുമായ വിദേശയാത്രകള്ക്ക് കൂടുതല് ഗുണകരമാകുമെന്നാണ് വിലയിരുത്തപ്പെടുന്നത്.
