മൺട്രിയോൾ: കാനഡയിലെ മൺട്രിയോൾ നഗരത്തിലെ അഹുൻസ്റ്റിക്-കാർട്ടിയർവിൽ മേഖലയിലെ ഒരു ജ്വല്ലറിയിലെ കവർച്ചാ ശ്രമത്തിൽ നാല് കൗമാരക്കാരെ പൊലീസ് അറസ്റ്റ് ചെയ്തു. സംഭവത്തിൽ 13 മുതൽ 18 വയസ്സ് വരെ പ്രായമുള്ള നാല് കൗമാരക്കാരാണ് പിടിയിലായത്.
മൺട്രിയോൾ പൊലീസ് നൽകുന്ന വിവരങ്ങൾ അനുസരിച്ച്, ഫ്ലൂറി സ്ട്രീറ്റിലെ (Fleury Street) ജ്വല്ലറിയിലേക്ക് ഒരു എസ്യുവി ഇടിപ്പിച്ചു കയറ്റി കവർച്ച നടത്താനായിരുന്നു ശ്രമം. തിങ്കളാഴ്ച പുലർച്ചെ 1:45-ഓടെയാണ് സംഭവം. മോഷണ ശ്രമം പരാജയപ്പെട്ടതോടെ പ്രതികൾ ഉപയോഗിച്ചിരുന്ന എസ്യുവി വാഹനത്തെ കടയ്ക്കുള്ളിൽ ഉപേക്ഷിച്ച്, സമീപത്ത് കാത്തിരുന്ന മറ്റൊരു വാഹനത്തിൽ കയറി രക്ഷപ്പെട്ടു.
സംഭവസ്ഥലത്തെത്തിയ പൊലീസ്, സാക്ഷികൾ നൽകിയ വിവരങ്ങളുടെ അടിസ്ഥാനത്തിൽ സംശയാസ്പദമായ വാഹനത്തെ പിന്തുടർന്ന് നാല് പേരെയും പിടികൂടുകയായിരുന്നു. അറസ്റ്റിലായവരിൽ ഒരാൾ 13 വയസ്സുകാരനാണ്; മറ്റ് മൂന്ന് പേർ 16, 17, 18 വയസ്സുകാരാണെന്നും പൊലീസ് അറിയിച്ചു. പ്രതികളെ കസ്റ്റഡിയിൽ എടുത്ത് ചോദ്യം ചെയ്യലിന് ശേഷം അന്വേഷണം തുടരുകയാണെന്ന് മൺട്രിയോൾ പൊലീസ് വ്യക്തമാക്കി.
