തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധി എപ്പോൾ പരിഹരിക്കാനാകുമെന്ന് ഇപ്പോൾ കൃത്യമായി പറയാനാകില്ലെന്ന് വൈദ്യുതി മന്ത്രി സണ്ണി ജോസഫ്. കാലാവസ്ഥാ വ്യതിയാനവും വൈദ്യുതി ഉപയോഗത്തിലുണ്ടായ വൻ വർധനവുമാണ് നിലവിലെ പ്രതിസന്ധിക്ക് പ്രധാന കാരണമെന്ന് മന്ത്രി വ്യക്തമാക്കി.
സംസ്ഥാനത്തെ ജലസംഭരണികളിലെ ജലനിരപ്പ് 28 ശതമാനമായി കുറഞ്ഞതായും മന്ത്രി അറിയിച്ചു. പ്രതിസന്ധി മറികടക്കുന്നതിനായി ഹ്രസ്വകാല കരാറിലൂടെ കൂടുതൽ വൈദ്യുതി വാങ്ങാൻ ശ്രമം നടത്തുകയാണെന്നും ഇതിനായി റെഗുലേറ്ററി കമ്മീഷന്റെ അനുമതി തേടിയിട്ടുണ്ടെന്നും അദ്ദേഹം പറഞ്ഞു.
കേന്ദ്ര പൂളിൽ നിന്ന് ലഭിക്കുന്ന വൈദ്യുതിയിൽ കുറവുണ്ടായതും നിലവിലെ പ്രതിസന്ധിക്ക് കാരണമായതായി മന്ത്രി ചൂണ്ടിക്കാട്ടി. വൈദ്യുതി നിയന്ത്രണം ഭരണപരാജയമായി കാണുന്നത് ശരിയല്ലെന്നും മുൻ സർക്കാരുകളുടെ കാലത്തും സമാനമായ നിയന്ത്രണങ്ങൾ ഉണ്ടായിട്ടുണ്ടെന്നും അദ്ദേഹം വ്യക്തമാക്കി.
വൈദ്യുതി സംഭരണ ശേഷി വർധിപ്പിക്കുന്നതിനുള്ള നടപടികൾ സ്വീകരിക്കുമെന്നും ബാറ്ററി സ്റ്റോറേജ് സംവിധാനങ്ങൾ ശക്തിപ്പെടുത്തുമെന്നും മന്ത്രി അറിയിച്ചു. കൈമാറ്റ വ്യവസ്ഥയിൽ വാങ്ങിയ വൈദ്യുതി തിരിച്ചുനൽകേണ്ട ബാധ്യതയുണ്ടെന്നും അദ്ദേഹം പറഞ്ഞു.
അതേസമയം, സംസ്ഥാനത്ത് വൈദ്യുതി നിയന്ത്രണം തുടരുകയാണ്. വിവിധ മേഖലകളിൽ പല സമയങ്ങളിലായി വൈദ്യുതി തടസം നേരിടുന്നതായി ഉപഭോക്താക്കൾ പരാതിപ്പെടുന്നുണ്ട്. ജനങ്ങളുടെ ബുദ്ധിമുട്ടുകൾ മനസ്സിലാക്കുന്നുണ്ടെങ്കിലും നിലവിലെ സാഹചര്യത്തിൽ നിയന്ത്രണം പൂർണമായി ഒഴിവാക്കാൻ കഴിയാത്ത അവസ്ഥയാണുള്ളതെന്നും മന്ത്രി വ്യക്തമാക്കി.
പ്രതിസന്ധി പരിഹരിക്കാൻ സാധ്യമായ എല്ലാ നടപടികളും കെഎസ്ഇബി സ്വീകരിച്ചുവരികയാണെന്നും വൈദ്യുതി വിതരണം സാധാരണ നിലയിലാക്കാനുള്ള ശ്രമങ്ങൾ തുടരുകയാണെന്നും മന്ത്രി അറിയിച്ചു.
